Read Kok Borok LEBI 3 Bible Online

LEBI 3 - Kok Borok bible

LEBI 3

¹“Tumungno khoroksa swk ratharmung bai khe kwthamungni yapharmung yapharna khe, bini mal-matarokni bodolni masa swk chwla eba bwrwi phano yapharna khe, abo mungsa khait kwrwino Subraiyungni thani ma yapharnai.

²Bo bini a yapharma muini bokhorok saka-o bini yak ma beranai tei bo a ríni nokni duglamo abono ma ratharnai; tei Aronni bwsa ochai aboni thẃino háyáno kitingwi yang-yang ma sarnai.

³Hakhe kwthamung yapharmani aroni’-no Subraiyungni thani sógwi yapharmung yapharnai, bo bupham tei bubukrok yapharnai tei bubugo tongma bebak buphamroknobo yapharnai,

⁴bwkhani bahan kaham, bupham bai puli tháinwini bupra-o nangjak bahanno puli bai khak di.

⁵Hakhe Aronni bwsarok abono sógwi yapharma a háyá-o sóknai, abórokno a hór saka-o tongma a bolni saka-o sóknai; abo wng kha sógwi yapharma, Subraiyung abono motomjago.

⁶“Tumungno bini a yapharmung Subraiyungni thani sógwi kwthamungni yapharma hwn khe abo bini mal-matani gutni bisingni chwla phano eba bwrwi phano wng thung abo mungsa khait kwrwino ma yapharnai.

⁷Bo bini yapharmungni bagwi mera bwsa yapharna khe, hakhe, bo abo Subraiyungni thani ma yapharnai,

⁸bo bini yakno a yapharma muini bokhorok saka-o ma beranai tei ríni nokni bwskango khe ma ratharnai tei Aronni bwsarok aboni thẃino háyáni ayang-uyango khe ma sarnai.

⁹Hakhe bini sógwi kwthamungni yapharmung sógwi Subraiyungni thani yapharmani aro bo aboni bupham tei bebak khituma bai buphamrok, majarni bekreng sibwi tei bubuk khobwi bupham tongmarok tei bohogo tongma bebak buphamrokno,

¹⁰tei puli tháinwi bupham khobwi bohogo tongma bebak tei bwkha bai bwkhatháino puli khobwi ma tikhlainai,

¹¹tei ochai abono háyá-o Subraiyungni thani sógwi chámung yapharmung yapharnai.

¹²“Tumungno bini a yapharma pun hwn khe, hakhe bo abo Subraiyungni bwskango ma yapharnai,

¹³tei aboni bokhorok saka-o bini yak beraui tei ríni nokni bwskango ma ratharnai; tei Aronni bwsarok a thẃino háyáni ayang-uyango ma sarchanai.

¹⁴Hakhe bo a yapharmungno sógwi yapharmung Subraiyungni thani ma yapharnai, bubukni bebak bupham tei bohok bisingo bupham tongmarokno ma rwnai,

¹⁵bupham bai puli tháinwini bupra-o nangjak bahanno puli bai khak di.

¹⁶Hakhe ochai abórokno sógwi háyá-o yapharnai, a sógwi chámung yapharma Subraiyung motomjago. Bebak bupham Subraiyungni se.

¹⁷Norokni bisingo khoroksa phano bupham tei thẃi chá maya, o raida bebak norokni bosong kusung kusung ma tẃinai.”