Read Kok Borok LEBI 18 Bible Online

LEBI 18 - Kok Borok bible

LEBI 18

¹Subraiyung Musino hai hwnwi sa kha,

²“Israilsarokno sa di, ang nini Subraiyung Kaitor.

³Nwng Ijipsarok bórokni ha-o khlai tẃi ta khlai di, nwng tongbumani a hani tongmung chámungrok hai khe ta tong di; tei ang nono ha Kanano tlangwi tongmani a hani borokrokni tongmung chámung hai khe bo ta tong di;

⁴Ang sama tẃi khe nwng tong di tei a raidarokno rákhogwi tong di; ang’-no nini Subraiyung Kaitor.

⁵Hakhe nwng ani raidarokno tei dagimungrokno khnaui tong di; abono khnanai borok’-no thangnai; ang se Subraiyung.

⁶“Khoroksa swk bini sandairokni aro thángwi bórokni kanma sakni ríno ta khuk thung. Ang se Subraiyung.

⁷Nwng nwphani sago kanma ríno ta khuk di, tamni hwn ba abo bai nwmani bo sak-lánga khlaima klai-o; bo le nwma se, nwng bono sak-lánga ta khlai di.

⁸Nwng nwmani sago kanma ríno ta khuk di; abo bai nwphano se sak-lánga khlaima klai-o.

⁹Nwng nini bukhuk, nwphani eba nwmani sajwkni sakni ríno ta khuk di, bo nini nogo achainai phano eba khe phataro achainai phano wng thung.

¹⁰Nwng nwslasongni sajwk eba nwsajwksongni sakni ríno ta khuk di, abo bai nwng sakno se sak-lánga khlaima klainai.

¹¹Nwng nwphani hikni sajwkni ríno ta kheng di, tamni hwn ba bo le nwphani aroni se, bo nini bukhuk.

¹²Nwng nini nwphani bukhukni ríno ta khuk di bo le nwphani sandaijwk se,

¹³Nwng nwmani bukhukni ríno ta khuk di, tamni hwn ba bo le nwmani sandai se.

¹⁴Nwng nwphani takhukni ríno bo ta khuk di, bini hikno ta bereng di bo le nini núkhungni se.

¹⁵Nwng nini hamjwkni rínobo ta khuk di bo le nwslani hik se, bórokno sak-lánga ta khlai di.

¹⁶Nwng nini takhukni hikni ríno ta khuk di abo nini takhukno sak-lánga khlaima se klai-o.

¹⁷Nwng bwrwi khoroksa swkno tei bwsajwkno sak-lánga ta khlai di tei bini sajlani sajwkno eba bwsajwkni sajwkno sak-lánga ta khlai di; bórok le nini samni sandai bwrwi se, omo samung hamya khlaima klai-o.

¹⁸Nini hik kwthang tong sak nwprangjwkno hik ta song di, abo kebengmung wngwi bachanai.

¹⁹“Bwrwi tangwi man ya wngmani jora-o bini sakni ríno ta khuk di.

²⁰Nwng nini nok ari-o tongnaini hik bai thu lai-chá lai wngwi sakno sumsogo ta khiklai di.

²¹Nwng nwsarokni bere khoroksa swkno Molek mwtaini thani sógwi yaphar rwui nini Kaitorni mungno ta dera rw di: Ang se Subraiyung Kaitor.

²²Bwrwi bai chwla thu lai tẃi khe chwla bai chwla ta thu lai di; abo selengmasingcha.

²³Nwng mungsa swk mal-matarok bai thu-ui sakno kwthar ya ta khlai di, khoroksa swk bwrwi bo abo hai kheno mal-matarok bai thunani ta tháng thung. Abo sumsokni samung se.

²⁴“Norokni bisingo omorok mungsa swk samung bai gwdalwi sumsok ta khlai di. Tamni hwn ba ang o dopharokno norokni bwskangni hakchal khlainai, bórok omo tẃi samung khlaiwi kwthar ya wng kha; tei bórokni ha lagate se kwthar ya wng kha.

²⁵Ha suda se kwthar ya wng kha; hakhe ang bórokno yagul sunai tei bórokni samung cha yani bagwi hani borokrokno aroni kwbaui kariui rohornai.

²⁶Tamo khe nwng ani raidarokno tei dagimungrokno khnaui tong di, phiya abo hai samung hamyarok ta tang di, norokni sakni borok phano eba phatarni borok phano norokni bisingo abo hai khe ma tongnai.

²⁷(Tamni hwn ba norok swkango tongbumani a hani borokrok se abo hai khe tong lai-o tei o habo kwthar ya wng kha.)

²⁸Ang sama tẃi tong ya khe a ha norokno bo kwbaui kariui rohornai, norokni bwskango kubun dopharokno kwbaui kariui rohorma hai khe norokbo kwthar ya wng khe abo hai khe rohorjaknai.

²⁹Tamni hwn ba khoroksa swk omo hai selengmasingcha tongmungrok tong khe a borok norokni bisingni hakchal khlaijaknai.

³⁰Aboni bagwi norok ani dagimarokno khwna di, phiya norok swkango omo hai selengmasingcha samung khlaimarokno khlaiwi sakno kwthar ya khlai tẃi ta khlai di. Ang’-no Subraiyung Kaitor.”