Read Kok Borok JISAIA 61 Bible Online

JISAIA 61 - Kok Borok bible

JISAIA 61

¹Subraiyung Kaitorni phola ano koboljak, tamni hwn khe sátokjakrokni thani kothoma kaham pírnani bagwi Subraiyung ano chong kha; Bo ano bwkha kwbairokni kwsarokno khaui rwna bagwi, khaui romwi tlangjakrokno phiyókjakma kók, tei alongo chopjak bororokni thani phiyókjakma kók sakhlaina hwnwi rohorjago;

²Subraiyungni hamjakma bisi tei chini Kaitor yagul sunani salni kók sakhlaina bagwi, tei bebak khá khamjakrok khakchang rwnani bagwi rohorjago;

³Siyonno tongnairokni bagwi chongnani thapla rwna-o khum bwtang rwnani, kapsimang kapma-o tongthokni thok rwnani, bwkha hiligwi tongma-o lobmungni chummung rwnani; bo uk sói kubuini buphang hwnjakna nangnai, Subraiyung káimanirok hwnjagwi, tei bo chẃngsacha khlaijakna nangnai.

⁴Bórok kamiyung kwcham báijakrokno tisa phinai, swkangni bukcha báijakrokno snamwi tisanai; tei swbaijak khibijak kamiyungrokno, bosongni kusung kusungni báijak kamiyungrokno bebakno kwtal khe snam phinai.

⁵Buini hani bororok bachaui norokni mal-matarokno mwrwgwi chá rw phainai; buini hani bororok norokni al chuainai, tei angur bari-o samung tangnai wng anw.

⁶Phiya ba norok khe Subraiyungni ochairok, hwnwi ringjak anw, bororok norokno chini Kaitorni samung tangnairok hwn anw; norok khe bororokni rang-mairokno chá anw, bórokni wngmani bai norok khe, chẃngsacha wng anw.

⁷Norok lachimung manna tongma-o se aboni kusungnwi kwbáng manthai banta mannai; sak nang ya khlaijakna tongma-o se, bororok sak sakni banta manmani bai tongthok anw; aboni bagwi nini sakni ha-o banta kwnwi mannai; norokni tongthokma mol brúm brúmni bagwi wngnai.

⁸Tamni hwn khe ang Subraiyung sói bujno hamjago, ang khokmano tei cha yano selengo; tei ang sói khe bórokni manna tongmano supungwi rwnai; tei ang bórok bai kusung kusungni bagwi swmai tangnai.

⁹Tei bórokni bosong dopharokni bisingo, tei bórokni bwsarok bororokni bisingo sinijaknai; bórokno nuknai bebak bororok ma sa anw; bórok Subraiyung bai hamari rwjak bosong hwnwi saui mannai.

¹⁰Ang Subraiyungno tẃiwi belaino tongthoknai, ani phola ani Kaitorno tẃiwi lobsanai; tamni hwn khe bo ano mwthangmung bai kan rw kha, bo ano sói kubuini rí bai khe ani sakno ból kha, chamari kwtalno khumtrang kan rw tẃi khe kan rw kha, tei khorok sa hamjwk kwtal sakni gwina-ganthi kanwi sakno naithok rwma hai khe, kan rwui mwchang rw kha.

¹¹Tamo khe ha bini o bwchlwi per rwma hai, tei haphar bini o bwchlwi per rwma hai khe; Subraiyung bo bebak dopharokni bwskango sói kubuino’-no tei lobmungno achai rwnai.