Read Kok Borok JISAIA 63 Bible Online

JISAIA 63 - Kok Borok bible

JISAIA 63

¹Sabo abo, Idomni phainai, rí kwchak kanmung-chummung bai khe Bojrani phainai, jilik-jalak kanjak chumjak khe sakni phan thonwi himwi phainai, abo sabo? “Omo ang se, yagul sunano sakhlainai, mwthangwi mannani phan gwnang.”

²Nini kanma chummarok tamni bagwi kwchak, nini rí-chumrok tamni bagwi angur pherenairokni rí-chum hai?

³“Ang saichung susukno angur pherejaknai-o angur phere kha tei lukurokni bere khoroksa phano ano chubanai kwrwi; ang joliui bórokno phere kha tei joli súgwi ang bórokno kádulwi phere kha tei bórokni thẃi chersamani ani rí-chumo nang phai kha, bebak ani kanma chummarogo gap nang bai kha.

⁴Tamo khe yagul sunani sal ani khá-o tongo tei ani phiyókjaknani bisi sók phai kha.

⁵Ang naharwi nai kha, phiya ba aro chubanai khoroksa phano kwrwi; phiya khoroksa phano romsrunai kwrwi, hakhe ani sakni yakno ano kwplai khlai kha tei ani jolima ano chuba kha.

⁶Ang jolima bai bororokno kádul kha, ani jolima bai ang bórokno phek rw kha tei ang bórokni thẃi kwthang ha-o lukhlai kha.”

⁷Ang Subraiyungni hamjakma kwrakno sauino tongnai, Subraiyung chwngno aswk rwmarokno tẃi, tei bini podrepot khairokma bai chubama tei Israil bosongrokno aswk hamari rw kha, bini hamjakmung kwrak bai khe khairok kha.

⁸Tamo khe bo hai hwnwi sa kha, sói’-no bórok ani bororok, ani bwsarok, bórok tatal khe tang glak tei hakhe bo bórokni mwthangnai wng kha.

⁹Bórokni bebak sátokma man phuru-o, bo’-bo sago nangjak kha, bini bwskangni suarirok bórokno mwthang kha; bo bini hamjakma tei khairokma bai bórokno phiyók kha, bórokno kuchugo tisa kha tei swkangni bebak salrogo bórokno bamwi tẃi kha.

¹⁰Phiya ba bórok kebeng lai kha tei bini phola kwtharno khá nang rw kha; nwng aboni bagwi bo uphilwi bórokni ari wng kha tei bo sakphang bórokno kebengwi choba khlai kha.

¹¹Hakhe bo a kwcham salrokni kókrokno, bini seleng Musini kókrokno muitu wng kha. Chwngno twijlangni tisaui tubunai tei bini mera bodolno mwrwknai sa buro tháng kha hwnwi sa lai kha? A sakni bodol mwrwknairok bai baksa twijlang basu rwui tubunai? Bórokni kwcharo phola kwtharno tonnaisa biyang tháng kha,

¹²Musini yagra yago phankrak yak suhornai buro wng kha, sakni bumungno komor ya khlai tisana bagwi bórokni bwskango twino khaknwi khlainai buro?

¹³bórokno sabo twijlangni kuthuk tẃi lái rw kha? Korairok hasing haphar tẃi thángma hai khe bórok tháng lai kha, hai phano thutai lai li ya.

¹⁴Mal-matarok harungo ongkhorwi thángma hai khe, Subraiyungni phola bórokno lengla rw kha. Sakni mungno chẃngsa rwna bagwi nwng nini bororokno tlangwi tháng kha.

¹⁵Nwng chuknoha-o tongwi naikhlai nai di, nini kwthar tei chẃngsacha tongthaini naikhlai di. Buko nini muchungma tei nini phankrak? Nini khá bisingni ano hamjakma tei khairokmarokno mwthak kha.

¹⁶Tamni hwn khe nwng’-no chini apha; Abraham chwngno sini ya phano tei Israilrok chwngno yachak ya phano, nwng Subraiyung chini apha, yaphangni simi’-no chini Mwthangnaisa nini bumung.

¹⁷O Subraiyung, nwng tamni bagwi chwngno nini lamano koró rw lang, tamo chini bwkhano rak rw lang, aboni bagwino chwng nono kiri li ya? nwng nini selengrokni bagwi nini bosongrokni bagwi kiphil di.

¹⁸Nini kwthar bororok kwthar háyáno manmani jora kisa si kho; chini arirok nini háyáno yakung bai kádul bai kha.

¹⁹Chwng nwng bai uáisa phano tẃiduljak yarok hai wng kha, nini bumung bai ringjak yarok hai wng kha.