Read Kok Borok JISAIA 66 Bible Online

JISAIA 66 - Kok Borok bible

JISAIA 66

¹Subraiyung hai hwnwi sa-o: “Chuknoha khe ani achukthayung tei haktor khe ani yakung berathai; norok ani bagwi bubo tẃi nok tangnai? Tei ani lenglathai ba bahai?

²Omorok bebakno ani yak bai se snamjago, aboni bagwi omorok bebakno ani máng, hwnwi Subraiyung sa-o. Phiya ba, koinene tei bwkha khir khir tei ani kókno kirinai abo hai borokno se ang naitugo.

³“Musuk ratharnai borok bo borok butharnai bai baksa; mera bwsano ratharnai borok bo, sẃini totra mukhrubwi swbainai bai baksa; bwthái bwchlwi yapharnai borok bo, uakni thẃi yapharma bai baksa; ano muitu khe satrai motom sóknai borok, bo takjak mwtaino hamari rw-o; omorok bórok sak sakni saiwi na kha; tei bórok sak sakni selengmasingcha manwirok bai’-no bwkha tongthogwi tongo;

⁴aboni bagwi angbo bórokni bagwi podrepot digi-sigi rwnani chong kha tei bórok kirimano bórokni saka’-ono tubunai; tamni hwn khe ang ring phuru khoroksa phano kók yachaknai kwrwi, ang kók sa phuru bórok khna ya gwja; phiya ba ani mokolo chajak ya abono’-no bórok khlai kha, ani hamjak yano’-no bórok saiwi na kha.”

⁵Norok Subraiyungni kókno kiriui kwlwinairok bini kókno khna di: bo hai hwnwi sa-o, “Norokni takhuksong norokno naislerjagwi phiya ani bagwi norokno khibiui rwnairok hai hwnwi sa lai-o, ‘Chwng norokni tongthokmungno nukna tẃi khe Subraiyungni chẃngsacha wng thung’; hwnwi sa lai-o phiya ba bórok lachimasingcha khlaijaknai.”

⁶“Khna di, kamiyungo chiri-mokorok khorang! Noktharni a khorang, abo Subraiyungni khorang, arirokno yagul sumani!”

⁷“Bánani bohok samani swkang’-no bo bwsa báui rw kha. Bohok sa ya sini’-no bwsa chwla khoroksa bá kha.

⁸Omo hai kókrok sabo khna kha ba? Omo hai sabo nuk kha ba? Ha salsani salo da achai ba? Srapsani bere da dopha ba ongkhorwi phai ba? Tamo khe Siyon bánani bohok samani logi logi’-no bini bwslano bá kha.

⁹Ang bánani jora sók phai rwui bánani rw glak diba? hwnwi Subraiyung sa-o; bánani jora sók phai rwuiba tamo bá rw ya khlai tonnai hai da? Omo nini Kaitor sa-o.”

¹⁰“Norok Jerusalemno hamjaknairok; norok bebakno bo bai baksa tongthok di; bini bagwi khá khamnairok norok bini kókno tẃi tongthok di. khá srang di.

¹¹Norok bini khakchang rwma abuktwi kusubwi bwkha kochom di; bono nungsugwi bini pái phlai ya chẃngsacha bai tongthok súk di.”

¹²Tamni hwn khe, Subraiyung hai hwnwi sa-o, “Nai di, ang bórokno twima hai khe hamari phuarwi rwnai tei twi torwi beglaima hai khe dopharokni mai-khul rang-rí kochok rwnai; norok abuktwi nung anw, norok bwchango khe bamwi tẃijak anw, khuri-o achuk rwjak anw.

¹³Buma-bwsano methepma hai khe, angbo norokno methepnai; norok Jerusalemo khakchangma man anw.

¹⁴Norok nuknai, hakhe norokni bwkha tongthok anw; nini bekreng sam kwlwi hai hamchanai; tei Subraiyungni yak bini selengrokni sago tongo hwnwi saui mannai tei bo bini arirokno kebengwi joli-o.”

¹⁵“Tamo khe, nai di, Subraiyung hór bai khe phainai, bini korai malkhung bangkundri hai khe wngnai, bo bini jolimano belai uanamasingcha khe phunuknai tei bini kulmano hórjlai-o phunuknai.

¹⁶Tamo khe Subraiyung hór bai tei bini seng bai bebak bororokno majra rwnai; tei Subraiyung bai kwbángma borok butharjak bainai.

¹⁷“Kwcharo baksa borok sak sak kwthar wngwi tiyar khe uklok uklok tháiblwng kwtharo[34] kubun mwtairokno khulumna tiyar wngo. Norok uak bahan chá-o, nobraisa tei sinjorok chá-o. Aboni bagwi ang abórokno sokomornai” hwnwi Subraiyung sa-o.

¹⁸“Tamni hwn khe, ang bórokni samungrok bai uansukmungrok bebakno saui mano. Tei ang bebak dopharokno tei bebak kókmung bai kók sanairokno thumsa khlaina bagwi phainai; bórok phaiwi ani chẃngsachano nuk phai anw,

¹⁹tei ang bórokni thani kaisa mari tonnai; hakhe bórokni bisingni kwthang tong rwknairokno dopharokni thani, Tarsiso, Puto tei badukhung koknai Lud tei Tubal tei Jabanni gana-o, hakchal twijlang rukungni harogo, uáisa phano ani mung kotor khna ya kho tei ani chẃngsachano nuk ya kho, bórokni thani rohor anw tei bórok dopharokni thani ani phanni chẃngsacha sakhlai anw.

²⁰Hakhe bórok bebak dopharokni bisingni norokni bebak takhuksongno Subraiyungni bagwi yapharmung hai khe tubunai, korai malkhung, manwi tẃinai korai chirka tei mangingangrok bai khe ani hathái kwthar[35] Jerusalemo tubujak bai anw, Israilsarok kwthar khe bórokni bwthái bwchlwi yapharnano Subraiyungni nogo tubuma hai khe tubunai, hwnwi Subraiyung sa-o.

²¹Hakhe ang abórokni bisingni baksano Ochai bai Lebisongni bagwi tlang anw; hwnwi Subraiyung sa-o.

²²“Phiya ang snammani nokha kwtal tei ha kwtalrok ani bwskango tong anw, hwnwi Subraiyung sa-o; nini bosong bai norokni bumung tong rwk anw, hakhe nini bosongrokni bumung bai nini bumung bo tong phlainai.

²³Tei bebak tal nukson bai tal nukma jora, Sabat salni simi sabat sal jora bebak bahan-bwthẃi gwnangrok phaiwi ano khulum anw, hwnwi Subraiyung sa-o.

²⁴“Hakhe bórok phataro thángwi ano kebengwi bachanairokni mang kwthwirokno nai lai anw; phiya bórokni yóng thwi glak tei bórokni hór bo thwi glak tei bórok bebak bahan-bwthẃi gwnangrokni thani selengmasingcha wng anw.”