Read Kok Borok JISAIA 65 Bible Online

JISAIA 65 - Kok Borok bible

JISAIA 65

¹Ano naituk ya, omo hairok bai bo ang naitukjakna tiyar wng kha, ano naituk yarok bai bo, ang nukjak kha; ani mungwi ring ya dopharokno bo ang hai hwnwi sa kha, “Ano naisik di, ano naisik di.”

²Ang sapung’-no kók na ya bororokni bagwi ani yak phologwi tongo; bórok sak sakni uansukmano rwgwi hamya lama-o himo.

³A bororok sal brúm kwtal kwtal samungrok bai ani bwskango ano bwkha hamya khlai-o. Tháiblwng kwtharrogo[31] ratharwi yapharo, holong budul sakarogo satrai motom sógo.

⁴Bórok simalwngo achugwi o, siring siring borok kwrwirogo tongwi hor ai-o; bórok uakni bahan chá-o; tei bórokni twgo selengmasingcha muihan bwtwi tono;

⁵bórok hai hwnwi sa-o, “Nwng sak tong thani’-no tong di, ani gana-o ta phai di, tamni hwn khe ang nwng bai khagwi tonjak.” Abórok ani bukungni hoku, a hór sal brúmno khamwi tongo.

⁶Nai di, ani bwskango omo hai hwnwi swijak tongo: “Ang siring siring tong glak, ang yagul sunai; au, bórokni khuri’-ono su-ui rw phinai;

⁷Subraiyung sa-o, ang bórokni cha yarokno tei bórokni chuchusongni cha yarokno baksa khe yagul sunai; tamni hwn khe bórok hachuk sakarogo satrai motom sógo; tei hatháirogo ano kebengo; aboni bagwi ang bórokni swkangni samungrokno rwtaui yagul sunai.”

⁸Subraiyung hai hwnwi sa-o, “Angur buthubo bwtháini bwtwi tong khe, abono ta bukhrai di, tamni hwn khe aro hamari tongo!” Hai khe angbo ani selengrokni bagwi bebakno bukhrai glak.

⁹Ang Jakobni aroni bosongrok tei Judani aroni ani hatháini manthai mannairok snamnai; ani chongjak bororok abono mannai tei ani selengrok aro tongnai.

¹⁰Saron mera bodolrokni mwrwkthai sula wngnai; tei Akhur harung khe mal-mata bodolrokni thuthai wngnai. Ani bororok ano khulum lainai.

¹¹Phiya ba norok Subraiyungno khibi kha, ani hathái kwtharno[32] pok kha, talikha mwtaini bagwi songphang achuk rw kha tei kwpal hamnani bagwi sabuljak chuak khuri supungwi ton lai kha;

¹²Ang norokno sengo khiklainai tei norok bebakno ratharnairokni thani khorok bom lainai. Ang norokno ring phuru khunju kai ya gwja ang sa phuru bo khna ya, phiya ang chajak yano’-no norok khlai lai kha tei ang hamjak yano’-no norok saiwi na kha.

¹³Aboni bagwi Subraiyung Kaitor hai hwnwi sa-o: “Nai di, ani selengrok chá anw, phiya ba norok ok khuiwi ma tongnai; nai di, ani selengrok nung anw, hai phano norok kangwi ma tongnai; ani selengrok tongthoknai hai phano norok lachimasingcha ma wng anw;

¹⁴nai di, ani selengrok bwkha tongthogwi rwchap anw, phiya ba norok khe bwkha hamya wngwi ma kap lai anw; tei phola-o belwi kengai kap anw.

¹⁵Norok ani chongjak bororokni thani norokni bumungno swraimung nang rwna bagwi klang anw tei Subraiyung Kaitor nono buthar anw, phiya ba, bo bini selengrokno kubunni bumung bai khe ringnai.

¹⁶Hakhe, sak sakno ha saka-o hamari rwnai, bórokbo kubui Kaitorni bumungo sakno hamari rwnai tei swmai tangnai borok, bo kubui Kaitorni bumungno tẃi swmai tangnai; tamni hwn khe swkangni bebak sátokmungrokno pok bainai tei ani mokol bwskangni abo huijak anw.”

¹⁷“Tamo khe nai di, ang Nokha kwtal bai ha kwtal snamnai tei swkango tongmarok abo muitu tonjak glak eba bwkha-o muitu man glak.

¹⁸Phiya ba ang snammano tẃi aro norok mol brúm brúm tongthotok khe tong di; tamo khe nai di, ang Jerusalemno tongthotok tei bini bororokno bwkha srangjak khe snamo.

¹⁹Ang Jerusalem o tongthoknai tei ani bororok bai bwkha srangnai; tei aro kap lai-kok laini khorang bai dosa-sonta nangwi kapmani khorang khna glak.

²⁰Aroni kwlwi bwsa khoroksa phano thwi glak eba khe khoroksa swk borok chakra umor pung súk yaui thwi glak; khoroksa swk nokha bisi sa ra-o thwi phano bo sikla kho hwnwi se hwnjaknai; nokha bisi ra umor kána swkang thwinairokno khe swraimung nangjak hwnwi hwnjaknai.

²¹Bororok nok tangwi aro tongnai, bórok angur bari khlaiwi aroni bwtháirok chánai.

²²Bórok nok tang khe tei kubunni borok aro tong phai glak; bórok kái khe tei kubunni borok chá glak; ani bororokni umor buphangrokni bai baksa wngnai tei ani chongjak bororok bisi dwgwi bórokni yak baithang samung tangmani bwthái ma chá anw.

²³Bórok samung tangmarok chúk ya wng glak, eba bórokni bwsarok digi-sigi manjakna hwnwi achai glak; tamo khe bórok Subraiyungni hamari manjak bosong tei bórokni chwrairokbo bórok bai baksano hamari mannai.

²⁴Bórok ringmani swkang’-no ang khnanai; bórok kók saui tong phuruno ang yachaknai.

²⁵Mwsá sampari bai mera bwsa thansa chá lai anw. Singho, musuk hai khe chwkap chá anw; tei hadlwi khe chibukni chámung wngnai. Bórok ani hathái kwthar[33] saka-o deramungni samung khlai glak eba sokomor glak, hwnwi Subraiyung sa-o.”