Read Kok Borok LEBI 12 Bible Online

LEBI 12 - Kok Borok bible

LEBI 12

¹Subraiyung Musino hai hwnwi sa kha,

²“Israil bororokno sa di, tumungno bwrwi khoroksa swkni ogo bwsa chu-ui bwsa chwla bá khe, a bwrwi nokha salsni jora abul ma tongnai; bini rí sú phuru haino bo abul wngwi ma tongnai.

³Nokha salcharni salo khe a chwla bwsani sakur ma ranai.

⁴Aboni yagulo khe a bwrwi rí sú-ui abul wngmani kakna bagwi bo nokha sal thamchitham jora ma naisingnai, bo kwthar wngnani salni swkang mungsa swk manwi kwthar ma tang glak tei háyá kwthar bwkhak bo ma tháng glak. Kwthar wngmani sal phai ya sak omo hai khe ma tongnai.

⁵Phiya bwsa bwrwi bá khe bo rí sú phuruni hai’-no hati barnwi jora kwthar ya wngwi ma tongnai tei bo nokha sal dokchidok jora bini thẃi chorommani kwthar wngna bagwi ma naisingnai.

⁶“Tei bwsa chwlani bagwi phano wng thung bwsa bwrwini bagwi phano wng thung bini a kwthar wngnani jora pái khe bo ríni nok kwtharo ochaini thani nokha bisi kaisani mera sógwi yapharna bagwi ma tubunai tei pharuk bwsa masa eba tokthu masa sumsokni yapharmungni bagwi ma tubunai,

⁷tei ochai Subraiyungni thani a bwrwini abul súna bagwi ma ratharnai, aphuru khe a bwrwini a thẃi thakmani aroni kwthar wngnai, bwsa chwla eba bwrwi bánairokni bagwi omono wng kha raida.

⁸Tumungno bo mera bwsa rwnani chúk ya khe bo tokthu maknwi eba pharuk bwsa phano maknwi ma rwnai, masa khe sógwi yapharna bagwi tei masa khe sumsokni yapharmungni bagwi ma tubunai tei ochai a bwrwino abul súchanai, hakhe se a bwrwi kwthar wngnai.”