Read Kok Borok LEBI 1 Bible Online

LEBI 1 - Kok Borok bible

LEBI 1

¹Hakhe Subraiyung Musino ring kha tei bono ríni nogo tongwi hai hwnwi sa kha,

²“Israil bororokno hai hwnwi sa di: Subraiyungni thani borok khoroksa swk yapharmung tubu khe, norok norokni mal-matarokni bodolni masa eba gutni masa musuk phano eba mera eba pun phano masa ma tubunai.

³“Tumungno bo bini mal-matarokni bisingni masa sógwi yapharna hwn khe, bo chwla tei mungsa khait kwrwi naiwi abono ma yapharnai. Subraiyung bai yachakjakna tẃi khe bo abono ríni nokni duglamo ma yapharnai.

⁴Bo bini yakno a sógwi yapharma yabrwini bokhorogo khe ma beranai tei abo bini sumsok sújakna bagwi yachakjaknai.

⁵Hakhe bo a musuk chwlano Subraiyungni bwskango ma ratharnai; tei Aron bosongni ochai a thẃino yapharnai tei rínokni duglamo tongmano kitingwi thẃi ma sarchanai.

⁶Hakhe bo a yabrwini bukur ma khuknai tei ma kwraknai.

⁷Aronni bwsa, ochai háyá-o hór ma mwchẃngnai tei aro bol ma boknai.

⁸Aronni bwsa, ochairok a yabrwini bokhorok, bupham, bahanrokno háyáni hóro ma khichonnai,

⁹phiya bo aboni bubuk tei yathekrokno khe twi bai ma súnai. Hakhe ochai bebakno háyáni hóro ma sóknai, sógwi yapharma hór bai a yapharma aboni báhaino Subraiyung motomjago.

¹⁰“Tumungno khoroksa swk bini nokni yabrwirokni bisingo mera eba punrokni bisingo masano sógwi yapharna hwn khe, abo mungsa khait kwrwi tei chwla wngna nangnai;

¹¹tei bo abono háyáni salsibai-o Subraiyungni bwskango ma ratharnai tei Aronni bwsa ochairok aboni thẃino háyáni babaibrwi yang yang ma sarchanai.

¹²Ulo a ochai aboni bahan kwragwi pái khe a ochai bebakno hór saka-o boknai, aboni bokhorok tei buphamroknobo boknai.

¹³A borok aboni bubuk tei biyarokno ma súnai tei ochai a yapharmungno Subraiyungni thani yapharnai tei háyá-o abórokno bebak sógwi páinai. Sógwi yapharma o yapharmungni báhaino Subraiyung motom jago.

¹⁴“Tumungno khoroksa swk Subraiyungni thani tok sógwi yapharna hwn khe abo tokthu eba pharuk bwsa wngna nangnai.

¹⁵Ochai abono háyá-o ma yapharnai, bo abono totra mothorwi sachu-ui tei aboni bokhorokno háyá-o ma sóknai, aboni thẃino háyá gana tẃi kochok rwui ma rohornai.

¹⁶Ulo khe bo bóphai bai bwkrangno háyáni salka bwkhak thapla burungo ma khibinai.

¹⁷Ulo khe bo a tokni kangkhung babainwini’-no romwi sichiknai; phiya ba abono swkak súk glak tei ochai abono háyáni bolo boksaui sóknai, omo wng kha sógwi yapharma, Subraiyung o báhaino motomjago.