Read Kok Borok LEBI 24 Bible Online

LEBI 24 - Kok Borok bible

LEBI 24

¹Subraiyung Musino hai hwnwi sa kha,

²“Nwng Israilrokno hai hwnwi dagiui sa di, bórok chati mwchẃngna bagwi olib thok kaham na thung tei a chatino chẃngjak máng khe ton thung.

³Aron kuthum laima ríni nokni swmai bokhok ton thani rí swngjakni phataro sanjani simi teini phung ai jora Subraiyungni bwskango abórokno jai jai khe ma tonnai, omo norokni bagwi kusung kusungni khlaithai raida wngnai.

⁴Bo a kwchẃng rangchak sóini chati thopnano Subraiyungni bwskango ton phlai ma tonnai.

⁵“Nwng moida kaham naui aboni auang lepchinwi snam di a auang lepsa epha kaisani chi-o khaknwi ma wngnai.

⁶Hakhe nwng abórok berem remnwi khe khlaiwi remsa-o remdok khlaiwi rangchakni songphang saka-o jai jai khe bera di.

⁷Berem thwgwi satrai kaham bo rw di; abono a auang bai khe muitu khlaiwi Subraiyungno sógwi yaphar di.

⁸Aron Sabat sal brúm brúm Subraiyungni bwskango Israil dopharokni bagwi cho phlai ya khe ma tẃinai tei omo bórokni swmai tangma wngnai.

⁹Tei Aron bai bini bwsarokni bagwi wngnai, hakhe bórok abono a kwtharo ma chánai tamni hwn ba o kwthar kuk banta Subraiyungno hóro sógwi ma yapharnai.”

¹⁰Hakhe tabuk chwrai khoroksa bini buma khe Israiljwk, tei bupha khe Ijipsa, bathamni phataro Israilni bwsarok bai tháng kha, abo hai khe bathamo Israiljwkni bwsla bai Israilsani bwsla uálai lai kha.

¹¹Hakhe Israiljwkni bwsla Subraiyungni mungno hamya sa kha tei swrai kha. Hakhe bórokno Musini thani tubujak kha bini bumani mung khe Selomit, bo Dan bosong Dibrini bwsajwk.

¹²Bórok bono Subraiyung abono tẃiwi sakhlai ya sak jora alongo chobwi ton lai kha.

¹³Hakhe Subraiyung Musino hai hwnwi sa kha,

¹⁴“A swrainaisano bathamni phataro kariui tubu di tei bo samano khnanairok bini bokhorogo yak bera thung, hakhe Israilni mothani borokrok bono holong khitar thung.

¹⁵Israilsarokno hai hwnwi sa di, Kaitorno swrainairok a sumsokno sma rujunai.

¹⁶Subraiyungni mungno hamya sanairok butharjaknai; Israil motha bebakno bono holong khitarnai, bini bisingo tong phainairok tei sakni borokrok phano bini mungno swrai khe ma butharjaknai.

¹⁷Borok butharnairok bo ma butharjaknai.

¹⁸Khoroksa swk yabrwino buthar khe bo abono ma su phinai, langmani bagwi khe langma’-no.

¹⁹Tumung khoroksa swk bini sakni borokno bwsago kwsa khlai khe bo khlai tẃi’-no bo’-bo khlaijaknai,

²⁰bekreng swbai khe bekreng, mokolni bagwi mokol, buani bagwi bua, bo borokno sitra rwma hai bo’-bo abo hai kheno sitra rwjaknai.

²¹Yabrwino buthar khe bo abono su-ui ma rwnai, borokno buthar khe bo’-bo ma butharjaknai.

²²Norokni bisingo phatarni tong phainairok tei sakni borokrokni bagwi kaisa dagimungno wngnai; ang nini Subraiyung Kaitor.”

²³Hakhe Musi Israilsarokno o kókno saui khna rw kha tei a swrainaino bathamni phataro kariui tubu-ui holong khitar lai kha, abo tẃi khe Israilsarok Musino Subraiyung dagima hai khlai kha.