Read Kok Borok LEBI 22 Bible Online

LEBI 22 - Kok Borok bible

LEBI 22

¹Hakhe Subraiyung Musino hai hwnwi sa kha,

²“Nwng Aron tei bwslasongno sa di, Israilni bwsarok ani bagwi kwthar khlaimani manwirokno bórom khlai tong di. Tamni hwn ba abórok ani thani bokjak, hakhe aboni bagwi bórok ani mung kwtharno ta sitra rw thung. Ang se Subraiyung.

³‘Bórokno hai hwnwi sa di, kusung kusung khoroksa swk norokni bosongni bisingo kwthar ya twtwi Subraiyungno yapharjak a manwirokni samo tháng khe, a borok ani bwskangni norjaknai. Ang se Subraiyung.

⁴Aronni bosongni khoroksa swk biyadi gwnang khe eba sákolom tẃi choromjak khe bo kwthar wng ya sak jora bo o kwthar manwino ta chá thung.

⁵Tei khoroksa swk yóngsa-kuksarok tangwi kwthar ya wng khe eba abo hai khe tongwi kwthar ya wngjak borokno tangwi kwthar ya wng khe,

⁶abo bai bórok sal hap ya sak jora kwthar ya wngwi tongnai tei bo twi bai tuku ya hwn khe a kwthar manwirokno ta chá thung.

⁷Sal hap khe bo kwthar wng phinai tei aboni yagulo bo a kwthar manwirokno cháui mannai, tamni hwn ba abórok bini chámung.

⁸Mungsa swk ahaino thwijak eba mal-matarok bai uátharjagwi thwimarokno ta chá di, abo hai khe sakno kwthar ya ta khlai di. Ang se Subraiyung.’

⁹Abo hai kheno bórok ani dagimarokno khnaui tong thung, abo hai khe sitra rw khe bórokni sumsokni bagwi bórok ma thwinai se. Ang’-no Subraiyung bórokno kwthar khlainai.

¹⁰“Kubun phatarni bosong khe a kwthar manwirokno ta chá thung. Ochai bai tongwi tong phainai eba pai tubujak selenngrok kwthar manwino cháui man glak.

¹¹phiya ba ochai bini sakni rang bai khoroksa swkno pai khe a selengbo a bono cháui mannai tei bini núkhungo achainai bebak borokno abono cháui mannai.

¹²Tumungno ochaini bwsajwk kubun bosongni borok bai káijak khe bo a kwthar manwirokno ma chá glak tei barogwi bo man glak.

¹³Tamo khe ochaini bwsajwk randi eba kak laijak wng khe tei bwsa kwrwi wngwi buphani nogo kiphilwi phaiwi sikla hai khe tong phai khe bo buphani a chámungno cháui mannai; phiya ba phatarni khoroksa swk borok khe abono ma chá glak.

¹⁴Hakhe tumungno a kwthar chámungno sislap yaui chá trwng khe bo a kwthar manwini aboni tei bakba khe su-ui ma rw phinai; bo abórokno ochaino ma rwnai.

¹⁵Bórok Israilrokni manwi kwthar Subraiyungno yapharmarokno ta sitra rw thung;

¹⁶tei abo hai khe kwthar manwirokno cháui sitra rwma bai a majrani ma yók glak. Tamni hwn ba ang se Subraiyung nono kwthar khlainai.”

¹⁷Hakhe Subraiyung Musino hai hwnwi sa kha,

¹⁸“Aron bai bini bwslasongno tei Israilrokno hai hwnwi sa di, khoroksa swk Israilni núkhungni eba khe bini núkhungo phatarni tong phainairok sógwi yapharmung yapharna khe abo bwkha phurjagwi eba khe chákjak tongmano mánwi yapharna khe a mal mungsa khait kwrwi ma wngnai.

¹⁹Phiya abo khait kwrwi musuk chwla eba mera eba khe punjuano ma yapharnai.

²⁰Nwng mungsa swk khait gwnang manwino ta yaphar di, tamni hwnma le abo hairokno nwng yachakthai kwrwi.

²¹Hakhe nwng khá srangwi Subraiyungni thani ratharwi yaphar phuru, chakjak yapharmung eba khá phurwi yaphar phuru musuk-mera bodolni yachakjakna tẃi khe kaham kukno na di, aboni mungsa khait kwrwi wngna nangnai,

²²phula, eba himwi man ya, bahan robokjak, bahanni bwtwi choromjak khaichuak motók gwnang khe Subraiyungni thani hóro sógwi háyá-o ta yaphar di.

²³Musuk chwla eba mera belai biya kolok eba khe belai bara abo hairokno nwng khá phurwi yaphar phuru yaphar mannai tamo khe chakjak seplena bagwi hwn khe omo yachakjak glak.

²⁴Mungsa swk malni sakchwlwi sukhrupjak, swplajak eba kwsa gwnang hwn khe nwng abono Subraiyungno ta yaphar di eba khe nini ha-o abono ratharwi ta barok di.

²⁵Abono phatar hani borokni aroni manmano norokni Subraiyungni chámung khlaina bagwi norok ta barok di, tamni hwnma le abórok khait gwnang, abórokni kosok tongmani bagwi yachakjak glak.”

²⁶Hakhe Subraiyung Musino hai hwnwi sa kha,

²⁷“Musuk, mera eba khe pun achai phuru abórokni bwsarok nokha salsni jora buma bai ma tongnai; tei nokha salcharni simi khe abórokno Subraiyungni thani hóro sógwi yapharna chúknai.

²⁸Musuk eba pumarokno abórokni bwsarok bai baksa salsani salo maknwino’-no ta buthar di.

²⁹Nwng Subraiyungni thani hambai rwi yaphar phuru abórok yachakjakna tẃi khe yaphar di;

³⁰abórokno a salo’-no cháui pái di. Nwng abono teini salni phung ai jora ta narwk di. Ang Subraiyung Kaitor.

³¹“Hakhe nwng ani dagimungrokno khna di; Ang’-no Subraiyung.

³²Nwng ani mung kwtharno ta sitra rw di. Tamo khe ang Israilsarokni bisingo kwthar khe hambai rwui bórijaknai. Ang Subraiyung se nono kwthar khlainai.

³³Nini Kaitor wngna bagwi Ijip hani tikhlai tubunai; ang se Subraiyung.”