Read Kok Borok LEBI 25 Bible Online

LEBI 25 - Kok Borok bible

LEBI 25

¹Subraiyung Musino Sinai hathái-o hai hwnwi sa kha,

²“Israilsarokno hai hwnwi sa di, ang nono rwna hwnmani ha-o sók phai khe Subraiyungni sabat habo lengla thung.

³Nokha bisi dok nwng nini ha-o bwchlwi káiwi hukba khlai di, nokha bisi dok nwng angur bari khlai di tei aboni bwthái khak di;

⁴tamo khe nokha bisi sni-o khe kwchang kwchang khe hano Subraiyungni bagwi sabatni lenglamung leng rw di, nwng aphuru kheto-o tabo ta kái di, tabo ta tang di.

⁵Nwng nini ha-o ahaino bachamani mai khulrok ta ra di tei tangjak ya angurnobo ta khak di; a bisi khe hani bagwi lengma bisi wngnai.

⁶Sabat bisi-o khe kheto-panthoro ahaino achaiwi tháimarok nini seleng-selengjwkrokni tei norokni thani paiwi tubujak kubun dopharokni phiya kubun bororokni bagwi,

⁷nokni tei bolongni yabrwirokni chámung wngnai. Aphuru kheto-panthoro tháimarokno nini chámung wngnai.

⁸“Nwng nini bagwi kaisni lenglamung bisi nokha bisi sni máng bisi sni lekha di hakhe nini a lekhamani bai nokha bisi sni máng bisi sni wngwi nokha bisi brwichichuku kánai.

⁹Aphuru nokha talsnini salchini salo khe sumsok súmani salo khorang kotor khlaiwi totro tam di abo hai kheno ha gwnangwi totro tam di.

¹⁰Nokha bisi bachini bisino khe kwthar khlai di tei ha gwnangwi tongnairokno yókjak hwnwi sakhlai rw di; a bisi khe jubili bisi wngnai tei norokni borokrok sak sakni manthaino kiphilwi rwjaknai hakhe khoroksa khoroksa sak sakni núkhungo kiphilnai.

¹¹Nokha bisi bachi khe nini bagwi jubilini bisi wngnai; nwng a bisi-o mai khulrok ta kái di tabo ta ra di, aphuru nwng angur bari ta tang di tei bwtháirokbo ta khak di.

¹²Tamni hwn ba omo khe jubilini bisi, omo nini bagwi kwthar wngnai, norokni ha-o wngmani muikwthwng-tháikwthwngrokno norok ma chánai.

¹³“O Jubilini bisi-o norok sak sakni manthairokno kiphilwi mannai.

¹⁴Hakhe tumungno nwng nini sandairokni mungsa swk pai khe eba phal khe khoroksa tei khoroksano ta bandi lai di.

¹⁵Nwng Jubili bisi páiwi bisi lekhaui sandairokni thani pai di tei phal di.

¹⁶Tumung bisirok báng rw rwk khe morokmabo báng rw rwknai, phiya bisirok kisa hwn khe abobo kisa wngnai; nini bagwi barini bwthái bumuk tháimani bisino rwksaui ma lekhanai.

¹⁷Norok khoroksa tei khoroksani thani cha ya ta khlai lai di, tamo khe nini Kaitorno se kiri di; tamni hwn ba ang nini Subraiyung Kaitor.

¹⁸“Aboni bagwi nwng ani dagimungrokno tẃiwi ma tongnai tei ani raidarok bai kerongrokno rákhogwi ma tongnai abo hai khe nwng tongmani ha-o kirima kwrwi khe tongwi mannai.

¹⁹A ha-o bwthái kaham ma tháinai, nwng abono ok pungwi cháui mannai tei a ha-o kirima kwrwi khe tongwi mannai.

²⁰Tumungno nwng, ‘Chwng kabo kái ya rabo ra ya, hwn khe a bisi-o tamono chánai?’ hwnwi sa khe,

²¹hakhe ang nokha bisi dokni bisi-o norokno hamari rwnai tei aphuru mai-khulrok nokha bisik tham romwi kaham khe tháinai.

²²Abo láiwi nokha bisi charni bisi-o khe mai khul kái di, nwng bisichuku jora nwng a swkangni mai khulrok ma chánai; kwtal khe mai khul wng ya sak jora swkangnirokno cháui ma tongnai.

²³“Nwng nini hano phalsugwi man glak, tamni hwn ba ha le ani se. Norok ang bai baksano phatarni tong phainaisa se.

²⁴Norok manmani hano bebakno phiyógwi rw di.

²⁵“Tumung nini takhuk bigra khaui kisa swk ha phal khe bini a sandai a phaljak hano bini a takhukno kiphilwi rw thung.”

²⁶Tamo khe tumungno a borokni sandai-masak kwrwi phiya bo gwnang wngwi a hano kiphilwi na phina chúk khe

²⁷bo phalmani bisino lekhaui painaino tei rang bára rwui kiphilwi rw thung.

²⁸Tamo khe bo abono kiphilwi nanani chúk ya wng khe a phalma ha Jubili bisi jora a painaini thani tongnai tamo khe Jubili bisi-o khe abono kiphilwi ma rwnai.

²⁹“Tumungno khoroksa swk chokdeual gwnang kamiyung bisingni nok phal khe bo phalma bisini páithak bisi-o abono yakarwi ma rwnai; nokha bisi kaisa romwi bo abono phiyókna bagwi sep mannai.

³⁰Tumung nokha bisi kaisani bisingo abo phiyókjak ya khe chokdeual bisingni kamiyungni nok a painaini’-no wngwi páinai tei abo kusung kusung romwi bini bosongni’-no wngnai; abo Jubilini bisi tei phiyókjak glak.

³¹Tamo khe kamini chokdeual rwjak bisingo tongmani nokrok a hani hwnwi romjaknai; Abórokno phiyógwi mannai tei Jubili phuru abórok yók bainai.

³²Tamo khe Lebirok tongmani kamiyungrok, bórokni nok núkhungrok khe nai phuru’-no phiyókna mannai.

³³Tumungno khoroksa swk Lebi bini phiyógwi manthaino na ya khe, hakhe a kamiyungni phalwi rwmani nokrok Jubili phuru yók bainai, tamni hwn ba kamiyungni Lebisongni nokrok Israilrokni bisingo bórokni manthai.

³⁴Tamo khe kamiyungni bórokni haphar nokno ma phal glak; abo khe bórokni kusung kusungni babwi.

³⁵“Tumungno nini takhuk bigra wngwi nini mokolo nwng bai baksa wng ya wngwi tong khe bini kaham khlai di; bo nini aro phatarsa hai khe nwng bai tongnai.

³⁶Bono rang solok rw khe rangni bwsa ta na di, tamo khe nini Kaitorno se kiri di, abo hai khe nini takhuk nwng bai baksa tongwi man anw.”

³⁷Nwng bono rang bwsa manna hwnwi rang solok ta rw di tei chámung kwbáng khe kiphilwi manna bagwi chámung solok ta rw di.

³⁸Ang nini Subraiyung Kaitor, nini Kaitor wngna bagwi Ijip hani kariui tubu-ui Kanan ha-o tubunaisa.

³⁹“Tumungno nini takhuk bigra khaui bini sakno nono phal khe bono paijak selengrok hai khe ta nuk di.

⁴⁰Bo nini aro mula hai khe tang thung eba phatarsa hai khe tong thung, bo Jubili bisi jora nono monwi ma tongnai.

⁴¹Abo pái khe bo nini aroni yóknai tei bini bihik bwsarok bai khe bini núkhungo kiphilnai tei bini buphani manthairokno kiphilwi man bainai.

⁴²Tamni hwn ba bórok wng kha ani selengrok, borokno ang Ijip hani kariui tubu kha, bórokno seleng hai khe phalthai kwrwi.

⁴³Nwng bo bai tungphlajak ta wng di, tamo khe nini Kaitorno se kiri di.

⁴⁴Nwng nini yaksi yagrani borokrokni aroni seleng selengjwkrokno tonwi mannai tei bórokni bisingni’-no seleng selengjwkrok paiwi mannai.

⁴⁵Nwng norokni bisingo tong phainai phatarsarokni bisingni tei aro achai phainai bórokni bwsarok nini wng bainai.

⁴⁶Nwng nini ulni bwsarokni manthaino bórokno bogwi rwui mano tei nini sal brúmni khlaithai samungrok bono khlai rwui mannai. Tamo khe nini takhuk Israilsarok bai nwng tungphlajak hai khe ta tong di.

⁴⁷“Tumungno norokni bisingo tong phainai phatarsarok gwnang wng khe tei bini samni nini takhuk bigra chaui nini thani eba nini samo tongnai phatarsani aro sakno phal khe

⁴⁸bo phaljagwi páiwi ma phiyókjaknai, bini takhuksongni bere khoroksa swk bono ma phiyóknai,

⁴⁹bini bukhra eba bini takhukni bwsa eba bini sandai masa swk bini núkhungni ma phiyóknai eba tumungno bo baithang gwnang wngwi phai khe sakno ma phiyóknai.

⁵⁰Bo a phalmani bisini simi Jubili bisi jora painaino lekhaui abono ma rwnai; bini thani tong phuru abo rang bai mula manma hai khe wngnai.

⁵¹Tumungno Jubili bisi kánani kisa swk tong khe hakhe bo a bisirokno lekhaui aboni rwthaino rwui phiyók thung.

⁵²Tumungno Jubili bisi kánani kisa swk tong rwk khe bo a kisa swk bisirokni rwna nangma swk kiphilwi rwui ma phiyóknai.

⁵³Bisi thwgwi mula narwkjak hai khe ma tangnai nwng bo bai tung phlajak khe ta tong di.

⁵⁴Tumungno bo a bisi-o yók ya hwn khe Jubili bisi-o bini bwsarok bai baksa phiyókjaknai.

⁵⁵Tamni hwn ba Israilsarok ani’-no seleng, ang ani selengrokno Ijip hani kariui tubu kha. Ang’-no Subraiyung Kaitor.