Read Kok Borok JIRIMIA 10 Bible Online

JIRIMIA 10 - Kok Borok bible

JIRIMIA 10

¹O Israil núkhungni bororok, Subraiyung norokno samani kókrokno khna di.

²Subraiyung hai hwnwi sa-o: Dopharokni tongmung-chámungno ta srwng di, phiya nokha sakarogo mari nukma bai ta uana di; tamni hwn ba dopharok abórokno nugwi kirijago.

³Tamni hwn ba bórokni tongmung-chámungrok le chúk ya máng se: Bolongni buphang tanpháijago, tei rua bai khe tanjagwi abo buphangni manwi snamnai abono tankhigwi snamo;

⁴bororok abono rangchak, rukphai bai khe khobo; tei omorok logro-jogro wng ya tẃi khe atura bai khe kwrak khe togo tei khili bu-o.

⁵Bórokni takjak mwtairok hwn khe dorompai bari-o tokrokno sikirimani bena rapjak borok hai se, abórok kók saui man ya; bórokno aro uro tlangwi se ma thángo, tamni hwn ba bórok himwi man ya. Bórokno ta kiri di, tamni hwn ba abórok hamya khlai man ya, tei kaham bo khlai man ya.

⁶O Subraiyung, nwng hai le tei kebo kwrwi; nwng bwswk se kotor tei nini mung wng kha kotor tei phan gwnang.

⁷O dopharokni bubagra nono sabo se kiri ya tongnai? Tamni hwn ba abono nini le manthai; joto dopharokni tei bórokni hani si kwrwngrokni bere nwng hai khoroksa phano kwrwi.

⁸Bórok kwnwino uansukna rwng ya tei butua gwja; takjak mwtairok phrwngma le abo buphang bokochoni slái kaham ya!

⁹Rukphai tokjak khe Tarsisni tei rangchak khe Uphajni tubujago. Abórok tak kwrwngrokni yakni rangchakni manwi taknairokni yakni samung se; abórokno rí kwkhrang tei kochual kan rw jago; abórok bebakno tak kwrwngrokni yakni snamjakrok se.

¹⁰Phiya Subraiyung le kubui Kaitor; bo wng kha kwthang Kaitor tei mol brúmni bubagra. Bo jolima bai bangla phai-o, bini jolimano dopharok soiwi man ya.

¹¹Nwng bórokno hai hwnwi sa se sa di: O nokha bai hano snam ya a mwtairok nokha tolani tei o ha sakani komor langnai.

¹²Bo se bini phan bai khe hayungno snamo, bini simung bai khe o swngcharno songcha kha, tei bini saui manmani bai nokharokno phehelwi rw-o.

¹³Bo dagi phuru khe nokhani twirok gurum sa-o, tei bo ha páithakni twi hoku kasa rw-o. Bo uatwi ua rwna bagwi nokha philik rw-o, tei bo bini nok rwbamrokni nokbar kariui tubu-o.

¹⁴Joto borok’-no butua tei simung kwrwi gwja; rangchakni manwi taknairok bebakno bórokni takjak mangrok bai lachi rwjago; tamni hwn ba bórokni a takjak mangrok le tatal máng se phiya bórokni abórokni rangma se kwrwi.

¹⁵Abórok mungsa-o chúk ya, kaisa bandinai samung se, bórokni majra manma jora-o bórok gaija bainai.

¹⁶Subraiyung le omorok hai ya, bo le Jakobni man banta, tamni hwn ba bo se bebak manwirokno snamnaisa, tei Israil dopha khe bini baithangni sompoti; bini mung wng kha sengkrak suarirokni Subraiyung.

¹⁷“O gerepsajagwi tongnairok, norok hani sak sakni bokcha khocha si di!

¹⁸Tamni hwn ba Subraiyung hai hwnwi sa-o: Ang a jora-o ha-o tongnairokno kariui rohornai tei ang bórokno aswk khe tekto rwnai hakhe bórok ma uansuknai.”

¹⁹Ang bwswk se bwkha kham! Tamni hwn ba ani kwsa belai khe kotor. Hai phano ang hai hwnwi ma sa-o, “Au omo le ani bagwi sátokmungno wng laha, ang omono ma soi sinai.”

²⁰Ani ríni nok chila-phila wng kha tei ani joto buduk choui tháng bai kha; ani chwrairok ani aroni thángwi pái kha, bórok tei kwrwi kha; khoroksa phano ani ríni nokno tei uáisa swngnai tei ani rí swngmano jai khlainai kwrwi kha.

²¹Tamni hwn ba mera mwrwknairok khe butua, tei Kaitorni muchungmano sina nai ya; aboni bagwi’-no hamcha ya chasa ya, bórokni merarok oroi-poroi wng kha.

²²Khna di kóknathong! abo phai kha nai di! Judani kamiyungrokno sokomornani tei pheuangrokni hakhor khlaina bagwi abo salgra bwkhakni khorang kotor khe kutuksaui phai-o.

²³Subraiyung ang si-o, borokni lama le abo bórokni yapha-o ya, thwiblang borok bórokni sakni yaprirokno tẃitherwi man ya.

²⁴O Subraiyung, ano cha rwna bagwi khorai di, buj sói khlai abono khlai di; nini jolimani bising tẃi ya, nwng ano katswi bukcha khlaiwi ta pái rw ja di.

²⁵Nono sini ya dopharok tei nini mungwi ring ya dopharokni saka-o nini jolimano lukhlaiwi rw di; tamni hwn ba bórok Jakobno monok kha; tei pái khibi kha, bini tongthairokno bukcha khe khibijak khlai kha.