Read Kok Borok LEBI 5 Bible Online

LEBI 5 - Kok Borok bible

LEBI 5

¹Omo hairokni bagwi khe sumsokni yapharmung yapharna nangnai. “Tumungno khoroksa swk bórok buj thumnokni karijak dagimung khoroksa swkni bagwi baithang nukma eba khnama kókno sana bagwi ringjak khe tei abono sa phai ya hwn khe, bo majra ma chánai.

²“Tumungno khoroksa swk si yaui kwthar ya manwi tang khe, abo wng kha omo hairok; mal-mata kwthwirok tang khe bo kwthar ya tei majra gwnang wngnai, bo abo hairokno ma tangma saui man khe abo hai wngnai.

³“Tumungno khoroksa swk si yaui borokni kwthar yarokno tang khe abo mungsa swk phano wng thung bo abo saui man kheno abo bai’-no majra wngnai.

⁴“Tumungno khoroksa swk uansuk yaui kaham phano hamya phano khlaina bagwi swmai tang khe bo hai uansuk yaui swmai tang-tung khe abo bo si ya phano wng thung abo bo saui man phi khe bo abo bai’-no majra wngnai.

⁵“Khoroksa swk bini majra tong khe bo a majrani bagwi sumsok ma se ma gosinai,

⁶tei bo a sumsokni súthaini bagwi merajwk eba punjwk phano Subraiyungni thani yapharmung ma tubunai. Ochai bini sumsokni bagwi ma súchanai.

⁷“Tumungno bo mera eba pun yapharwi man ya hwn khe bo bini sumsokni sú thai súna bagwi tokthu maknwi phano eba pharuk maknwi phano Subraiyungni thani, masa khe sumsokni yapharmungni bagwi tei masa khe sógwi yapharna bagwi ma tubunai.

⁸Bo abórokno ochaini thani ma tubunai, bo swkang a toksano sumsokni bagwi yapharnai. Bo aboni totrano ma mothornai,

⁹tei aboni kisa thẃino háyáni gana-o sarchanai. Tong rwkma thẃi bebakno háyáni a yaphango lukhlai rwnai. Omo wng kha sumsok tlangjaknani yapharmung.

¹⁰Hakhe bo tei masa tokno khe raidano rwgwi sógwi yapharnai, omo hai kheno ochai bórokni sumsokni bagwi súchanai tei bo omo hai khe nakarjaknai.

¹¹“Tumungno khoroksa swk tokthu maknwi eba pharuk phano rwui man li ya hwn khe, bo moida kilo kaisa sumsokni bagwi yapharmung ma tubunai. Bo aro olibni thok eba motom báhairok mungsa ma bul glak, tamni hwn khe omo sumsokni yapharmung se,

¹²bo abono ochaini thani ma tubunai, ochai aroni mochomsa naui Subraiyungni thani bebak yapharmani mari hai khe, nanai tei bo abono háyá-o chámung yapharma tẃi sóknai. Omo sumsokni yapharmung.

¹³Omo hai kheno ochai bo sumsokrokni bagwi súchanai tei bo nakarjaknai. A tong rwkmani auan kwsap khe ochaini wngnai, omo bwthái bwchlwi yapharma haino.”

¹⁴Subraiyung Musino hai hwnwi sa kha;

¹⁵“Tumungno khoroksa swk si yaui Subraiyungni kwtharno tẃiwi poitono swbaiwi cha ya khlai khe, hakhe bo Subraiyungni thani a majrani yapharmung mera bodolni khait kwrwi mera masa ma tubunai, kwthar háyáni rukphai rang tongma swk’-no su-ui ma rwnai, omo’-no majrani yapharmung.

¹⁶Bo a kwtharno tẃi sumsok khlaimano ma súnai, abono karwibo, banta kaibani banta kaisa ma rwnai tei abono ochaini thani ma tubunai; hakhe ochai a cha yani yapharmung bai khe bini bagwi súchajaknai hakhe bo nakarjaknai.

¹⁷“Tumungno khoroksa swk Subraiyung ta khlai di hwnwi dagimarokni bisingo kaisa swkno phano si yaui sumsok khlai khe, si yaui khlai phano bo majra klainai tei a majrano ma rujunai.

¹⁸Bo nini chongma swkno dam naiwi mera gutni khait kwrwi mera masa naui cha yani yapharmungni bagwi ochaini thani ma tubunai tei ochai bo si yaui a cha ya khlaimani bagwi súchanai, hakhe bo nakarjaknai.

¹⁹Omono majrani yapharmung, Subraiyungni thani bo majra gwnang.”