Read Kok Borok JISAIA 62 Bible Online

JISAIA 62 - Kok Borok bible

JISAIA 62

¹Siyonni bagwi ang siring siring tong glak, tei Jerusalemni bagwi bo bathagwi tong glak; bini hamya sajakma kwchẃng pohor hai khe nongkhor ya sak, tei mwthangjakmani homchang hai jlai jlai wng ya sak bathak ya.

²Dopharok nini yagul sujakmano nuknai, tei bebak habugrarok nini chẃngsachano nuk bainai: tei nono bumung kwtal bai ringjak anw. Subraiyung khúk baithangno a bumungno phar anw.

³Nwng Subraiyungni yakni kaisa chẃngsacha motok wng anw: tei nini Kaitorni yago bugrani khorokni motok wng anw.

⁴Nwng tei khibijak hwnwi hwnjak glak, nini habo haino khibijak wng glak: Phiya ba nwng, ang bono khá phuro hwnjak anw, tei nini ha káijak hwnwi sinijak anw; tamni hwn ba Subraiyung nono bwkha phuro; tei nini ha káijak wng anw.

⁵Tamo khe chwla sikla bwrwi siklano, kwtharno káijakma hai, abo tẃi kheno nini nwsarok bo nono káijak anw; tei chamari kwtal hamjwk kwtalno tẃiwi tongthokma hai; abo tẃi kheno nini Kaitor bo nono tẃiwi tongthok anw.

⁶O Jerusalem ang nini chokdeual saka o mwrwknai sengkrakno tonwi rw kha, bórok sapung hopung siring siring tong glak. Norok Subraiyungno muitu khlainairok tei lengla ya,

⁷bo Jerusalemno songchaui pái súk ya sak; tei ha gwnangwi lob lai ya sak, bono ta lengla rw di.

⁸Subraiyung bini yagra yak bai, tei bini phankrak yaktwk tisaui hai hwnwi swmai tang kha; “Ang nini arirokno chámungni bagwi nini bwthái bwchlwino rw glak, tei nwng kolomtwi khiklai tangwi manmani, angur bwtwirokno bini hani bororokno nwng rw glak.

⁹Phiya ba abórokno thumnairok bórokno abono chánai, tei Subraiyungno lobnai tei abono thumnairok, bórokno ani háyá kwtharni nokhla-o abono nung anw.”

¹⁰Norok bwskango tháng di, duglam tẃi tháng di, bororokni bagwi lahar snam di; lahar kotor snam di; bebak holongrok nor bai di; dopharok sininani bagwi kaisa bana tisa di.

¹¹Nai di, Subraiyung hani páithak jora tẃi sakhlai rw kha; Siyonni sajwkno hai hwnwi sa di; “Nai di, ‘nini mwthangma, phaiwi sók phai kha,’ bini sokat bai bini supungwi rwma bini aro’-no tongo.”

¹²Bórok, borok kwthar hwnwi hwnjaknai, Subraiyungni phiyókjak borok hwnjaknai; tei nwng ringjaknai, naitugwi manmani; khibijak ya kamiyung hwnwi hwnjaknai.