Read Kok Borok LEBI 6 Bible Online

LEBI 6 - Kok Borok bible

LEBI 6

¹Subraiyung Musino hai hwnwi sa kha,

²“Tumungno khoroksa swk sumsok khlaima bai Subraiyungni kubuino swbai khe, tumungno khati rwui tonma eba rangni bagwi manwi rwma eba khokjakma manwino tẃiwi sakni borokno tatal sa khe nok arini borokno kusup khe,

³eba a kwmama manwino man khe tei abono tẃiwi tatal sa khe, tatal khe swmai tang khe. Omorokni bisingo kaisa swkno khlai khe tei abo bai’-no bo sumsok khlaima klai-o.

⁴Khoroksa swk borok sumsok khlai khe tei majra klai khe bo khogwi namano kiphilwi ma rw phinai tei kusubwi namano tei bini thani khatiui tonjakmano eba kwmajak manwi manmano,

⁵eba khe bo tatal khe swmai tangmarok; bo abórokno bebakno kiphilwi ma rwnai tei abo bai tei banta kaiba ma boksinnai tei a nokphangno abono kiphilwi ma rwnai, majra yapharmungni a salo’-no ma rwnai.

⁶Tei bo ochaini thani bini majrani yapharmung tubunai tei bini a yapharmung Subraiyungni thani ma rwnai, mungsa khait kwrwi naiwi bini mera gutni mera masa abo majra yapharmungni bagwi nangma rang bai baksa mwchangjak wngna nangnai,

⁷tei ochai Subraiyungni bwskango bini bagwi súchanai abo bai’-no bo omono khlaiwi bini majra nakarjaknai.”

⁸Subraiyung Musino hai hwnwi dagi kha,

⁹“Aron bai bini bwsarokno sógwi yapharmungni o raidarokno tẃi sa di. Sógwi yapharma abo hopungno háyá saka-o ma tonnai, hórbo thwi phlai ya khe mwchẃngwi ma tonnai.

¹⁰Hakhe ochai bini lilonni kamchwlwi kolokno ma chumnai tei lilonni rí ma kannai, bo háyáni a thapla rimino ma huknai tei háyá khaksa-o khe ma tonnai.

¹¹Hakhe bo bini rírokno sláinai, kubun rírok kannai tei a thaplarokno bathamni phataro kwrẃngsa sap-sutra-o tlangnai.

¹²Háyáni hór uáisabo ma thwi glak, chẃng phlaimáng ma tongnai, phung brúmno ochai a saka-o bol ma boknai tei aroni bagwi sógwi yapharna tiyar ma khlainai tei kwthamung yapharmungni bagwi bupham sóknai.

¹³Háyá-o hór mwchẃngwi máng ma tonnai tei abo ma thwi phlai rw glak.

¹⁴“Omo wng kha bwthái bwchlwi yapharmungni raidarok. Aron bosongni ochai Subraiyungni thani háyá bwskango bokol yapharmung yapharnai.

¹⁵Hakhe bo mochomsa auan kwsap nanai tei abono thok tei satrai bai bulnai tei abono bebak Subraiyungni thani yapharmani mari-o háyá-o sóknai. O yapharmani báhaino Subraiyung motomjago.

¹⁶Hakhe tong rwkma a bárano khe Aron bai bini bwsarok chánai; abo a kwthar hwnma-o haino bánglano ma chánai, bórok abono ríni nogo a khotolo ma chánai.

¹⁷Bórok abono chuan bai bului ma hang glak, ang abo ani bantano bórokno hór bai khe yapharo; omo kwthar kuk, omo sumsokni tei majrani yapharmung hai.

¹⁸Aronni bebak chwla bwsarok Subraiyungni thani yapharmano cháui mano. Nini kusung kusung bosongni bagwi kók rwjak. Khoroksa swk borok a chámung yapharmano tang khe kwthar wngnai.”

¹⁹Subraiyung Musino hai hwnwi sa kha,

²⁰“Omo khe Aronni bosongno ochai chongthar chongma raidarok: Bo a chongthar chongjakma salo Subraiyungni thani kilo kaisa auan kwsap ma rwnai, khaksa khe phungo tei khaksa khe sarigo.

²¹Bórok abono kárai-o thok bai ma sernai, nwng kaham khe abono bului auan kwsap yaphar tẃi khe Subraiyung motomjakna tẃi khe ma yapharnai.

²²Aronni bosongni bere bini yakchu-o ochai chongjaknai, bo abono yapharnai. Raida-o tongma tẃi’-no Subraiyungni thani bebak sókjaknai.

²³Ochaini bebak chámung yapharmung bebakno sók súgwi ma páinai; aboni mungsa ma chá ya.”

²⁴Subraiyung Musino hai hwnwi sa kha,

²⁵“Aron bai bini bwsarokno sumsokni yapharmungni bagwi o raidarokno sa di. Omo sumsokni yapharmungni raida, sógwi yapharmani’-ono sumsokni yapharmungno Subraiyungni bwskango ma ratharnai omo kwthar kuk,

²⁶a muino yapharnai ochai bo abono a kwthar ríni nogo abono ma chánai.

²⁷Khoroksa swk a bahanno tang kheno kwthar wngnai aboni thẃino rí-o sar khe a kwthar thẃino sú-ui rw di.

²⁸Hani mungsa manwi-o phano a bahanno ruk khe, abono ma swbainai phiya tei pitolni manwi-o omorokno ruk khe a manwino rogwi ma hunai tei twi bai ma súnai.

²⁹Ochaini núkhungni bebak chwla bwsarokno o yapharmungno cháui mano; omo belai kwthar.

³⁰Tamo khe tumungno khoroksa swk a thẃino rínogo tubu khe tei sumsok súchajakna bagwi samungo thepa khe, a muino cháui man glak; abono hóro ma sóknai.