Read Kok Borok LEBI 19 Bible Online

LEBI 19 - Kok Borok bible

LEBI 19

¹Subraiyung Musino hai hwnwi sa kha,

²“Nwng Israil dophani bebak bosongno sa di, norok kwthar wng di, tamni hwn ba ang Subraiyung norokni Kaitor bo kwthar.

³Norok bebak sak sakni buma tei buphano bórom khlai di tei ani lenglama Sabat salno tẃiwi tong di. Ang’-no Subraiyung norokni Kaitor.

⁴Takjak mwtaino ta khulum di, eba norok sakni bagwi mwtai mangrok ta tak di: Ang Subraiyung norokni Kaitor.

⁵“Norok Subraiyungno kwrwng laimung rínogo barok phuru nini abono yachakjakna tẃi khe barok di.

⁶Norokni barokma salo eba teini salni bisingo abono chá baina nangnai; tei chá bai ya bára tong rwkmarokno nokha salthamni salo hóro sógwi khibi di.”

⁷Salthamni salo khoroksa swk phano abono kisa swk chá kha hwn khe abo selengmasingcha samung, abono yachakjak glak,

⁸tei khoroksa swk abono chá khe bo sakno bini cha ya chúk yano ma rujunai; tamo khe bo Subraiyungni kwthar manwino selengmasingcha khlai kha, a borokno bini dophani phataro tikhlai rwjaknai.

⁹“Norok panthorni mai ra phuru habani busuni maitangrokno ta ra di; tei karwi kabujakma maitangrokno ta thum di.

¹⁰Nwng nini angur barini karjak angur bwtháirokno ta thum di; tei angur bari-o kraijak bwtháirokno bo ta khocha di, nwng abono bigra khangra tei buini borokrokni bagwi yakarwi kabu di; Ang’-no Subraiyung norokni Kaitor.

¹¹“Nwng ta khok di, khoroksa tei khoroksano ta phemlok di tei kók tatal ta sa lai di.

¹²Hakhe norok ani mung bai ereng swmai ta tang di; abo nini Kaitorni mungno sitra rw-o: Ang’-no Subraiyung.

¹³“Nwng nini nok arini bororokno ta sátok di; tei bini manwino ta sekpro di; selengni samungni dormaino hor thu-ui phung ai jora rw yaui ta ton di.

¹⁴Nwng nathongrokno ta swrai di tei phularokni bwskango usta khujaknai manwirok ta bera di. Phiya ba nwng nini Kaitorno kiri di, ang’-no Subraiyung.

¹⁵“Nwng buj cha ya khe ta khlai di, bigrarokno sak nang ya ta khlai di tei gwnangroknobo ta kiri di, phiya ba nwng nini nok ari borokrokno kubui khe buj thum di.

¹⁶Nwng khunju bai khnamasing sakni bororokni bisingo haino sejaui ta berai di tei nini nok arino kebengwi ta bacha di. Ang’-no Subraiyung.

¹⁷“Nwng bwkha bising bising nini takhukno ta naisler di, phiya ba bórokni cha yano phunugui rw di, wng ya khe bini bagwi nwng sumsogo klai anw.

¹⁸Nwng nini bororokni bwsarokno ta joli di, eba yagul ta su di, tamo khe nwng sakno hamjak tẃi bóroknobo hamjak di. Ang’-no Subraiyung.”

¹⁹“Norok ani raida tẃiwi tong di, nwng nini mal-matarokno kubunni juda mal-matarok bai gwdal rwui bwsa ta bá rw di. Nini bari-o bwchlwi dalnwi ta sar di. Tei khutwng dalnwi sabuljak rí ta chum di.

²⁰“Khoroksa swk bai kái lai pandani bagwi kók sẃngjak abo tẃi selengjwk bai tei kubunni khoroksa swk bai tongmung cha yani bagwi sak gwdal khe bo’-no tongmung cha yani majra berjaknai. Bo butharjak glak, tamni hwn khe a bwrwi nokphangni yakni yók súk ya kho.

²¹A chwla kuthum laima rínokni duglamo Subraiyungni bagwi bini samung cha yani ma yapharnai, tamo khe a samungni bagwi pun mera masa ma tubunai.

²²Ochai Subraiyungni bwskango a samung cha yani ratharma mera bai bini sumsokno súcha anw. Tei abo bai bini sumsok nakarjak anw.

²³“Norok o ha-o habwi bwthái chánani bagwi podrepot buphang kái anw, aphuru a buphang bwtháirok chá maya hwnwi uansuk di, abo nokha bisik tham jora tẃi chá maya hwnwi kasujak tong thung, abono ta chá thung.

²⁴Aboni ulo nokha bisik brwini bisi-o buphangni bebak bwtháirok kwthar wngnai. Subraiyung lobjakna bagwi bini bumungwi yaphar di.

²⁵Phiya nokha bisik ba phuru khe nwng a bwtháirokno cháui mannai, abórokni bwtháibo kwbáng khe thái anw, ang nini Subraiyung Kaitor.”

²⁶“Nwng bwthẃi bai mungsa bahanno phano sabuluwi ta chá di, yapha naima eba thinangni kók samarokno loi ta khlai di.

²⁷Nini bokhorok buchukni bwkhnai ta sil di tei sak sakni khochai buchuk ta ra di.

²⁸Thwinai borokno uansugwi sak sakni bahan ta rachik di, eba bwsago mungsa swkni mukumu marini khait snamwi man glak, ang’-no Subraiyung Kaitor.

²⁹“Nwng nini nwsajwkno sak phalnai snamwi kwthar ya ta khlai di, wng ya khe ha-o sak phalnai kupulung wng anw tei ha-o samung hamya bai kupulung wng anw.”

³⁰Norok ani lenglama salrokno bórom khlai tong di tei ani noktharno bórom khlaiwi tong di, Ang’-no Subraiyung.

³¹“Norok burasa eba phola hamyarok bai kwrwngnairokni thani ta tháng di, hakhe bórok norokno sumsogo khiklainai. Ang Subraiyung norokni Kaitor.

³²“Norok borok chakra bwkhnai kuphurrokni bwskango achukjak tong khe bachaui bórokno bórom khlai di, tei nini Kaitorno kiri di, ang’-no Subraiyung.”

³³“Buini hani borok norokni ha-o norok bai baksa tong phai khe, norok bórokno ta sátok di.

³⁴Norokni thani norokni baithang hani borok haino norok bai baksa khe tong phainai buini hani boroknobo abo haino hamjak di. Tamni hwn ba Ijip ha-o norokbo buini hani borok wngwi tongbu kha, ang Subraiyung norokni Kaitor.

³⁵“Norok buj thum thani lokmani hilikmani eba uarmani su thani cha ya ta khlai di,

³⁶Norok sói-sói rwtajaknai tei rwta holong, sói-sói epha tei kaisa sói-sói hin bai su di, ang Subraiyung norokni Kaitor Ijip hani norokno tikhlaiwi tubunai.

³⁷Hakhe norok ani bebak raida dagimungrokno tẃiwi tong di tei bórom khlai di. Ang’-no Subraiyung.”