Read Kok Borok LEBI 8 Bible Online

LEBI 8 - Kok Borok bible

LEBI 8

¹Subraiyung Musino hai hwnwi sa kha,

²“Aron tei bini bwsarokno tubu di, kanmung chummungrok chongmani, thok tei sumsokni yapharmungni bagwi musuk tei mera maknwi tei auang bángla urasa tubu di;

³tei bebak lukurok rí swngjak nokni bwskango kuthum lai di.”

⁴Omo hai kheno Subraiyung dagima haino Musi khlai kha tei lukurok rí swngjak nokni bwskango kuthum lai kha.

⁵Musi lukurokno hai hwnwi sa kha, “Omono Subraiyung khlai di hwnwi dagimani.”

⁶Hakhe Musi Aron bai bini bwsarokno samo tubu-ui twi bai súcha kha

⁷bo rí kan rw kha tei aboni saka-o ephod bai khop kha, chango rí khaui tei kamchwlwi lolang bai rítuku kan rw kha, bumul naithok bai rítuku khaui ephodno kholop kha, omo hai kheno bini bebak bwsakno khop bai kha.

⁸Aboni ulo Musi Khaklap dikholo sola gwnang kaisa kanmung chum kha tei a Solano Urim bai Thumimno[1] ton kha.

⁹Musi Aronni khorogo rí sórwi rw kha tei a pakri-o rangchakni gwina bai khopjak kwthar motok thubui rw kha, abo Subraiyung dagima hai kheno Musibo khlai kha.

¹⁰Aboni ulo Musi chongmani thok kwthar naui bórokni tongthairogo tei aroni bebak manwini saka a thokno phul baiwi kwthar khlai kha.

¹¹Tei bo a thokno naui uáisni háyá-o sarcha kha tei aroni manwi khwnwirok, mairang lotarokni saka-o a thok phulmani bising tẃi kwthar khlai tháng kha.

¹²Musi chongmani thok kwthar naui Aronni khorogo phul kha. Abo hai kheno bo Aronno kwthar khlai kha.

¹³Hakhe Musi Aronni bwsarokno tubu-ui bórokno rí kwtal kan rw kha tei chango rí kha ka tei khorogo rí sórwi rw kha.

¹⁴Abo hai khe bo sumsokni yapharmungni bagwi musuk chwlano tubu kha; tei Aron bai bini bwsarok a sumsok yapharmungni bagwi tubujak musuk chwlani bokhorok saka-o yak bera lai kha.

¹⁵Aboni ulo Musi a musuk chwlano butharwi aboni thẃi narwk kha. Tei bini yasi bai a thẃino naui háyáni buchuk buchugo phulwi rw kha abo hai kheno a háyáno kwthar khlai kha tei háyá yaphango bo a thẃino lukhlai rw kha, Sumsok súchajakna tẃi khe Musi a háyáno kwthar khlai kha.

¹⁶A bubugo tongmani bebak buphamno tei bwkhani bahan kahamkuk bai bupham bai tei oklep bai puli kwnwi naui Musi abórokno háyá-o sók kha.

¹⁷Tamo khe a musukni bukur, bini bahan, bini bikhirokno bathamni phataro tlangwi Subraiyung Musino dagima haino sógwi pái kha.

¹⁸Hakhe bo sógwi yapharmungni bagwi mera kotorjatno yaphar kha tei Aron bai bini bwsarok a merani bokhorogo yak bera lai kha.

¹⁹Tei Musi abono buthar kha tei thẃino háyáni ayang uyang sarchaui rw kha.

²⁰Hakhe Musi abono bophon bophon khe kwrak kha tei bokhorok, bophonrok tei buphamno hóro sók kha.

²¹Bubuk bai yathekno twi bai súcha kha. Aboni ulo Musi a merano háyá-o sógwi yapharmungni yapharmano yaphar kha. Aboni báhai Subraiyungno khá kochom rw kha. Subraiyung Musino dagima tẃi’-no omo khlaijak kha.

²²Hakhe bo tei masa mera tubu phiu kha. O merano chongtharni mera tei Aron bai bini bwsarokno ochai chongthani samungo thepajak kha. Aron bai bini bwsarok a merani bokhorogo yak bera lai kha.

²³Hakhe Musi abono buthar kha tei aboni kisa thẃi naui Aronni yagra khunju-o tei yagrani yasima-o tei yagra yakungni yasima-o phulwi rw kha.

²⁴Phiya Musi Aronni bwsarokno tubu kha tei kisa thẃi naui bórokni yagrani khunjubago tei bórokni yagra yasima-o tei yagra yakungni yasimarogo phulwi rw kha tei Musi thẃi naui háyáni yang yang sarcha kha.

²⁵Yagulo bupham bai khituma tei bubukni bebak buphamrok tei bwkha ganani bahan tei bupham nangjak okpuli tháinwi tei yagra yaphung na kha.

²⁶Tei bo sal brúm brúm Subraiyungni bwskango ura kupulung chuan buljak ya auang bángla yapharjakni auang lepsa naui tei thok kwrwi auang lepsa naui tei auang rwja lepsa naui yagra yaphung bai bupham saka-o beraui rwi kha.

²⁷Tei bo abórok bebakno Aron tei bwsarokni yago yapharwi rw kha tei Subraiyungni bwskango sipmung yapharmung hai khe abono sip kha.

²⁸Hakhe Musi abórokno bórokni yakni naui sógwi yapharmung bai baksa abórokno háyá saka-o sók kha, chongmungni yapharmung hai khe báhai motom Subraiyungni thani sógwi yapharmani abo chongtharni yapharmung hai motom kha.

²⁹Musi khájani bahan naui sipmung yapharmung hai khe Subraiyungni bwskango sip kha. A chongtharni mera abo Musini banta wng kha. Subraiyung dagima hai kheno Musi khlai kha.

³⁰Hakhe Musi chongtharni thok kisa naui tei háyá-o tongmani thẃi naui abono Aron tei bini bwsarokni rí-o sar kha. Abo hai khe bo bini rírokno tei bini bwsarokni rírokno kwthar khlai kha.

³¹Musi Aron bai bini bwsarokno hai hwnwi sa kha, “Ríni nok bwskango, muihanno ruk di tei abono chá di tei chongmungni yapharmungni urani auangno ang dagima hai khe Aron bai bini bwsarok abono ma chánai,

³²tei muihan bai auang bára tong rwkmano sógwi pái di.

³³Phiya norokni chongthar chongmani sal pái ya sak, salsni jora rínokni bwskangni ta kutul di, tamni hwn ba norokno chongthar chongmani nokha salsni nango.

³⁴Tini khlaijakma hai khe norokno súchana bagwi Subraiyung dagi kha.

³⁵Subraiyung khlai di hwnma tẃi ríni nok bwskango norok nokha salsni hor sni jora kutul yaui ma tongnai, wng ya khe norok ma thwinai; tamni hwn ba ang omono dagi kha.”

³⁶Subraiyung Musini bising tẃi dagima hai kheno, Aron tei bwsarok bebakno khlai kha.