Read Kok Borok JISAIA 59 Bible Online

JISAIA 59 - Kok Borok bible

JISAIA 59

¹Nai di, Subraiyungni yak aswk bara ya bo mwthangwi man ya wngnani, bini khunju aswk nathong ya bo khna ya wngnani;

²phiya ba norokni cha yarok norokno Kaitor bai swkak kha, norokni sumsokrokni bagwi bini mwkhang norokno huiwi ton kha, aboni bagwi bo khna li ya.

³Tamo khe norokni yak thẃi bai tei yasirok cha ya bai dera rw kha; norokni khukchwi tatal kók sa kha, norokni bwslai kók hamya sa-o.

⁴Khoroksa phano kubui bai buj khlai ya tei khoroksa phano sói khe raidano tẃi lai ya, bórok tatal sa-o, hamyano ogo tẃi’-o tei sumsokno bá-o.

⁵Bórok chibukrokni bẃtẃirogo koro-o tei bórok béngsnalrok swngo; bórokni bẃtẃi chánairok thwi-o, tei abo khumpai khe chibuk ongkhorwi phai-o.

⁶Bórok swngma béngsnal rí kha ya; bórok snamma bai bórokni sak kholopjak glak; bórokni samungrok bebakno samung hamya máng tei bórokni yago samung sitra máng.

⁷Bórokni yakung samung sitra phaising thángo tei bórok borok kahamrokni thẃi kochok rwnani bagwi doi thángo, bórokni uansukmarok bebak cha ya máng uansugo, a bórokni lama-o rwkhlaiwi bukcha khlaima tei sokomorma máng se.

⁸Bórok tong kwchangni lamano si ya tei bórokni lama-o bujsói kwrwi; bórok bórokni laharno kokoi-mokoi khlai kha, a lama tẃi himnairok bórok tong kwchang tamo saui man ya.

⁹Aboni bagwi bujsói chwng bai hakchal wng kha tei kubui khe tongma chwngno kobol phai ya; chwng pohorno naisingo, phiya nai di, aro mwnakma se; tamo khe kwchẃngno naisingo, phiya ba chwng mogwi se ma himo.

¹⁰Chwng phularok hai khe chokdeual romwi kopromo, mokol kwrwirok hai khe kopromo; dibor jora’-ono, sal pháng-phángo, chwng thutai-o; khá srangjakrokni bisingo chwng kwthwirok hai máng.

¹¹Chwng bebakno gong hai sokromo, tokthu hai chwng bwkha nangwi kabo; chwng sói bujno naitugo phiya ba aro sói buj kwrwi; mwthangjaknani abo chwng bai belaino hakchal.

¹²Tamo khe, nini bwskango chini cha ya-chúk ya kwbángma wng kha; chini sumsokrok chwngno kebengwi kók saui tongo; chini cha ya-chúk yarok bebak chwng bai’-no tongo tei chwng chini cha yarokno saui mano.

¹³Cha ya chúk yarok, Subraiyungno sak nang ya wngma tei chini Kaitorni lamani phérmani, sátokmani tei kebengwi bachama, tatal kókthái ogo tẃima tei abórokno bwkhani tikhlai samarok.

¹⁴Bujsói uphilwi thángjak tei sói kubui khe tongma hakchal wngjak; kubui lukurokni lampra-o thutaiwi klai kha tei sói kubui habwi man li ya.

¹⁵Kubuini biyal wng kha, hamya samung yakarnai borok khẃi-o romjagwi tong kha. Subraiyung abono nuk kha tei bo omo bini bwkhano hamya khlai kha, aro sói buj kwrwi kha.

¹⁶Bo nuk kha chwla khoroksa phan kwrwi tei uanajak kha, tamni hwn khe aro chuba-chrunai khoroksa phano kwrwi; aboni bagwi bini yaktwk bono kwplai khlai kha tei bini sói kubui bono chuba kha.

¹⁷Bo sói kubui khe tongmano khaklap katijaknai hai khe khaui na kha, mwthangjakmano khorok thupjaknai hai khe thubui na kha; yagul sunanino rí-chum hai khe chumwi na kha tei muchungmano dulai hai khe chumwi na kha.

¹⁸Bórokni samung tangma tẃi’-no chwngbo su-ui rwnai, bini kebengnairok jolima tei arirokno bórok khlaima tẃi’-no su-ui rwnai, twi rukungni bororokno bórokni manna tongma swk’-no su-ui rwjaknai.

¹⁹Aboni bagwi Subraiyungni mungno salthángbai-o tongnairok tei bini chẃngsachano salka phaising tongnairok kirijak bai anw; tamni hwn khe, bo twi tor khlaiwi phaima hai khe phainai, abo Subraiyungni nokbar bai béngjak.

²⁰“Jakobni bororok sumsokni bwkha kiphilnairokni bagwi bo Siyono Phiyóknaisa wngwi phainai” hwnwi Subraiyung sa-o.

²¹Subraiyung hai hwnwi sa-o, “Bórok bai ani swmai wng kha omo hai; nini thani tongma ani phola tei nini khugo ani kókthái rwmarok nini búkhúkni kwmaui ta tháng thung tei nini nwsarokni búkhúkni tei bórokni bwsarokni khúkni bo kwmaui ta tháng thung, hwnwi Subraiyung tabukni simi kusung kusungni bagwi omono sa-o.”