Read Kok Borok JISAIA 60 Bible Online

JISAIA 60 - Kok Borok bible

JISAIA 60

¹Sicha di, pohor wng di; tamni hwn khe nini pohor sók phai kha. Tei Subraiyungni chẃngsacha nini saka-o kasa kha.

²Tamni hwn khe nai di, mwnakma hano tei belai mwnak kosong lukurokno kolop bai kha; phiya ba, nini saka-o Subraiyung kasanai, nini saka-o Subraiyungni chẃngsacha nukjaknai.

³Hakhe dopharok nini pohoro phai bainai, tei habugrarok bo nini pohoro phai lainai.

⁴Nwng naisaui kitingwi naisigwi nai di; bórok bebakno thumsa wngwi nini thani phaiwi tongo; nini nwslasong hakchalni phainai, tei nini nwsajwksong bo bamwi tubujaknai.

⁵Hakhe, nwng nuk anw tei mwkhang chẃng anw, nini bwkha srang anw tei tongthok anw; tamni hwn khe twijlangni kwbángma manwi-khwnwi nini thani kiphilwi sók phainai tei, dopharokni mai-khul rang rí nini thani sók phai bainai.

⁶Nono kwbángma mangingangrok khobwi tonnai; tei Midian bai Ephani chasloksa mangingangrok bo tongnai; ha Sebani bebakno phai bainai. Bórok rangchak tei satrai motom tubunai tei Subraiyungni lobjaknano sakhlainai.

⁷Kedarni bebak mera bodolrok nini thani thumwi tubujak bainai, Nebaiotni pun merarok nono mon lainai; bórok ani háyáno yachagwi phai lainai, tei ang ani chẃngsajak nokno chẃngsa rwnai.

⁸Omorok sabo chumui hai khe birwi phai lai, tei tokthurok hai khe sabo tailam bwkhak phai?

⁹Tamni hwn khe twijlang rukungni bororok ano naising anw, Tarsisni rungkotor swkang nwslasongno hakchalni tubu-ui phai anw, tei bórokni rukphai bai rangchakrok bórok bai baksa tubu anw; nini Kaitor Subraiyungni bumungni bagwi, Israilni kwtharsani bagwi se, tamni hwn khe bo nono chẃngsacha khlai kha.

¹⁰Buini hani bororok nini chokdeualrokno tisa anw, phiya bórokni habugrarok nono mon anw, jolimani bagwi ang nono swprak kha; phiya ba khá samani bagwi ang nono khairok phi kha.

¹¹Nini hap-lamni duglam phiyókjagwi máng tongnai; sapung hopung abo sojak glak; bororok dopharokni rang-rí nini thani tubujak anw; tei bórokni habugrarokno bo abórok bai baksa tubujak anw.

¹²Phiya nono mon ya dopha eba harok nini seleng wngnani sói ya hwn khe abórok komornai; a dopharok pái súgwi’-no bukcha khlaijak suknai.

¹³Lebanonni chẃngsacha nini thani sók phai anw; buphang kahamrok, pain buphangrok, saiprasphangrok baksa khe sók phainai; ani Nok kwtharno naithok rwnani bagwi thepanai; tei ang aro ani yakungno berathaino chẃngsacha khlanai.

¹⁴Nono sátoknairokni bwsarok bokhorok bomwi nini thani phai anw; tei nono sak nang yarok bórok bebakno nini yakungo klaiwi ma khulum anw; bórok nono Subraiyungni kamiyung, Israilni Kwthar Siyon hwnwi ringnai.

¹⁵Nwng khibijak tei naislerjak tongmani, nini bising tẃi khoroksa phano láisunai kwrwi kha, ang nono bóromni bagwi bórom gwnang khlainai, tei bisi kusung kusung tongthok rwui tonnai.

¹⁶Nwng dopharokni abuktwi nung anw, tei habugrarokni abuktwi kusup anw; hakhe ang se Subraiyung, nini phiyóknaisa tei mwthangnaisa, Jakobni khoroksa phan gwnang kuk hwnwi nwng saui mannai.

¹⁷Ang pitolno tubu yaui rangchak tubunai, tei sor tubuyaui rukphai tubunai, buphang tubuyaui pitol tei holong tubu yaui sor tubunai. tei nono naikolnairokno kwchang kwchang tei samung tangnairokno sói kubui khlainai.

¹⁸Ha-o tei uálai-suk lai khna glak; nini ari bisingo swbaimung sokomormani kókrok, nini ari bisingo tong glak; nini chokdeualno mwthangnai bumung phar anw; tei nini duglam kotorno khe lobjaknai hwnwi phar anw.

¹⁹Sal tei salo nini pohor wng glak, horo pirnani bagwi talbo tei nono pohor rw glak; phiya ba Subraiyung se nini mol brúmni pohor wngnai, tei nini Kaitorno nini chẃngsacha wngnai.

²⁰Nini sal tei hap glak, tei nini talbo tei thwi glak, tamni hwn khe Subraiyung nini mol brúmni pohor wngnai, tei nini kapnani sal pái thángnai.

²¹Nini bebak bororok sói kubui borok wng bai anw; bórok kusung kusungni bagwi ha yago mannai, ani yakni samungrok, ani káimani buphang rotomjak, aboni bising tẃi ani chẃngsacha nukjak anw.

²²Kotoi kuk abo kotor wngwi bachanai, dopha bwsa abo phan gwnang dopha wngwi bachanai; ang Subraiyung; sói jora-o abono daktino khlainai.