Read Kok Borok LEBI 7 Bible Online

LEBI 7 - Kok Borok bible

LEBI 7

¹“Samung cha yani yapharma raida wng kha omo hai, omo wng kha belai kwthar kuk;

²bórok a sógwi yapharmani arono samung hamyani ratharwi ma yapharnai tei aboni thẃino khe háyá kitingwi ma sarnai.

³Aboni bebak buphamrokno tei khituma tei bubukrok khopjak buphamrokno.

⁴Bupham khobjak puli tháinwi tei bwkhani kahamkuk bahanno ma khaknai.

⁵Ochai abórokno háyá saka-o Subraiyungno sógwi yapharma hai khe ma yapharnai, omo majrani yapharmung.

⁶Ochairok chwla thwgwi abono cháui mano, abono kwthar thai-o ma chánai omono wng kha kwthar kuk yapharmani.

⁷Sumsokni ratharwi yapharmani haino samung cha yani ratharwi yapharmabo abórok mungnw nwi’-no raida thansa.

⁸Khoroksa swkni bagwi ochai sógwi yaphar khe biya sógwi yapharmani bukurno mannai.

⁹Kárai-o yógwi bwthái bwchlwi yapharmarok tei kárai-o tiyar khlaimani eba bebak sukhrupjakrok yapharma auangrok ochaino mannai.

¹⁰Thái-chwlwi yapharmungno thok buljak phano kwran phano bebak Aronni bwsarok baksa baksa khe mannai.

¹¹“Omo khe khoroksa swk Subraiyungni thani kwthamungni yapharmung yapharna raida.

¹²Omo hambai rwmani yapharmung wng khe bo abono chuan buljak ya thok bului takjak auang tei auang kaham bai thok buljak auangno ma yapharnai.

¹³Hambai rwna bagwi kwthamungni yapharmani yapharmungno yapharna khw bo khe chuan buljak auang ma tubunai.

¹⁴Subraiyungno yapharmani hai khe bo yaphar brúmno auang lepsa ma rwnai, kwthamungni ratharmani thẃino sarnai ochai abono mannai.

¹⁵Hakhe hambaini bagwi kwthamungni yapharmani a bahanno bo yapharmani salo’-no ma chánai bo phung jora aboni mungsa phano ma narwk glak,

¹⁶phiya ba bini yapharmani a ratharma abo rwna hwnwi kók swmai khajak eba khá phurwi yaphar ma hwn khe a ratharwi yapharmani salo’-no abono chána nangnai teini salo bo aboni bára tong rwkmano cháui mano.

¹⁷Phiya ba salthamni salo khe bára tong rwkmano hóro sógwi ma páinai.

¹⁸Tumungno nokha salthamni salo khoroksa swk abono chá khe bini a yapharmung yachakjak glak, abo bai bo sak-sakno selengmasingcha khlaima klainai tei bini sak-sakni cha yano bo ma rujunai.

¹⁹“Tumungno mungsa swk kwthar ya manwini saka-o a muihan berajagwi tong khe a muihanno tei cháui man glak; abono hóro sógwi ma páinai. Phiya ba bebak kwthar borok bo muihan ma chánai,

²⁰phiya ba khoroksa swk sak kusum tong phuru Subraiyungni kwthamungni yapharmani bahanno chá khe a borok bini bororokni bisingni swkagwi rohorjaknai.

²¹Phiya ba khoroksa swk kwthar ya manwi tang khe, abo bórokni kwthar ya manwirok, kwthar ya mal-mata eba mungsa swk kwthar ya selengmasingcha manwi tangwi tumungno Subraiyungni kwthamungni yapharmani muihanno chá khe hakhe a borok bini sakni bororok bai norwi rohorjaknai.

²²Subraiyung Musino hai hwnwi sa kha,

²³“Nwng Israilsarokno sa di, norok musukni eba merani eba punni buphamno ta chá di.

²⁴Sak sak thwinai tei kubun mal-mata bai uátharjagwi thwinai omo tẃi mal-matani buphamno kubun samungrogo phnangwi mano, hai phano aboni bahanno ta chá di.

²⁵Tumungno khoroksa swk Subraiyungni mungwi hór bai sógwi yapharjak mal-matani buphamno chá khe bo bini bororokni aroni norwi rohorjaknai.

²⁶Tei norokni tongthaini mungsa swk mal-mata eba tokrokni bwthẃino ta chá di.

²⁷Khoroksa swk phano a thẃino chá khe a borok bini bororokni aroni norwi rohorjaknai.”

²⁸Subraiyung Musino hai hwnwi sa kha,

²⁹“Israilni bororokno sa di, tumungno khoroksa swk Subraiyungni mungwi kwthamungni ratharmung yapharna hwn khe, bo a kwthamung ratharmungni aroni chikhaksa phano Kaitorni mungwi ma rwnai.

³⁰Bini a chikhaksa yapharmungno hór bai khe sógwi Subraiyungni thani ma yapharjaknai tei bo bini yak baithang’-no aboni khaja bai buphamno ochaini thani ma yapharnai tei a khaja hwn khe ba Subraiyungni bwskango sibchaui tlangjak yapharmung hai khe yapharjaknai.

³¹Ochai buphamno háyá saka-o sóknai tamo khe khaja hwn khe Aron bai bini bwsarokni banta wngnai.

³²Nwng a kwthamung ratharmungni yapharmani aboni yagra biyano khe ochairokno ma rwnai.

³³Aronni bwsarokni bisingo khoroksa swk phano kwthamungni ratharmungo thẃi tei buphamno yaphar kha hwn khe aboni yagra yaphung bini banta wngnai.

³⁴Sibwi hamkrai yapharmungni bwkhano naui aboni yagra bwkhakno ang Israilrokno yaphar kha. Tei ang abono Aron tei bini bwsaroknobo rw kha. Israil dophani bebak bororokno a raidano ma khnanai.

³⁵Abo Subraiyungni thani hór bai sógwi yapharmani abo Aron tei bwsarokni banta. Subraiyungni ochai wngwi monnani hwnwi yapharjakmani salo abórokno kwthar khlaijak kha.

³⁶Borok kwthar chongjakmani salo Israilrokno rwnani bagwi Subraiyung omono dagi kha.”

³⁷Omorokno wng kha sógwi yapharmungni, bwthái bwchlwi yapharmungni, sumsokni yapharmungni, majra gwnang yapharmungni tei kwthamung yapharmungni raidarok.

³⁸Omorokno Subraiyung Sinai hathái-o Musino dagimani. A salo’-no bo Israil bororokno hasinglwngo Subraiyungni thani yapharmung tubu di hwnwi dagimani.