Read Kok Borok LEBI 13 Bible Online

LEBI 13 - Kok Borok bible

LEBI 13

¹Subraiyung Musi bai Aronno hai hwnwi sa kha,

²“Khoroksani bwsak bukur robonsa khe eba bukur thupusa khe mari wng khe tei abo bwsakni bukuro biyadi wng khe, hakhe bono ochai Aronni thani eba bini bwsarokni bere ochai khoroksani thani ma tubunai,

³tei ochai a bwsak bukurni bemukni marino amjogwi nainai. Phiya a bemukni sakani buikhumu kuphur wng khe tei a bemuk bwsakni bukurni slái kuthuk wng khe omo biyadi bemukno wng kha; ochai bono amjogwi nai khe, bo bono kwthar ya hwnwi sakhlai rwnai.

⁴Tamo khe tumungno bwsak bukurni a mari kuphur hwn khe tei abo bukurni slái kuthuk ya hwn khe tei aroni buikhumubo phur ya hwn khe, ochai a bemuk wngjaknaino nokha salsni jora chobwi tonnai:

⁵Hakhe ochai bono nokha salsnini salo amjogwi nainai tei bo bini mokol baithang amjogwi naiwi a bemuk bukuro tei koproi ya hwn khe, hakhe ochai bono tei nokha salsni jora chobwi ton phinai.

⁶Hakhe ochai bono nokha salsnini salo tei uáisa amjogwi naiwi nai phinai tei bemuk sijak tha ya tei bukuro tei bár li ya hwn khe, hakhe ochai bono srai-srai hwnwi sakhlai rwnai; omo kukma simi se; tei bo bini ríno súnai tei kwthar wngnai.

⁷Tumungno a kwsa bukuro koproi kha hwn khe, ochaini thani bini kwthar wngmano phunukma ulo, bo haino hai ochaini bwskango ma nukjagwi phinai;

⁸tei ochai abono amjogwi nainai tei a kwsa bukuro koproi khe, hakhe ochai bono kwthar ya hwnwi sakhlai rwnai; abo khe biyadi bemuk’-no.

⁹“Khoroksa swk borok biyadi manjak khe, bono ochaini thani ma tubunai.

¹⁰Hakhe ochai amjogwi nainai, tumungno bukuro robonwi kuphur wng khe, abo bai buikhumu phur khe tei aro bahan kwchak nukjak khe,

¹¹abo bini bwsak bukuro ham phlai ya biyadi’-no wng kha tei ochai bono kwthar ya hwnwi sakhlai rwnai; bo bono chobwi ton li ya, tamni hwn khe, bo wng kha kwthar ya.

¹²Tei bukur gwnangwi biyadi lom khe abo bai a biyadi bokhorokni simi yakung jora bemuk wngjak khe tei bo ochaini mokolo klai khe,

¹³hakhe ochai amjogwi nainai tei biyadi bini bwsak gwnangwi lom khe ochai bono srai-srai hwnwi sakhlai rwnai abo bebak phursa rwui pái khe hakhe teibo srai-srai hwnwi sanai.

¹⁴Tamo khe bini bahan kwchak nukjak khe bo kwthar ya.

¹⁵Ochai bini bahan kwchakno amjogwi nainai tei bono kwthar ya hwnwi sakhlai rwnai; bahan kwchak kwthar ya, tamni hwn ba omo biyadi.

¹⁶Tumungno bahan kwchak sláijagwi phurwi tháng phi khe, hakhe bo ochaini thani ma phai phinai,

¹⁷tei ochai bono amjogwi nainai, tumungno a bemuk phursaui tháng khe ochai a bemuk gwnang borokno srai-srai hwnwi sakhlainai; bo srai-srai wng kha.

¹⁸“Tei norokni bereni khoroksa swkni kula ham khe,

¹⁹tei a kula wngma-o kuphur khe robon khe eba kwchak bai kuphur mari wng khe hakhe ochaino ma phunuknai.

²⁰Tei ochai amjogwi nainai tei abono bukurni slái kuthuk nuk khe tei aboni sakani buikhumu phursa khe hakhe ochai bono kwthar ya hwnwi sakhlai rwnai, omo biyadi bemuk, omo kula-o wngo.

²¹Tamo khe ochai abono amjogwi naiwi buikhumu kuphur wng ya tei abo bukurni slái thuk ya phiya kisa se hwn khe ochai bono nokha salsnini bagwi chobwi tonnai.

²²Tumungno abo bukuro khampra khe hakhe ochai srai-srai ya, omo bemuk se hwnwi sakhlai rwnai.

²³Tumungno a mari aro’-no aro tongo tei khampra ya hwn khe omo bwsakni kula se, hakhe ochai bono srai-srai hwnwi sakhlai rwnai.

²⁴“Phiya, khoroksa swkni bukur khampra khe tei bahan kwchago mari nukjak khe aro kwchak bai kuphur mari nuk ya khe,

²⁵ochai abono amjogwi nainai tei tumungno a mari jodoloni buikhumu kuphur wng khe tei abo bukurni slái kuthuk nukjak khe abo biyadi. Abo a khamjak phursamani tei ochai bono kwthar ya hwnwi sakhlai rwnai, tamni hwn ba abo biyadi bemuk.

²⁶Phiya ba tumungno ochai amjogwi nai phuru aroni buikhumuno kuphur wng ya nuk khe tei abo bukurni slái kuthuk ya tei mari sijak súk ya khe ochai bono nokha salsnini bagwi phataro rohor ya chobwi tonnai.

²⁷Tei ochai bono nokha salsnini salo amjogwi nai phinai tumungno a bemukni bukuro khampra ma nukjak khe, ochai bono kwthar ya hwnwi sakhlai rwnai, abo wng kha biyadi bemuk.

²⁸Phiya ba a mari hai’-no hai tong khe tei abo a bukuro koproiwi mari sijak ya wngwi tong khe abo khamwi robonma simi se, tei aphuru ochai bono kwthar hwnwi sakhlai rwnai, tamni hwn ba abo khammani mari simi se.

²⁹“Chwla eba bwrwi khoroksa swkni bokhorogo eba khólai-o bemuk tong khe

³⁰ochai abono amjogwi naiwi tei tumungno abo ganani bukurrokni slái kuthuk hwn khe tei buikhumu kormolele phiya sengtlang tlang hwn khe aphuru ochai bono kwthar ya hwnwi sakhlai rwnai, abo wng kha bokhorok bai khólaini motókmani bemuk.

³¹Tei motóknai bemukno amjogwi nai khe tei tumungno abo ganani bukurrokni slái kuthuk hwn khe tei buikhumu kosom kwrwi hwn khe hakhe ochai a motókjaknai bemuk gwnangno nokha salsni chobwi tonnai.

³²Hakhe salsni salo khe ochai bono amjogwi nainai tei a motókma bár ya hwn khe tei aro buikhumu kormo kwrwi khe, gana ginini bukurroni slái thuk ya hwn khe,

³³hakhe bo buikhumuno silwi páinai. Tamo khe a motókma-o ma sil ya tei nokha salsni a motókjaknai gwnang borokno chobwi tonnai;

³⁴tei ochai bukur motókjaknai borokno amjogwi nainai hakhe a motókma bukuro koproi ya hwn khe tei gana ginini bukurroni slái thuk ya hwn khe, ochai bono kwthar hwnwi sakhlai rwnai phiya bo bini rí-chum súnai tei kwthar wngnai.

³⁵Tumungno súchamani yagulo bini motókma bukuro koproi khe,

³⁶hakhe ochai bono amjogwi nainai tei a motókma bukuro koproi khe ochai buikhumuni kormo to da tong kwrwi naina nang ya, bo kwthar ya.

³⁷Tamo khe a motókmano amjogwi nai khe tei buikhumu kosom achai khe, a motókma ham khe bo kwthar tei ochai bono kwthar hwnwi sakhlai rwnai.

³⁸“Khoroksa swk chwlani phano bwrwini phano bwsak bukuro mari tong khe phiya a mari kuphur hwn khe,

³⁹ochai abono amjogwi nainai tei a bwsak bukurni mari phuble-ble hwn khe abo bukuro haino mari pasama se bo kwthar.

⁴⁰“Tamo khe chwla khoroksa swkni bokhorokni bwkhnai kók khe, bo pilanda se phiya bo kwthar.

⁴¹Tumungno chwla khoroksa swk kwpal cholong babainwnwi khunjuthapni bwkhnai kók khe bo pilanda se, hai phano kwthar.

⁴²Phiya ba a pilanda khoroksa eba kwpal cholongo chaksru-sru bemukni mari tong khe tei abo bini khorok pilanda eba kwpal cholongo biyadi rom khe,

⁴³aphuru ochai bini kwpal pilanda bai kwpachologo chaksru-sru kuphur robonma nuk khe hakhe abo biyadi, bo kwthar li ya.

⁴⁴Ochai bono kwthar ya hwnwi sakhlai rwnai; tei bini bokhorogo bemuk tongo hwnwi sanai.

⁴⁵“Biyadi wngjak borok bo rí kichikrok chumwi ma tongnai tei khwnai khengklaijak khe ma tongnai, tei bini sakani khukchwi kholobwi ‘kwthar ya, kwthar ya’ hwnwi ma chiriknai.

⁴⁶Bini a bemuk hamyasak bo kwthar ya wngwi ma tongnai; bo kwthar ya bo saichung-susuk khe bathamni phataro ma tongnai.

⁴⁷“Kanmung chummung eba ulni rí eba lilonni rí-o bakuma per khe

⁴⁸ulni phano eba lilonni eba bukurni khutwng besero

⁴⁹tumungno abo khrangji-ji phano eba chaksru-sru phano hwn khe abo ernai tei bono ochaino ma phunuknai.

⁵⁰Ochai a bemukno amjogwi nainai tei bemuk manjakno nokha salsni khagwi tonnai.

⁵¹Bo abono nokha salsnini salo amjogwi nainai. Tumungno a bakuma koproi khe a manwi kwthar ya wngnai.

⁵²Ochai abono sógwi ma páinai tamni hwn ba koproinai bakumano hór bai sógwi ma se ma khibinai.

⁵³“Tei tumungno ochai abono amjogwi naiwi a rí-chumo bakuma koproi ya nuk khe,

⁵⁴bo abono sú di hwnwi daginai tei nokha salsni jora juda khe khagwi ton di hwnwi sanai.

⁵⁵Ochai a bakuma perjak manwirokno sújakmani yagulo amjogwi nainai tei a bakuma bai bumul sláijak ya hwn khe bakuma koproi ya phano abo kwthar ya. Norok a manwirokno sógwi ma khibinai a bakuma bwskang phano wng thung uklok phano wng thung.

⁵⁶“Phiya ba tumungno ochai haino hai rí-chum sújakma yagulo bo amjogwi naiwi bakumano bálaijak nuk khe bo aboni khutwngo phano wng thung bukurno phano wng thung bo chirwi khibinai.

⁵⁷Hakhe omo hai khlaiwi bo a bakuma nukjak phi khe abo haino hai koproi khe abórokni nokphang abono sógwi ma páinai.

⁵⁸Tumungno bo a rí-chumrokno sú khe tei a marirok komor khe bo abono tei uáisa sú phinai tei abo kwthar wngnai.”

⁵⁹Omono rí-chumrogo bakumarok klai khe khlaina nangmanirok ulni phano wng thung lilonni phano wng thung eba bukurni phano wng thung omo hai kheno bubo kwthar bubo ba kwthar ya chongnani bagwi raida.