Read Kok Borok JISAIA 9 Bible Online

JISAIA 9 - Kok Borok bible

JISAIA 9

¹Phiya ba kengaiwi ma tongnairok tei mwnago mogwi ma tong glak kha. Bo swkango Jebulun tei Naptali hano lachimung rwmani tamo khe ulo bo twijlangni lama tei Jordan ayang narni ha, dopharokni Galilino chẃngsacha khlai kha.

²Swkango mwnakma-o himwi tongmani a bororok pohor kotorma nuk kha; mwnakma kwthwini saklomo tongwi tongnairok, bórokni saka-o pohor chẃngsa kha.

³Nwng a dopharokno er rw kha, bórokni tongthokmano báng rw kha, bwthái-bwchlwi thum phuru bororok tongthokma hai khe, segwi nama manwirokno banta khlai phuru tongthok laima hai khe, bórok nini bwskango tongthok lai kha.

⁴Tamo khe nwng bórokni hilik horbakno tei bangorani bokjak thongno, bórokno sátoknairokni raidangno, Midianni a salo khlaima hai khe nwng swbai rw kha.

⁵Choba-o kanma-chumma sengkrakrokni rírok, tei bebak thẃi buljak kanma-chumma bebak manwirok sókjaknai, hórni bagwi bol hai wngnai.

⁶Chini bagwi chwrai khoroksa achai kha; chwngno chwla bwsa khoroksa rwjak kha, tei bini bangora saka-o’-no ha naikolphangni barja rwjaknai: hakhe bini mung wngnai “Uanamasingcha kókbiti rwnaisa,” “Phan gwnang Kaitor,” mol brúm brúmni apha, “Khakchangni bugra.”

⁷Bini naikolma ha tei tong kwchang báng rwrwknai aboni tei páithak tong glak. Bo Daudni achukthayungo achugwi bini hano naikolnai, bujsói bai tei kubui bai khe, tabukni simi mol brúm brúmni bagwi songchaui tisanai, sengkrakrokni Subraiyungni muchungma bai, abo bebak khlaijaknai.

⁸Subraiyung Jakobno kebengwi kók kaisa sa hor kha; tei abo Israilni saka-o klainai;

⁹tei bebak bororok omono saui mannai, Ephraim tei Samaria-o tongnairok, kung chugui tei bwkha-o sitra tẃiwi hai hwnwi sa lai-o,

¹⁰“Holong budulrok klaiwi tháng bai kha, hai phano chwng omono naithok khe snamjak holong bai khe tisa lai phinai, khwichang buphangrok tanwi khibijak bai kha, hai phano chwng aro sidar buphangrok káiwi supungnai.”

¹¹Tamni hwn khe Subraiyung Rejinni arirokno bórokno kebengwi bachana bagwi phan rw kha tei bórokni arirokno tungphla rw kha.

¹²Siriyarok khe salkabai-o tei Philistiasarok khe salthángbai-o Israilrokno monokna bagwi búkhúk khuaui tongo. Hai phano se Subraiyungni jolima thak ya kho; majra rwna bagwi tabuk bo bini yak pholokjak.

¹³Hai phano Israil bororok bwkha kiphil ya kho; Sengkrakrokni Subraiyung bórokno majra rw kha, hai phano bórok bini thani kiphil ya gwja.

¹⁴Aboni bagwi Subraiyung Israilrokno salsani salo’-no bórokni bokhorok tei khitungno tansu-ui khibinai, tal buphang bai bini bedekrokno tanwi páinai;

¹⁵okrarok tei mung gwnang bororok wng kha bokhorok tei tatal khe phrwngnai diyarirok wng kha khitung.

¹⁶Bórokno lama phunuknairok lama koró rwui tẃi-o tei tẃitherjaknairok khe lama phérwi tlangjago.

¹⁷Aboni bagwi Subraiyung bórokni siklarokni bagwi mungsa khá nangjak glak tei bórokni ma-pha kwrwirok tei randijwkrokno bo khairok glak, tamni hwn ba, bórok bebakno Kaitorno sak nangnai kwrwi tei hamya samung khlainairok tei bebak búkhúk sitra tikhlainairok máng. Hai phano omorok bebakno wng phano bini jolima hamya, tabuk bo bini yak tisajak.

¹⁸Kubui’-no samung hamya hór hai kheno khamo; abo atakereng tei busurokno kham rwui pái-o, abo bolong kuthugo hór nang rwnai tei hoku budul budul wngwi saka-o kasa-o,

¹⁹sengkrakrokni Subraiyung joliui majra rwma bai ha khampronai tei bororok khe hórni chájaknai wng kha; khoroksa phano sakni takhuknobo phiyók glak.

²⁰Bórok yagra phaising monogo, hai phano ok khuiwi’-no tongo; tei yaksi phaising chá-o hai phano ok kochomjak ya. Borok thwgwi bebakno sak sakni nok-arini borokni bahanno chánai.[9]

²¹Manase Ephraimno monok kha tei Ephraim bai Manase bórok khoroknw-nwi’-no baksa khe Judani ari. Omorok bebakni bisingobo bini jolima hamya; bini yak tabukbo pholokjak tong kho.