Read Kok Borok JIRIMIA 1 Bible Online

JIRIMIA 1 - Kok Borok bible

JIRIMIA 1

¹Benjaminni ha Anathoto tongnai ochairokni bisingni ochai Hilkiani bwsajla Jirimiani kókrok,

²bini thani Subraiyungni kók nongkhorwi phai kha, Judani Amonni bwsajla Josia habugra chámani nokha bisi thamchini jora-o bini thani Subraiyungni kók sók phai kha.

³Josiani bwsajla Jehoiakim Judani habugra chá phuruni simi, Judani habugra Josiani bwsajla Jedekia habugra chámani molni nokha bisichisa pái twtwi-o Subraiyungni kók sakhlaijak phir kha. Nokha talbani talo’-no Jerusalemni bororok buini ha-o khaui tlangjago.

⁴Tabuk Subraiyungni kók ani thani hai hwnwi phai kha,

⁵“Nono ogo chu ya sini swkang’-no ang nono sini-o tei nwng achainani swkang’-no ang nono kwthar khlai kha; ang nono dopharokni thani diyari chong kha.”

⁶Hakhe ang hai hwnwi sa kha, “O Subraiyung Kaitor! Nai di, ang kók sana se rwng ya tamni hwn ba ang le chwrai si kho.”

⁷Phiya ba Subraiyung ano hai hwnwi sa kha, “Ang chwrai se hwnwi, nwng ta sa di; phiya ang rohorma bororokni thani nwng ma thángnai tei ang dagimani tẃi’-no nwng ma sanai.

⁸Nwng bórokno ta kiri di, tamni hwn ba ang nono phiyókna bagwi nwng bai tongo hwnwi, Subraiyung sa-o.”

⁹Aphuru Subraiyung bini yak phologwi ani búkhúgo tang kha; tei Subraiyung ano hai hwnwi sa kha, “Nai di, ani kókrokno nini khugo ton kha.

¹⁰Nai di tini ang dopharokni saka-o tei habugrarokni saka-o, phuichanani tei swbainani, sokomornani tei khitarnani, tisanani tei kainani bagwi nono chong kha.”

¹¹Tei Subraiyungni kók ani thani hai hwnwi sa phai kha, Jirimia, nwng tamo nuk? Hakhe ang hai hwnwi sa kha, “Ang almon buphangni bedek deksa nugo.”

¹²Hakhe Subraiyung ano hai hwnwi sa kha, “Nwng sóino nuk kha;[1] tamni hwn khe ang kók sama haino khlaina bagwi tiyar wngjak.”

¹³Subraiyungni kók ani thani tei uáisa hai hwnwi sók phai kha, “Nwng tamo nuk?” Hakhe ang hai hwnwi sa kha, “Ang twk tháisa muthungjak khe nugo, abo salsibai bwkhago naharjak.”

¹⁴Hakhe Subraiyung ano hai hwnwi sa kha, “Salsibai bwkhakni hamyarok phaiwi bebak ha-o tongnairokni thani abo nang phainai.”

¹⁵Tamni hwn khe nai di, “Salsibai hani joto bosongrokno ang ringwi hai hwnwi sanai” hwnwi Subraiyung sa kha tei bórok bebakno phainai tei bórok jotono Jerusalemo hapmani duglamo bórokni achukthayung snamnai tei chokdeual kitingwi’-no tisanai, hakhe ha Judano kebengwi bebak kamiyungrokno kitingwi achuk phainai.

¹⁶Ani bororok sumsok khlaimani bagwi ang bórokno majra rwnai; bórok ano khibi kha tei kubunni mwtairokno satrai sók lai kha tei sakni yak bai takjakno khulum lai kha.

¹⁷Haini bagwino nwng chango rí kwrak khe khaui bacha di tei ang nono bebak dagimarokno bórokno sa di. Bórokni bwskango bwkha ta bái di, wng ya khe bórokni thani ang nono butua snamnai.

¹⁸Phiya nai di, ang nono tini kamiyung kwrak khlai kha, kaisa sorni thongla khlai kha tei pitolni deual snam kha, bebak hani bubagrarok kebengwi, bini bwsarokno kebengwi tei bórokni oroni ochairokno tei hani bororokno kebengwi bachana bagwi se khlai-o.

¹⁹Bórok nwng bai choba nang lainai, phiya bórok nono mechenwi man glak, tamni hwn ba ang nwng bai tongo hwnwi Subraiyung hai hwnwi sa-o, “Ang nono phiyóknai.”