Read Kok Borok LEBI 27 Bible Online

LEBI 27 - Kok Borok bible

LEBI 27

¹Subraiyung Kaitor Musino hai hwnwi sa kha,

²“Israilsarokno omo hai hwnwi sa di, bórok Subraiyungni thani chagwi rwnani hwnwi gosimani swk Subraiyungni wngnai.

³“Abórok khe nokha bisi nwichini simi nokha bisi dokchi jora umor, chwlani hwn khe abono kwthar háyá-o abo rang lep bachi rukphaini sekel wngnai.

⁴Phiya ba bwrwi hwn khe rang lepthamchi rukphaini sekel khe rw ta di.

⁵Tumungno borok umor nokha bisik bani simi nokha bisi nwichi hwn khe chwlani bagwi khe rang lepnwichi rukphaini sekel tei bwrwi hwn khe rang lepchi khlaiwi rwta di.

⁶Tumungno umor nokha talsani simi nokha bisik bani borok hwn khe chwlani bagwi khe rang lepba rukphaini sekel tei bwrwini bagwi hwn khe rang leptham rukphaini sekel rwtaui chong di.

⁷Tei tumungno nokha bisi dokchi umorni kwbáng hwn khe chwlani bagwi rang lepchiba tei bwrwini bagwi khe rang lepchi rukphaini sekel rwtaui chong di.

⁸“Phiya abórok bigra wngma bagwi nwng o chongwi rwmani rangno rwui man ja ya hwn khe bono ochaini thani ma tubunai tei ochai bono naui bwswk khe rwtaui boknai abono nanai; a rwnani hwnwi chaknai borok bini chúk tẃi’-no ochai abono ma boknai.

⁹“Tumungno Subraiyungno yapharnani hwnwi khoroksa swk mal-mata yaphar khe hakhe Subraiyungni thani abo kwthar wngnai.

¹⁰Bo abono sláiwi kahamni bagwi hamyano eba hamyani bagwi kahamno ta slái thung tei tumungno mal bai tei masa malno slái khe hakhe a maknwnwi’-no kwthar wngnai.

¹¹Tumungno Subraiyungno yapharwi man ya omo tẃi kwthar ya malno khoroksa swk yaphar khe bo abórokno ochaini thani ma tubunai,

¹²hakhe ochai abono kaham eba hamya naiwi aboni bwswk wngnai abono chongnai tei abo bo chongma swkno wngnai.

¹³Tamo khe tumungno bo abono seplena muchung khe bo aboni bakba su-ui ma rwnai.

¹⁴“Khoroksa swk bini nokno kwthar khlaina bagwi Subraiyungno yaphar khe ochai abono kaham wng thung eba hamya wng thung abono bwswk wngnai chongnai ochai chongma swkno abo ma wngnai.”

¹⁵Tei tumungno kwthar khlaiwi sakni nokno phiyókna muchung khe bini wng phinai.

¹⁶“Tumungno khoroksa swk baithangni barino Subraiyungni thani kwthar khlai khe bo aro káijaknai bwchlwirokno naiwi abo bwswk wngnai chongnai. Homer kaisa barli khe lepchiba rukphaini sekel wngnai.

¹⁷Tumungno bini barini Jubilini bisi jora kwthar khlai khe hakhe nwng rwtaui chongmani swk abono ma chongnai.

¹⁸Tumungno bo Jubili bisi láiwi abono kwthar khlai khe hakhe ochai bwskangni Jubili bisi jora bisi tongmarokno lekhaui abo swk rukphai belep ma lekhanai tei abono naharwi abono khiklai bo mannai.

¹⁹Tei khoroksa swk kwthar khlaiwi sakni barino phiyókna nai khe bo nwng chongmani rukphai belepni tei bakba kwbáng rw khe abo bini wngnai.

²⁰Phiya bo a barino phiyókna muchungjak ya khe, eba bo abono tei khoroksano phal khe abo tei kiphilwi man glak;

²¹a bari Jubilini bisi-o yakarwi rwjaknai tei Subraiyungni bagwi kwthar wngnai tei abo ochaini banta wngnai;

²²tumungno khoroksa swk búchusongni aroni manẃi phaimani a bari-okthaino karwi paiwi namani barino Subraiyungni thani kwthar khlai khe,

²³ochai abono nwng chongma swk rukphaini rang Jubili bisi jora lekhaui ma chongnai. Tei a salo abono ma rwnai hakhe abo Subraiyungni thani kwthar wngnai.

²⁴Jubilini bisi-o khe a bari-okthai phalnaisa kiphilwi man phinai, hwn ba a ha bini búchusongni sakni manthai wngnai.

²⁵Nwng rwtaui chongma swkno sekelrok kwthar háyá-o ma tubunai, gera kaichinwi khe sekel kaisa wngo.

²⁶“Phiya ba malrokni achaigramani chwla bwsarok Subraiyungni banta, abono khoroksa phano yapharwi man ya, abo musuk chwla phano wng thung eba mera phano wng thung abo Subraiyungni se.

²⁷Tumungno a mal kwthar ya hwn khe, hakhe nwng rwtaui chongmani aboni bakba rwui abono phiyógwi mannai abo phiyókjak ya khe nwng chongmani swk rwui paiwi mannai.”

²⁸“Tamo khe bini tongmani mal-mata eba bari okthai mungsa phano Subraiyungni bagwi phalwibo man glak phiyógwibo man glak abórok bebakno Subraiyungni thani kwthar khlaijak.

²⁹Bórokni bisingo khoroksa swk yapharwi rwjak hwn khe bono tei phiyógwi man glak bo ma butharjaknai.

³⁰“Ha-o tháimani mai-khulrok buphango tháimani bwthái bumukrokni chi-o kaisa ma rwnai, abo Subraiyungni se; abo Subraiyungni thani kwthar.

³¹Tumung khoroksa swk sakni chi-o kaisani kisicha swk yókna muchung khe bo aboni kusungba ma rwnai,

³²tei musuk meraroknibo mwrwknaini raidangni tola tẃi laimarokno abono chi-o kaisa ma rwnai, abórok Subraiyungni thani kwthar.

³³Aboni bubagrarok abo kaham da hamya da ta nai thung abono tabo ta slái thung tamo khe bo abono slái khe a mungnwnwi’-no kwthar wngnai abo tei phiyógwi man glak.”

³⁴Omorok’-no wng kha Subraiyung Sinai hathái-o Musini yak tẃi khe Israilsarokno kerong dagimung rwmani.