Read Kok Borok LEBI 16 Bible Online

LEBI 16 - Kok Borok bible

LEBI 16

¹Aronni bwsa takhuknwirok Subraiyungni babai sederwi thángwi thwimani yagulo Subraiyung Musino hai hwnwi sa kha.

²Subraiyung Musino hai hwnwi sa kha, “Nwng nini takhuk Aronno sa di, bo belai kwthar kuk a rí koton khe swngjak bisingo swmai bokhokni sakadrop phaising, jora-o jora ya-o ta habwi thung, wng ya khe bo thwinai, tamni hwn ba ang chumui bai khe a khairokma achukthayungo nukjak phainai.

³Aron a kwthar háyá-o hapna swkang musuk bwsa masa sumsokni yapharmungni bagwi tei pun masano sógwi yaphar thung.

⁴Bo twi tuku-ui lilonni kwthar kanmung tei chummungrok chum thung tei khorogo lilonni sórjaknai sór thung, omorok wng kha kanmung kwtharrok.

⁵Aboni bagwi bo Israil dopharokni bagwi sumsok ratharmungni bagwi punjua maknwi tei sógwi barokna bagwi mera masa na thung.

⁶“Tei Aron bini sakni bagwi tei núkhungni bagwi musuk tubu-ui ratharwi barogwi sumsok sú thung.

⁷Aboni ulo a punjua maknwirokno tlangwi kuthum laima ríni nokni duglamo khe Subraiyungni bwskango ma tubunai.

⁸Tei aboni ulo Aron a punjua maknwino naui patkar rwi bubo ba Subraiyungni tei bubo khe Ajajel mwtaini bagwi abo ma nainai.

⁹Patkar rwi Subraiyungni banta klaimani punjuano, Aron tlangwi sumsokni yapharmungni bagwi ma yapharnai.

¹⁰Phiya ba pat karwi Ajajelni banta klaimano kwthangwi’-no Subraiyungni bwskango tubujak anw tei sumsok súnani bagwi Ajajel mwtaini bumungwi hasingkhong hapharo phiyógwi ma rohornai.

¹¹“Aron musuk chwla masano sakni sumsok súnani bagwi tei bini núkhungni bagwi ma yapharnai, bo a musuk chwlano ratharwi bini sakni sumsokni bagwi ma yapharnai.

¹²Tei Subraiyungni bwskango háyá-o satrai sókmani hokhino naui tei mochomnwi satrai naui abono kwsap khe sukhrubwi naui tei bo abórokno rí koton swngjak bisingo tlang anw.

¹³Tei abono Subraiyungni bwskango ma sóknai hakhe a satraini hoku kasamani abo khairokma achukthayungo kobolwi anw hakhe bo thwinani nang glak;

¹⁴hakhe bo a musuk chwlani thẃi kisa naui yasichuk bai khairokma achukthayungni bwskango uáisni ma sarchanai.

¹⁵“Aboni ulo bo bórokni sumsokni baroknani bagwi ratharma punjuani thẃino rí koton swngjak bisingo tlangwi musuk bwsani thẃi sarchaui rwma hai khe khairokma achukthayungo tei aboni bwskango ma sarchanai.

¹⁶Abo hai khe Israilsarokni aswk sumsokni kwthar ya wngmarok bórokni sumsokni bagwi a kuthum laimung ríni nokrokni bagwi abo hai ma súchanai.

¹⁷Hakhe ochai kwthar thai-o habwi bini sakni bagwi, bebak Israilrok, Israil dopharokni bagwi súchamungni samung khlai pái ya sak jora a khulum laimung ríni nok bisingo khoroksa borok phano ma tong glak.

¹⁸Abo pái khe Subraiyungni bwskango tongmani a háyá-o thángwi sumsok súnani bagwi a dega bwsani tei punni thẃi kisa naui háyáni babaibrwini busupni bokorongo ma phulnai.

¹⁹Tei bo aroni thẃi kisa naharwi yasichuk bai khe aboni saka-o uáisni sarchaui rwui Israilrokni sumsok súcha anw.

²⁰“Abo hai khe bo kwthar jagani kuthum laima ríni nokni tei háyáni bagwi sumsok súchama samung pái súk khe a pun kwthangno ma tubunai.

²¹Hakhe Aron a pun kwthangni bokhorok saka-o bini yak kongnwino beranai tei bebak Israilrok cha ya khlaiwi sumsok khlaimarokno bórokni bebak sumsokno lonwi a punni bokhorogo beranai, abo páimani yagulo khe tiyar wngjak bórokni yak bai abono hasinglwng hapharo phiyógwi ma rohornai.

²²Hakhe a pun bini saka bórokni bebak sumsok tei cha yarok ruju-ui borok kwrwi hasinglwng hapharo tlangwi thángnai, abo hai khe a punno hasinglwng hapharo phiyógwi rohorjaknai.

²³“Aboni yagulo khe Aron kuthum laima ríni nogo hapnai tei kwthar kuk thai-o hapnani swkang a lilonni rí-chumrokno khengwi ma klangnai;

²⁴hakhe bo kwrẃngsa kwthar thai-o twi tuku-ui sakni rí-chum kannai tei phataro ongkhornai hakhe bo sakni bagwi tei borokrokni bagwi sógwi yapharmung yapharnai tei kwthar khlainai.

²⁵Hakhe sumsok yapharmungni ratharma mui buphamno háyá saka-o bogwi ma rohornai.

²⁶Hakhe Ajajel mwtaini mungwi a pun phiyógwi rohornai borok bini rírok ma súnai tei twi ma tukunai. Abo pái khe se bo bórokni tongthai-o ma hap phainai.

²⁷Tei sumsokni yapharmani dega bai punni thẃi, thái kwthar khlainani bagwi tei sumsok súnani bagwi ratharma a musuk chwla tei punni thẃi tubujakmani aboni bukur, bahan tei bikhirokno tongthaini phataro tlangwi sógwi ma khibinai.

²⁸Tei abono sóknai borok bo bini rí-chumrok ma súnai tei twibo ma tukunai, aboni ulo khe bo bórokni tongthai-o phaimannai.

²⁹“Norokni bagwi omo mol brúmni raida wngnai nokha talsni talni salsnini salo norokni bisingni eba norokni bisingo phatarni borokrok norok sak sakni kháno dukhu phnang di tei a jora mungsa samung phano ta khlai di;

³⁰tamni hwn ba a salo norok kwthar khlaijakna bagwi norokni sumsok sújak anw, norok Subraiyungni bwskango norokni bebak sumsok kwthar wng anw.

³¹A Sabat sal khe norokni bagwi lenglamani sal tei norok sak sakno dukhu rwui chámungrok suda ta chá di, omo nini bagwi mol brúmni kusung kusungni raida wngnai.

³²Buphani sak slái-o ochaini samung khlaina bagwi súchaui chongjaknai bo a kwthar lilonni rí-chumrok ma chumnai.

³³Bo a háyá kwtharni bagwi tei kuthum laima ríni nokni bagwi a háyá kwtharno kwthar khlainai tei ochairok bai aswk borokrokni bagwi súchamungni samung tangnai.

³⁴Omo norokni bagwi kusung kusungni raida wngnai, bisi-o uáisa khlaiwi Israilrokni bagwi sumsok súchana samung khlaina nangnai.” Hakhe Musi Subraiyung dagima hai kheno khlai kha.