Read Kok Borok LEBI 17 Bible Online

LEBI 17 - Kok Borok bible

LEBI 17

¹Hakhe Subraiyung Musino hai hwnwi sa kha,

²Subraiyung hai hwnwi sa-o, “Nwng Aron bai bwsarokno tei Israilni borokno hai hwnwi sa di,

³Israilrokni núkhungni khoroksa swk tongthaini bisingo eba khe tongthaini phataro phano musuk eba mera eba khe pun rathar khe,

⁴phiya Subraiyungni bwskango abono yapharnani bagwi kuthum laima ríni nokni duglam bwskango abono ta tubu thung, tamni hwn ba abo hai khlaima bagwi bo thẃi kochok rw kha hwnwi romjaknai. Hakhe a borok thẃi kochok rw kha hwnwi sinijagwi bororokni bisingni swkakjaknai.”

⁵Tamo khe Israilsarok bórok ratharma muirokno hapharo thángwi ratharo, abórok bebakno Subraiyungni bagwi kuthum laima ríni nokni duglamo tubu-ui ochai Subraiyungni thani hamkraini bagwi ratharwi ma yapharnai.

⁶Tei ochai kuthum laima rínokni duglamo Subraiyungni háyá saka-o bórokni thẃi sar anw tei buphamno khe sógwi Subraiyungni thani báhai motom khe yaphar anw.

⁷Hakhe bórok ratharwi barokmarokno Subraiyungno khibiui pun mwtairokni thani mal-matarok tei rathar glak. Israilsarok o raidano kusung kusung romwi ma rákhoknai.

⁸“Nwng bórokno hai hwnwi sa di, Israilni eba khe phatarni borokrok norokni bisingo tong phainairok sógwi yapharma tei ratharwi yaphar khe,

⁹tumungno Subraiyungni thani abono kuthum laima ríni nokni duglamni samo abono tubu ya hwn khe, bo bini bororok bai swkakjaknai.

¹⁰“Phiya Israilsa eba khe bórok bai tongnai phatarni khoroksa swk thẃi chá khe, a thẃi chánaino ang tei naisik phi glak tei ang bono bini bororokni bisingni swkagwi rohornai,

¹¹tamni hwn ba thẃi-o se mangni langma tongo. Hakhe norokni langmano kwthar khlaina bagwi abono ang háyáni bagwi rw kha; tamni hwn ba langmani bagwi le thẃi simi se súchaui mano.

¹²Hakhe ang Israilrokno hai hwnwi sa-o, norokni bisingo khoroksa phano tei norokni bisingni eba phatarni norok bai tongnairok thẃi ta chá thung.

¹³Israilsani bisingni eba bórok bai tongnai phatarni borokrok tumung chámainai yabrwi eba tokrok mui romna thángwi buthar khe abórokni thẃino ha bai ból thung.

¹⁴“Tamni hwn ba bebak langma gwnangrokni langma le thẃi-o se; aboni bagwino ang Israilsarokno sa-o: mungsa swkni thẃino ta chá di, tamni hwn ba bebak langma gwnangrokni langma le bini thẃi-o se; abono chánairok swkagwi páijak bainai.

¹⁵Khoroksa swk norokni bisingni eba khe phatarni norok bai tongnairokni bere mungsa swk ahaino thwimani eba tei mungsa swk malrok uátharjagwi thwimani abo tẃi malrokno chá khe bo bini rírokno sú thung tei twi bai tuku thung, phiya bo sarik jora kwthar ya wngwi tongnai; aboni ulo khe bo kwthar wng phinai,

¹⁶tamo khe bo bini ríbo sú ya twibo tuku ya khe bo sakni majrano rujunai.”