Read Kok Borok LEBI 2 Bible Online

LEBI 2 - Kok Borok bible

LEBI 2

¹“Khoroksa swk Subraiyungni thani bwthái bwchlwi yapharmung yapharna khe, abo kaham khe auan kwsap khlaijak ma wngnai; hakhe bo aro olib thok lunai tei satrai ma rwnai,

²tei Aron bosongni ochairokni thani abono ma tubunai. Hakhe chongjak ochai aroni mochomsa a sukhrupjak auan tei thok tei motom báhaino Subraiyungni thani yapharmani bebakni muituni mari khlaiwi háyá-o ma yapharnai. O chámung yapharmani báhai Subraiyung khá bai hamjago.

³Bwthái bwchlwi yapharmung tong rwkmarok khe Aron bai bwsarokni banta; abo Subraiyungni thani kwthar kuk sógwi yapharmani.

⁴“Tumungno auang halangwi yapharmani hwn khe, abo chuan kwrwi wngna nangnai. Abo auang súkjak tei olib thok bai buljak eba khe takjak saka-o olib thok bai phuljak, rwja khe takjak wngna nangnai.

⁵“Tumungno yapharmung auang abo kárai-o khlaijak hwn khe, abo chuan kwrwi tamo khe thok bai buljak bwthái bwchlwi sukhrupjak wngna nangnai.

⁶Nwng abono yaphar phuru khe swkagwi a saka-o thok ma lukhlainai, omo bwthái bwchlwi yapharmung.

⁷“Tumungno a auang kaham yapharmung abo kárai-o sóngjak hwn khe, abo olib thok bai bului snamjak wngna nangnai.

⁸A bwthái bwchlwini snamjak barokmungno nwng Subraiyungni thani tubunai tei ochaini thani yapharjak phurubo abono háyá-o boknai.

⁹Ochai a bwthái bwchlwi barokmungni muitu marino swkangni háyá-o sógwi baroknai tei Subraiyung abono motomjago.

¹⁰A yapharmungni bára tong rwkma bebakno Aron tei bwsarokni banta wngnai; abo belaino kwthar, tamni hwn khe abo Subraiyungni thani chámung yapharmani tong rwkmani.

¹¹“Norok aswk bwthái bwchlwi Subraiyungni thani yapharmarok chuan bului man glak; norok Subraiyungni thani sógwi yapharma-o chuan eba piya bwtwi bului man glak.

¹²Norokni tháiskangni bwtháirokno bisi brúmno Subraiyungni thani ma yapharnai. Tamo khe abo háyá-o sóknani bagwi ya.

¹³Norok bebak bwthái bwchlwi yapharmungno sóm bai ma bulnai tamni hwn khe sóm wng kha norok bai Kaitorni swmai tangmani mari (norok bebak yapharmung bai sóm ma bulnai).

¹⁴Subraiyungni thani norokni tháiskangni bwthái bwchlwi yaphar phuru, yógwi tei sukhrubwi ma yapharnai.

¹⁵Abono olib thok tei satrai bai ma bulnai, abo wng kha bwthái bwchlwi yapharma.

¹⁶Ochai a thok bai satrai buljak a sukhrupjak bwthái bwchlwino muituni mari hwnwi yapharnai, abo Subraiyungni thani sógwi yapharmung.