Read Kok Borok LEBI 15 Bible Online

LEBI 15 - Kok Borok bible

LEBI 15

¹Subraiyung Musi bai Aronno hai hwnwi sa kha,

²“Norok Israilsarokno hai hwnwi sa di, khoroksa swkni sakni sákolomni bwtwi choromjak khe a chorommani abo kwthar ya.

³Omono wng kha aboni raida: abo choromwi phano tong thung eba choromma tha phano thak thung abo bai bini kwthar ya wng kha.

⁴Bo thu-ui choromjakmani thuyamrok kwthar ya wngnai; tei bo achukma achukthairok bo bebakno kwthar ya wngnai.

⁵Tei khoroksa swk bini thuyamno tang khe bo bini rírokno ma súnai tei bo twi bo ma tukunai, phiya sal tháng ya sak bo kwthar ya wngwi ma tongnai.

⁶Tei khoroksa swk bo choromjakmani mungsa swgo achuk khe bo bini rírokno ma súnai tei twi bo ma tukunai, sal tháng ya sak bo kwthar ya wngwi ma tongnai.

⁷Khoroksa swk borok a choromjaknaini sak tang khe bo bini rírokno ma súnai tei twibo ma tukunai, phiya sal tháng ya sak jora bo kwthar ya wngwi ma tongnai.

⁸Phiya bwtwi choromjaknai khoroksa swk kwthar borokno khuktwi musu khe hakhe bo bini rí ma súnai tei twi bo ma tukunai tei sal tháng ya sak jora bo kwthar ya wngwi ma tongnai.

⁹Bwtwi choromjaknai borok achukma manwi-o khoroksa swk achuk khe a borok kwthar ya wngnai.

¹⁰Khoroksa swk bini achukma manwirokno tang khe a borok bo sal tháng ya sak jora kwthar ya wngwi ma tongnai tei abo hai manwirokno tẃinai borok bo bini rírokno ma súnai tei twi bo ma tukunai phiya sal tháng ya sak jora bo kwthar ya wngwi ma tongnai.

¹¹Bwtwi choromjak borok tumungno twi-o yak sújak ya khlaiwi khoroksa swkno tang khe a tangjaknai borok bo bini rírokno sú thung tei twibo tuku thung tei sal tháng ya sak jora bo kwthar ya wngwi ma tongnai.

¹²Bwtwi choromjaknai borok bo mungsa swk hani twkrokno tang khe a manwino swbaiwi ma páinai; phiya buphangni manwirokno hwn khe twi-o ma súnai.

¹³“Bwtwi choromjaknai borok bini a bwtwi chorommani thakjak khe bo kwthar wngna bagwi a hammani salni simi nokha salsni ulo bo bini rírokno ma súnai; tei bo twi solo thángwi ma tukunai, hakhe bo kwthar wngnai.

¹⁴Nokha salcharni salo khe bo tokthu maknwi eba pharuk bwsa maknwi tubu-ui Subraiyungni rínokni kuthumma duglamo tubu-ui ma phainai tei abórokno ochaino ma rwnai;

¹⁵hakhe ochai abórokni bere masano khe sumsokni yapharmung tei masano khe sógwi yapharmung yapharnai; ochai Subraiyungni bwskango a bwtwi choromjaknaini bagwi súchamungni samung khlainai.

¹⁶“Tumungno chwla khoroksa swkni sákolomni bwtwi choromjak khe bo bebak bini bwsakno twi bai ma súnai tei sarik jora bo kwthar ya wngwi ma tongnai.

¹⁷Rírogo bukurrogo a sákolom bwtwi nangma-o bo twi bai ma súnai tei sal tháng ya sak jora kwthar ya wngwi ma tongnai.

¹⁸Chwla khoroksa swk bwrwi bai thu-ui sákolom bwtwi choromjak khe bórok khoroknwi’-no twi ma tukunai tei sal tháng ya sak jora kwthar ya wngwi ma tong lainai.

¹⁹“Bwrwi khoroksa swk rí sú khe tei sakni thẃi-hór tháng khe bo nokha salsni jora abul wngwi ma tongnai tei khoroksa swk bini sak tang khe bo sal tháng ya sak jora kwthar ya wngwi ma tongnai.

²⁰Hakhe abul jora-o bo thumani a thuyamrok bo kwthar ya wngnai tei bo achukmani achukthairok bo kwthar ya wngnai.

²¹Phiya bini a thuyamno khoroksa swk tang khe bo bini sakni ríno ma súnai tei twi bo ma tukunai tei sal tháng ya sak jora kwthar ya wngwi ma tongnai.

²²Khoroksa swk a bwrwi achukmani mungsa swkno tang khe bo bini ríno ma súnai tei twi bo ma tukunai, tei sal tháng ya sak jora kwthar ya wngwi ma tongnai;

²³abo bini thuyam phano wng thung eba tei mungsa swk phano wng thung, bo achukma manwino tang khe bo sal tháng ya sak jora kwthar ya wngwi ma tongnai.

²⁴Phiya abul jora-o khoroksa swk borok bo bai thu khe tei a thẃi bini sago nang khe bo nokha salsni jora kwthar ya wngwi ma tongnai tei bo thumani bebak thuyamrok kwthar ya wngnai.

²⁵“Tumungno bwrwi khoroksa swk abul wngmani karwi sal kwdwkma jora thẃi yor khe tei abul wngmani sal láiwi bo thẃi yor khe, bo a thẃi yormani sal jora kwthar ya wngwi tong tẃi’-no bo kwthar ya wngwi ma tongnai.

²⁶Bo a thẃi yormani jora-o thumani thuyamrok bo abo abul jorani haino wngnai tei a jora-o bo achukmani a achukthairok bo abul jora kwthar ya wngwi ma tongnai.

²⁷Tei abono tangnai borok bo kwthar ya wngnai bo bini ríno sú-ui twi ma tukunai tei sal tháng ya sak jora kwthar ya wngwi ma tongnai,

²⁸phiya ba a bwrwini thẃi thak khe bo nokha salsnini ma lekhanai ulo khe bo kwthar wngnai.

²⁹Ulo nokha salcharni salo khe bo tokthu maknwi eba pharuk phano maknwi naui kuthumma rínokni duglam bwskango ochaini thani tubu-ui ma phainai.

³⁰Ochai masano khe sumsokni ratharmung tei masano khe sógwi yapharmung yapharnai, bini a thẃi yorwi kwthar wng ya wngmani bagwi ochai Subraiyungni bwskango bini bagwi súchanai.

³¹“Nwng omo hai kheno Israilrokno abul bai swkagwi ma tonnai wng ya khe bórokni bisingo ang tongmani tongthaino kwthar ya khlaiwi bórok sak sakni abul wngma bai thwi bainai se.”

³²Sákolomni bwtwi yorjagwi tei choromjakmani bagwi kwthar ya wngmani omono wng kha raidarok;

³³tei abul bwrwi bai bwtwi yorjaknai bwrwi tei sákolom bwtwi choromjak bwrwi eba chwla bai sak gwdalwi kwthar ya wngnairokni bagwi raida.