Read Kok Borok LEBI 26 Bible Online

LEBI 26 - Kok Borok bible

LEBI 26

¹“Nwng sakni bagwi mwtairok ta tak di eba tankhurwi thonglarogo mwtai mang ta snam di tei nwng nini ha-o khulumnani bagwi holong bai mwtai mangrok ta songcha di, tamni hwn ba ang nini Subraiyung Kaitor.

²Nwng ani Sabatrokno tei noktharno bórom khlai di. Ang’-no Subraiyung.

³“Tumungno nwng ani dagimarok tẃi tong khe, ani raidarokno narwk khe,

⁴hakhe ang norokno jora-o uatwi ua rwnai tei ha-o kwbáng ma khe mai khulrok thái rwnai.

⁵Hakhe nwng mai nakmani cho yaui angur pheremani jora tei angur pheremani khe mai kainani jora tongnai, nwng ok pungwi mai ma chánai tei nini ha-o kirima kwrwi khe ma tongnai.

⁶Hakhe ang ha-o tong kwchang tubunai tei nwng thu phuru-o nono khoroksa phano sikiri sokro khlai man glak; tei ang norokni hani bolongni uátharnai mal-matarokno hakchal khlainai tei norokni ha-o seng tisajak glak.

⁷Nwng nini kebengnai arirokno riphrigwi rohornai, nini bwskango bórok seng saka-o klai bainai.

⁸Norokni khorokba bórokni khoroksarano riphrigwi rohornai tei norok khoroksara khe khorokchisaino riphrigwi rohornai tei norokni kebengnai arirok nini bwskango seng saka-o klai bainai.

⁹Hakhe ang norokni saka-o khá hamjaknai tei norokno bwsa kwbángma er rwui bosong kwbángma khlainai, hakhe norok bai ani swmaino narwknai.

¹⁰Hakhe norok norokni khatijak kwcham chámungno chánai tei kwtal chámungrokni bwskango kwchamno karinai.

¹¹Ang norok bai tongnai ani phola norokno naisler glak.

¹²Ang norok bai tháng phai khe tongnai tei ang nini Kaitor wngnai, norok khe ani bororok wngnai.

¹³Ang’-no Subraiyung nini Kaitor nono bórokni seleng ta wng thung hwnwi tei ang nini bangorani horbakno nanai. Subraiyung nini bisma kepleng khe bachaui himnani bagwi ha Ijipni phiyógwi tubunai.

¹⁴“Phiya ba tumungno norok ani kók khna ya hwn khe, ani dagimungrokno rákhok ya hwn khe,

¹⁵ani raidano swbaiwi ano bórom khlai ya hwn khe

¹⁶ang norokno ahaino khlainai: Ang norokno achomsa sikirinai, rangma hángcha rwui kwlwibraui lum rwnai, nwng mokol nuk tha ya wngnai langma-o sajakma gwnang khe ma tongnai, nwng bwchlwi kaimarok chúk glak tamo khe nini kebengnai arirok se abono ma chánai.

¹⁷Ani mwkhangno norokni aroni uphilwi tubunai, hakhe norok norokno kebengnai arirok bai swpragwi leng rwjaknai, norokno naislernairok norokni bugra wngnai, norokno khoroksa swk riphrik ya phano norok ma khárnai.

¹⁸Hakhe norok omo swk bai phano ani kókno khunju kai ya khe, hakhe ang norokni sumsokni bagwi tei kusungchi sátokmung tubunai,

¹⁹ang norokni kung chukma phanrokno swbainai, norokni nokha khe sor hai wngnai, ha khe pitol hai wngnai;

²⁰nwng nini phanno chúkya-o rohornai, tamni hwn ba norokni ha-o mai-khul wng glak hani buphangrok bo bwthái thái glak.

²¹“Hakhe tumungno nwng ang samani kókno kebengwi him kha hwn khe ang norokni sumsokni bagwi tei kusungsni hamya cha ya tubunai,

²²tei ang norokni aro bolongni mal-matarokno rohornai abórok norokni bwsarokno bangkhárnai tei nini nokni mal-matarokno dera rwui sokomorwi abórokno báng tha ya khlai páinai, hakhe se nini lama lamtwngrogo borok kwrwi wngnai.

²³“Tumungno nwng omo tẃirokno manjagwi lagate khá si ya wngwi ani lamani phérwi him khe,

²⁴hakhe angbo norokno phérwi thángnai tei ang baithang norokno norokni sumsokni bagwi tei kusungsni swprknai,

²⁵hakhe ang norok kerong swbaimani bagwi norokni saka-o seng tisa rwnai tei tumungno norok sak sakni kamiyungrogo kuthum lai khe ang aro bok tubunai tei norokno norokni kebengnai arirokni yago yapharnai.

²⁶Ang norokni chámungno mwthaknai, norokni bwrwi khorokchirok thapa khorsa-o auang ma hangnai tei abono rwtaui ma boknai phiya ba nwng abono cháui ok pung glak.

²⁷“Hai phano nwng ani kókno khunju kan yaui lama phérwi tong khe,

²⁸angbo joliui nono phérwi tongnai tei nono nini sumsokrokni bagwi kusungsni khe swpraknai.”

²⁹Nwng nini sajlarokni bahan ma chánainai tei nwng nwsajwksongni bahan ma chánai.

³⁰Ang nini hatháirokno swbainai tei nini satrai sókmani háyáno swbainai tei nini mang kwthwirokno nini takjak mwtairokni saka-o khiklainai tei ang nono yakarnai.

³¹Ang norokni hapharrokno swbainai tei nini háyárokno dera rwnai, hakhe norok báhai motom rwmani abono ang yachak glak.

³²Ang o hano sokomornai tei norokni samo tongnai arirok abono nugwi mwlang cha bainai.

³³Ang norokno bosongrokni bisingo oroi-poroi khlainai tei ang sengkhokni sengno sokogwi naui nini utung-utung tongnai hakhe nini ha sokomorjaknai tei nini hapharrokbo bái báinai.

³⁴“O ha sokomorjagwi bukcha wngwi tong phuru khe, norok norokni kebengnai arirokni ha-o ma tongnai, o jora-o khe a ha sabatni lenglamung manẃi tongnai.

³⁵Ha komorjak khe tong sak aswkno lenglamungo tongnai, tamni hwn ba norok o ha-o tong phuru abono sabatni lenglana rw li ya.

³⁶Hakhe norokni bisingni kwthang tong rwknairokno khe ang norokni kebengnai arirokni o bwkha swbaimung rohornai tei buphang bwlái klaima khorang bai’-no kiriui ma khárnai; hakhe bororok seng kirijagwi khár tẃi khe bórok khárnai khoroksa phano bórokno riphrikna nang glak, hai phano bórok klai bainai.

³⁷Bórok sengno kiriui khárma hai khe khárwi khoroksa tei khoroksa bai thutai laiwi klai bainai, bórokno riphrikna se nang glak; nwng nini kebengnai arirokno kebengwi bachana bwkha-o phan tong glak.

³⁸Nwng bosongrokni bisingo komornai, nini kebengnai hani arirok nono monoknai.

³⁹Hakhe norokni bisingni tong rwknai borok bórok sak sakni sumsokrokni bagwi, bórokni ma-phani sumsokni bagwi bórokni kebengnai arini ha komorwi thángnai.

⁴⁰“Tamo khe bórokni sumsokno lon khe tei bórokni ma-phasong sak nang ya wngwi bórok kebengmarokno tei ano kebengwi himmarokno lon khe,

⁴¹phiya ba ang bórokno kebengwi bacha kha tei bórokni kebengnai arino ha-o tubu kha; tamo khe bórokni sakur rajak ya bwkha koinene wngwi bórokni sak sakni sumsokno lon khe;

⁴²hakhe ang Jakob bai swmai rwmano muitu khlaiwi Isak tei Abraham swmai rwmano muitu khlaiwi a hano bo muitu khlainai.

⁴³Tamo khe o habo bórok bai khibijak wngnai tei borok kwrwi sani komorjak ha wngwi lenglamung lenglanai, tamni hwn ba bórok ani raidano rákhok li ya, aboni bagwi ani khá bórokno seleng kha.

⁴⁴Hai phano bórok, bórokni kebengnai arini ha-o tongnai aphuru ang bórokno pái rw súgwi sokomornani eba ani swmai narwk ya wngmani bagwino sak nang ya wng glak tei sebo seleng glak; tamni hwn ba ang bórokni Subraiyung Kaitor.

⁴⁵Phiya ang bórokni Kaitor wngmani bagwi bórokno buini borokrokni bwskango Ijip hani kariui tubu kha, bórokni búchusong bai ang swmai rwmano muitu khlainai; tamni hwn ba ang Subraiyung Kaitor.”

⁴⁶O kerong-raidarokno’-no Sinai hathái-o Subraiyung Kaitor Musini yak tẃi khe rwmani.