Read Kok Borok LEBI 4 Bible Online

LEBI 4 - Kok Borok bible

LEBI 4

¹Subraiyung Musino hai hwnwi dagi kha.

²“Israil bororokno sa di, tumungno khoroksa swk si yaui sumsok khlai khe, Subraiyung ta khlai di hwnwi dagimano khlai khe,

³phiya tumungno chongthar chongjak ochai sumsok khlaiwi bórokni saka-o majra tubu khe, bo sakni sumsokni bagwi khait kwrwi musuk masa Subraiyungni thani sumsok yapharmung ma yapharnai.

⁴Hakhe a ochai a musuk chwlano rínokni haplamo Subraiyungni bwskango ma tubunai hakhe bo a musukni bokhrogo yak ma beranai tei Subraiyungni bwskango abono ma ratharnai.

⁵Hakhe a chongjak ochai a musuk chwlani thẃi kisa nanai tei rínok bisingo a thẃino tlangnai.

⁶Hakhe ochai bini yasino a thẃi-o chomsanai hakhe a thẃino a kwthar ríni bengki-o uáisni sarchanai.

⁷Aboni ulo khe ochai thẃi kisa a rínokni satrai motom sókma háyáni busu-o rwnai, hakhe bebak bára thẃino khe sógwi yapharma háyá-o lukhlai rwnai abo wng kha rínogo hapmani a duglam.

⁸Bo a musuk chwlani bebak buphamno nanai bohok bisingo tongma bebak buphamrok,

⁹pulirok tei aroni buphamrok tei bwkhani kaham bahanrokno,

¹⁰Ochai a bebak buphamrokno naui abono sógwi yapharma a háyá-o khe Kwthamungni yapharmung yapharna phuru yabrwino butharwi buphamno naui yapharma hai khe ma yapharnai.

¹¹Phiya musukni bukur tei bebak bahanrok, bokhorok, yathek, bubuk, bwkha tei bikhirokno

¹²bo bebak a musukno bathamni phataro sap-sutra kwrẃngsa-o tlangwi thapla khibima burungo tlangwi hóro ma sóknai; thapla khibima burungono abono ma sóknai.

¹³“Tumung bebak Israil lukurok si yaui sumsok khlai khe tei bodolrokni sumsok lukurokni thani huijak hwn khe tei Subraiyung ta khlai di hwnmarokno khlaiwi majra tubu khe

¹⁴tei bórok sumsok khlaima sijak khe bebak bodolrok sumsok yapharmungni bagwi musuk masa ma yapharnai tei abono ríni-nok bwskango tubunai

¹⁵hakhe lukurokni okrarok Subraiyungni bwskango musukni bokhorogo yak beraui Subraiyungni bwskango a musukno ma ratharnai.

¹⁶Hakhe chongjak ochai ríni nogo musukni thẃi kisa ma tubunai,

¹⁷phiya ochai bini yasino thẃi-o chomsaui Subraiyungno rí swngjak bwskango uáisni ma sarchanai.

¹⁸Bo kisa thẃino Subraiyungni bwskango rínokni háyáni buchugo silmani tei thẃi bárano khe ríni nokni duglamo sógwi yapharmani háyáni yaphango ma lukhlainai.

¹⁹Bo bebak buphamno naui háyá saka-o sóknai.

²⁰Bo musukno sumsok yapharmung yapharma hai kheno bo omonobo hai’-no ma khlainai, hakhe bo omono hai’-no ma khlainai tei ochai bórokno sumsokni súchanai tei bórok nakarjaknai.

²¹Bo a musukno bathamni phataro sopreui tlangwi swkangni musukno sók tẃi khe omono ma sóknai, omono lukuni sumsokni bagwi yapharmung.

²²“Khoroksa tẃiphang siyaui sumsok khlai khe Subraiyung ta khlai di hwnmano khlaiwi majra tubu khe,

²³bo sumsok khlaimani sijak khe bo sumsok yapharmungni bagwi, khait kwrwi punjua masa ma yapharnai.

²⁴Bo punni bokhorogo yak beraui sumsokni yapharmung yapharma-o Subraiyungni bwskango abono ratharwi sógwi ma baroknai.

²⁵Hakhe ochai sumsok yapharmung thẃino yasi bai naui háyáni bwskango ma phulnai tei thẃi bárano khe sógwi yapharmani háyáni bwskango khe lukhlai ma rwnai.

²⁶Hakhe bo bebak buphamno háyá-o ma sóknai, kwthamungni yapharmani muini buphamno sók tẃi’-no ma khlainai, omo hai kheno ochai tẃiphangni sumsokni yapharmung ma yapharnai hakhe bo nakarjaknai.

²⁷“Tumungno lukurokni bisingo khoroksa swk siyaui Subraiyung ta khlai di hwnmano khlaiwi sumsok khlai khe,

²⁸bo sumsok khlaijakmano saui man kheno bo yapharmungni bagwi khait kwrwi punjwk masa ma tubunai.

²⁹Bo sumsokni yapharmungni bokhorok saka-o bini yak ma beranai tei sógwi yapharmani-o ma ratharnai.

³⁰Hakhe ochai mui ratharma thẃi-o yasi chomsanai tei háyáni busu-o phulnai a thẃino khe sógwi yapharmani háyáni yaphango lukhlai rwnai.

³¹Hakhe bo aboni bebak bupham tikhlainai kwthamung yapharmani muini bupham karima hai khe karinai tei Subraiyungno báhai motom bai khá phurna bagwi ochai abono háyá-o sóknai omo hai kheno ochai bini sumsokni bagwi yapharmung yapharnai tei bini sumsok nakarjaknai.

³²“Tumungno bo sumsokni bagwi mera tubu khe abo khait kwrwi mera bwrwi ma wngnai

³³tei sumsok yapharmungni bokhorok saka-o bini yak ma beranai tei sógwi barokma-o thẃi tlangwi o sumsokni yapharmungno ma ratharnai;

³⁴hakhe ochai sumsokni yapharmungni thẃi kisa yasi bai naui sógwi barokmani háyá busu-o ma phulnai tei thẃi barano khe háyáni yaphango ma lukhlainai.

³⁵Kwthamungni yapharmungni mera buphamrok karima hai khe bo bebak buphamrokno ma karinai tei ochai abono háyá-o ma sóknai, Subraiyungno hór bai yapharmani-o ochai bini sumsok khlaimani bagwi ma súchanai hakhe bo nakarjaknai.