Read Kok Borok LEBI 21 Bible Online

LEBI 21 - Kok Borok bible

LEBI 21

¹Subraiyung Musino hai hwnwi sa kha; “Aronni bwsla ochairokno sa di, bórokni bisingni khoroksa phano sakni borok thwima bagwi kwthar ya wng glak.

²Bini ganani sandai, buma, bupha, bwsla, bwsajwk, buphayung,

³eba bini sikla hanok (a bwrwi bini sandai kuk tamni hwnma le bo káijak ya kho, hakhe bo abo bai sakno kwthar ya khlaiwi mano) thwi khe bo kwthar ya wngnai.”

⁴Bo bini borokrokni bere bokhorok hwnwi sakno kwthar ya khlai ta dera rw thung.

⁵Bórok bórokni bokhorok ta sil thung tei khochai buchukbo ta ra thung, eba sakni bahan ta ra thung.

⁶Bórok sakni Kaitorni bagwi kwthar ma wngnai tei bórokni Kaitorni mungno hamya ta khlai thung, tamni hwn ba bórok Subraiyung Kaitorno sógwi yapharmungrok chámungrok yapharo aboni bagwino bórok kwthar ma wngnai.

⁷Bórok sak phalnaijwk eba baliknaijwkrokno ta káijak thung, eba bwsai bai kakjak bwrwino ta káijak thung. Tamni hwn ba ochai wng kha bini Kaitorni thani kwthar.

⁸Aboni bagwino nwng bono kwthar khe ma tonnai, tamni hwn ba bo nini Kaitorni thani chámung barogo, bo nini thani kwthar khe ma tongnai, tamni hwn ba ang’-no Subraiyung nono kwthar khlainai Kaitor.

⁹Hakhe ochai khoroksa swkni sajwk tumungno sakno tongmung bijla tongwi kwthar ya khlai khe bo buphanobo kwthar ya khlaima klai-o, bono hóro sógwi ma khibinai,

¹⁰“Norokni takhuksongni bisingo ochai bokhorok thok phulwi chongthar chongjak phiya baithangni yak bai ochaini kwthar rí-chum chumnani phan rwjak, bo sakni bokhorokni bwkhnai khengklai ta tong thung tei sakni ríbo ta chir thung;

¹¹bo kwthwirokni samo thángwi sakno kwthar ya ta khlai thung, sakni ma-phani bagwi phano bo abo tẃi khe sakno kwthar ya ta khlai thung.

¹²Hakhe háyá kwtharni phataro ta tháng thung. Abo hai khe sakni Kaitorni háyáno kwthar ya ta khlai thung tamni hwn ba bini Kaitorni chongthar chongmani thok bini saka-o tongo, Ang se Subraiyung.

¹³Bo kwthar siklajwkno se ma káijaknai.

¹⁴Randijwk, eba kak laijak bwrwi, eba bwrwi baliknai eba khe sak phalnai bwrwirok bai ma káijak glak, tamo khe bo sakni borokrokni bisingni bwrwi sikla kwthar bai se káijak thung;

¹⁵abo hai khe bo sakni borokrokni bisingo kwthar ya wng glak. Tamni hwn ba ang se Subraiyung Kaitor.”

¹⁶Hakhe Subraiyung Musino hai hwnwi sa kha,

¹⁷“Aronno hai hwnwi sa di norokni bosongni bisingo khoroksa swkni bwsago hamya mari tong khe bo bini Kaitorno barogwi yapharna hwnwi ta seder thung.

¹⁸Khoroksa swkni sago hamya gwnang khe bo samo ta seder thung, khoroksa phula eba yakung yak man ya eba mwkhang kosokni khait gwnang khe eba bahan bára gwnang khe,

¹⁹khoroksa swkni yakungo kwsa gwnang khe eba yago kwsa gwnang khe,

²⁰phikungo budul gwnang guja wng khe, lukuboniya wng khe, mokolni bemuk gwnang wng khe, motókma bemuk eba khaichuak gwnang wng khe tei sákolom bwchlwi

²¹kukhrupjakrok khe omo tẃi mungsa swk khait gwnang borokrok Aronni ochai bosongo tong khe bo Subraiyungno sógwi yapharmung yapharna bagwi samo sederwi ta phai thung. Sago khait gwnang wngwi tong khe bo bini Kaitorno chámung yapharwi barokna hwnwi samo sederwi phai man glak.

²²Bo bini Kaitorno barokma chámung kwthar kuk manwirok cháui mannai,

²³tamo khe bo rí swngjak samo ta phai thung eba háyáni samo ta tong thung, tamni hwn ba bo khait gwnang, bo abo hai khlaiwi kwthar háyáno kwthar ya ta khlai thung tamni hwn ba ang se Subraiyung Kaitor háyáno kwthar khlainai.”

²⁴Hakhe Musi Aronno tei bini bwsarokno tei Israilsarokno omorokno sa kha.