Read Kok Borok LEBI 20 Bible Online

LEBI 20 - Kok Borok bible

LEBI 20

¹Subraiyung Musino hai hwnwi sa kha,

²“Nwng Israil borokrokno tei bo sa di, Israilsarokni bere khoroksa swk phano, eba Israil ha-o phaiwi tong phainai buini borok phano khoroksa swk Molek mwtaini thani yaphar khe bo ma butharjaknai, o hani borokrok bo holong khitarwi butharjaknai.

³Ang sak baithang bini aroni mwkhang uphilnai tei bono bini sakni bororok bai swkaknai, tamni hwn ba bo Molek mwtaini mungwi bini bosongni chwrairokni bere khoroksano yaphar kha, tei bo ani nokthar bai ani mungno sitra rw kha.

⁴Molek mwtaini thani bwsa barogwi tong phuru tumung hani bororok abono nuk twtwi nuk ya khe tongwi a baroknaino butharwi khibi ya khe,

⁵hakhe ang bini tei bini núkhungni tei aroni ani mwkhangno uphilnai, bo tei bo bai baksa tongwi Molek mwtai bai uaijanairokno ang Israil dopharokni bisingni sokomorwi páinai.

⁶“Khoroksa swk phola hamyarok bai kwrwng rwnai eba kók mwtai sanairok bai kwrwngwi sak gwdal khe ang a borokno kebengnai tei bo bini sakni borokni bisingni swkakjaknai.

⁷Hakhe nwng sakno kwthar khlai di; tamni hwn ba ang nini Subraiyung wng kha kwthar.

⁸Ani dagimungrokno tẃi ton di tei khnaui tong di; tamni hwn ba ang se norokno kwthar khlainaisa Subraiyung.

⁹Buma buphano swrainai borokrok butharjakna nangnai; tamni hwn ba bo bini buma eba buphano swraiwi bini sak sakni thẃi-o se abono khiklaima klai-o.

¹⁰“Tumungno khoroksa swk bini nok arini bihik bai thu lai-chá lai wng khe a uaijanai khoroknwirok’-no ma butharjaknai.

¹¹Chwla khoroksa swk bini matoi bai thu lai khe bo buphano se sak-lánga khlaima klai-o; bórok khoroknwino butharjakna nangnai, borokni thẃi borokni saka’-ono klainai.

¹²Tumungno chwla khoroksa bini hamjwk bai thu khe bórok khoroknwi’-no butharjakna nangnai, tamni hwnma le bórok tongma ya tongmung tong kha, borokni thẃi borokni saka’-ono klainai.

¹³Tumungno chwla khoroksa tei khoroksa chwla bai bwrwi bai tongma hai khe thu lai-chá lai khe bórok khoroknwi’-no selengmasingcha samung tangma klai-o; hakhe bórok butharjakna nangnai, bórokni thẃi bórokni saka’-ono klainai.

¹⁴Tumungno chwla khoroksa, bwrwi khoroksano hik songwi tei a bwrwini bumanobo hik khlai khe abo samung sitra hwnwi romjago; bórok hóro sógwi khibijaknai, norokni bodolo omo hai samung sitrarok ta tong thung.

¹⁵Tumungno chwla khoroksa, masa swk malrok bai thu khe a borok ma butharjaknai tei nwng a malroknobo butharwi ma khibinai.

¹⁶Tumungno bwrwi khoroksa swk malrok bai thu laina tháng khe nwng a bwrwino tei a malno butharwi khibi di, bórok butharjakna nangnai, borokni thẃi bórokni saka’-ono klainai.

¹⁷“Chwla khoroksa swk tumungno bini achaisongrokni bere bwrwi khoroksa swkno na khe abo buphani bosong phano eba bumani bosongrok phano wng thung bo abo hai khlaima bai sakno se sak-lánga khlaima klai-o, abo lachimasingcha samung, bórokni borokrok bai swkakjaknai. Bo bini bukhukno sak-lánga khlaima klai kha, bo bini majra ma rujunai.

¹⁸Tumungno chwla khoroksa swk rí sú-ui tongjak bwrwi bai thu lai khe bo bono sak-lánga khlai khe, hakhe a chwla a bwrwino teibo kwchak kuluk rwma klai-o, borok khoroknwi’-no borokni bororok bai swkakjaknai.

¹⁹Nwng nini nwmani bukhukno eba nwphani bukhukno rí khugwi sak-lánga ta khlai di, abo bai nwng nini samni sandairokno se sak-lánga khlaima klai-o; bórok bórokni majrano mannai.

²⁰Tumungno chwla khoroksa swk bukhrijwk bai thu lai khe, bo bukhrano se sak-lánga khlaima klai-o, bórok bórokni sumsok ma rujunai, bórok bwsa kwrwi khe ma thwinai.

²¹Tumungno chwla khoroksa swk bini takhukni hikno na khe, abo le sumsok se; bo bini takhukno se sak-lánga khlaima klai-o, bórok bwsa kwrwi khe ma tongnai.

²²“Nwng ani dagimungrokno omo tẃi khe tẃi ton di tei khnaui tong di, ang nono rwna hwnmani a hani omo hai khe nwng kwbaui kariui rohorjak glak.

²³Ang norokni aroni rwkhlai rohorna nai tongmani bisingrokni tongmung chámung hai khe ta tong di, tamni hwn ba bórok le abo hai tongmung tong lai-o aboni bagwino ang bórokno seleng kha.

²⁴Tamo khe ang nono hai hwnwi ma sa-o, ‘Nwng bórokni hano mannai, ang norokno a dut bai piya bwtwi kochokjak hano rwnai, ang’-no nini Subraiyung Kaitor, nono tei kubun borokrok bai swkagwi tubunaisa.’

²⁵Aboni bagwino nwng kwthar tei kwthar ya malrokno tei tokrokno khak di, nwng sakno malrok eba mungsa swk tokrok eba khe ha-o malnairok tei yóngsa kúksarokno kwthar ya hwnwi khakjakrok bai nwng sakno selengmasingcha ta khlai di.

²⁶Nwng ani bagwi kwthar wng di, tamni hwn ba ang nini Subraiyung wng kha kwthar tei ang nono ani borok wng rwna bagwi kubun bororok bai khak kha.

²⁷“Tumungno chwla phano eba bwrwi phano pholarok bai kwrwng rwnai eba swkal wng khe bo ma butharjaknai, bórok holong khitarwi butharjaknai, bórokni thẃi bórokni saka’-ono klainai.”