Read Kok Borok LEBI 9 Bible Online

LEBI 9 - Kok Borok bible

LEBI 9

¹Aboni ulo nokha salcharni salo Musi, Aron tei bini bwsarokno ring kha tei Israilrokni tẃiphang okrarokno ring kha;

²hakhe bo Aronno hai hwnwi sa kha, “Nwng sumsok yapharmungni bagwi khait kwrwi abo tẃi musuk bwsa chwla masa Subraiyungni bwskango tubu di.

³Tei Israilni bororokno hai hwnwi sa di, ‘Norok sumsok yapharmung yapharna bagwi punjua bwsa masa tei hóro sógwi yapharmungni bagwi nokha bisi sa kádrop khait kwrwi musuk chwla bwsa masa tei mera bwsa masa tei

⁴hamkrai yapharmungni bagwi musuk chwla masa tei mera bwsa tei thok bai sóngjak auang tubu di, tamni hwn ba tini’-no Kaitor norok bai nukjak phainai.’ ”

⁵Hakhe bórok Musini kók sama tẃi’-no a manwirokno tubu-ui rí swngjak nok bwskango kuthum lai kha tei Kaitorni bwskango bacha lai kha.

⁶Musi bórokno hai hwnwi sa kha, “Omorokno wng kha Kaitor khlai di hwnwi norokno dagimarok; hakhe Kaitorni chẃngsacha norok bai nukjaknai.”

⁷Aphuru Musi Aronno hai hwnwi sa kha, nwng háyáni samo tháng di tei sumsok yapharmung tei hóro sógwi yapharmungno yaphar di. Omo hai kheno nini bororokno kwthar khlai di tei bororokni yapharmungno yapharwi bórokno Subraiyung dagima tẃi kwthar khlai di.

⁸Abo hai kheno Aron háyá bwskango thángwi sak sakni bagwi sumsok yapharmungni bagwi musuk chwla bwsano rathar kha.

⁹Aboni ulo Aronni bwsarok háyáni samo thángwi thẃi tubu kha tei a thẃi-o bórokni yasi chomsaui thẃi naui háyáni buchugo phulwi tháng kha tei bára tong rwkmani a thẃino khe háyáni yaphango lukhlai tháng kha.

¹⁰Sumsokni yapharmungni bagwi ratharjakni bupham tei bubuk pulirokno naui háyá saka-o sógwi rw kha. Subraiyung Musino dagima hai kheno abo khlaijak bai kha.

¹¹Phiya bo bahan bai bukurno khe háyáni phataro tlangwi sógwi rw kha.

¹²Hakhe bo sógwi yapharjaknaino rathar kha tei Aronni bwsarok bini thani thẃi tubu-ui tei bo abono háyá kitingwi sar kha.

¹³Hakhe bórok bono sógwi yapharmano rw kha. Bo bophon bophon khe tei bokhorokno háyá-o sók kha.

¹⁴Phiya bo bubuk bai yathekrokno sú kha tei sógwi yapharma bai baksa háyá-o sók kha.

¹⁵Hakhe bo lukurokni yapharmungno rw kha tei hai kheno lukurokni bagwi sumsokni yapharmung pun masa rw kha tei sumsokni ratharmungni bagwi rathar kha.

¹⁶Tei bo sógwi yapharmungni tubumungno tubu kha tei a raidano rwksaui abono yaphar kha.

¹⁷Bo phungni sókmung yapharmungno karwi bwthai bwchlwi yapha-o mochomsa naui sógwi yaphar kha.

¹⁸Bo lukurokni bagwi kwthamungni yapharmungni bagwi musuk tei punbo yaphar kha phiya Aronni bwsarok bono aboni thẃino yaphar kha bo abono háyá kitingwi sar kha.

¹⁹Tei musukni bupham, Merani bupham, bubukni bupham tei puli naui tei bwkha gana ginini bahan

²⁰tei bórok khaklaprogo buphamno rw kha. Tei bo buphamno háyá-o sók kha.

²¹Tamo khe khaklap bai tei yagrani yaphungno Aron Musi bai dagijakma tẃi’-no Subraiyungni dagijakma tẃi khe sibwi sipmung yaphar kha.

²²Hakhe Aron bini yakrokno lukurokni bwkhak sursa kha tei bórokno hamari rw kha hakhe bo sumsok yapharmungni tei sókmung yapharmungni tei kwthamung yapharmungni nongkhorwi phai kha.

²³Tei Musi bai Aron rínok bisingo hap kha tei bórok nongkhorwi phai khe lukurokno hamari rw kha tei Subraiyungni chẃngsacha bebak bororok bai nukjak kha.

²⁴Tei Subraiyungni aroni hór ongkhorwi phai kha tei háyá saka-o sógwi barokmani buphamno sógwi pái kha. Tei lukurok abono nuk khe chirikhók lai kha tei botok khe bolokhógwi khulum lai kha.