Read Kok Borok JIRIMIA 11 Bible Online

JIRIMIA 11 - Kok Borok bible

JIRIMIA 11

¹Jirimiani thani Subraiyungni aroni kók sók phai kha:

²“O kerongni kókrokno khna di tei Judani tei Jerusalemo tongnairokno sa di.

³Nwng bórokno sa di, Subraiyung Israilni Kaitor hai hwnwi sa-o: kerongni kókrokno sak nang ya borok bo swraimung nang thung,

⁴ang norokni chuchusongno ha Ijibo sor gele rwui ma tongmani thapani tikhlaiwi tubu phuru ang bórokno hai hwnwi dagi kha, norok ani kók khnaui tong di tei ang norokno khlai di hwnmano khlai di, hakhe norok ani borok wngnai tei ang norokni Kaitor wngnai,

⁵ang norokni chuchusongno omo tẃi hano rwnani hwnwi swmai tang kha, a ha-o tabuk piya bwtwi tei dut biyal kwrwi wngnai hwnwi kók rwmano narwknai hwnwi sa kha, hakhe tabuk a ha nini yago.” Hakhe ang hai hwnwi sa kha, “Subraiyung, omo tẃi’-no wng thung.”

⁶Subraiyung ano hai hwnwi sa kha: O kókrokno Judani kamiyungrogo tei Jerusalemni lamarogo sakhlai di: Kerongni o kókrokno khna di tei bórok rákhogwi tong thung.

⁷Ang norokni chuchusongno ha Ijipni tubu-ui phaima jora ang belai kheno kwrak khe ragdama khlai kha, tini jora ani kók khna di hwnwi saui phai kha.

⁸Hai phano bórok abono khwbo khna li ya tei sakbo nangjak li ya, tamo khe sak-sak sijakma bai lama hamya-o se him lai si-o. Hakhe ang bórokno rákhogwi tong thung hwnwi kerong rwmano rákhok ya wngma bagwi ang bórokno a kerongno rwksauino sátoknai.

⁹Subraiyung ano hai hwnwi sa phi kha; Jerusalemo tei Judani bororokni bisingo kaisa uansuktang hamya chap laimung chapma tongo.

¹⁰Bórok bórokni chuchusong hai kheno ani kók khna yaui sumsok khlaiwi uslu-ui tháng kha; bórok tei kubunni mwtairokno monna bagwi bórokno rwkthar lai kha; Israilni bororok tei Judani bororok ang bórokni chuchusong bai kók khaui swmai tangmano swbai kha.

¹¹Aboni bagwi Subraiyung sa-o, nai di kubu-kubui’-no ang bórokni thani omo swk digi-sigi tubu anw bórok aroni yógwi man glak; bórok yókna bagwi ani thani kabwi san phano ang bórok sanmano khna glak.

¹²Aphuru Judani kamiyungrogo tei Jerusalemo tongnairok bórok barokmani mwtaini thani kapnai, tamo khe abórok bórokno bórokni birmanni phiyógwi man glak.

¹³Tamni hwn ba o Juda; nini mwtairok nini kamiyung bángma swk’-no báng kha tei Jerusalemni lama gwnangwi’-no lachimasingcha khe nwng mwtaini háyá snam kha, Bal mwtaino satrai sókma háyá snam kha.

¹⁴Nwng o bororokni bagwi ta suri di, eba bórokni bagwi ta kap di, bórokni wngwi ta suri di, tamni hwn ba bórok bórokni birman nang phuru ano ring phano ang khna glak.

¹⁵Samung hamyarok se tangwi tongo hwn khe ani khájani bororok ani nogo tamo manthai tong? nini kók rwmani tei ratharwi barokmani muihanrok nwng sokomorjakna naimani aroni phiyógwi da manno ba? Nwng tongthogwi da manno?

¹⁶Salsa Subraiyung nono “Bwthái kaham tháinai tháistwi kwkhrang phangsa” hwnwi se ringmani; tamo khe nokbar kotor sibwi gurumsaui aro hór phnangwi rwnai, hakhe bini bedekrok khamwi pái bainai.

¹⁷Phankrak Subraiyung nono káinai nini bagwi hamya sa kha, tamni hwn ba Israilni núkhung tei Judani núkhung samung hamya tang kha, Bal mwtaini thani satrai sógwi ano thamchi ka rw kha.

¹⁸Omo Subraiyung ano saui man rw kha tei ang saui man kha; hakhe nwng ano bórokni samung hamyarokno phunuk kha.

¹⁹Phiya ba ang le ratharna bagwi tlangjaknai koinene mera bwsa hai se. Bórok ano kebengwi “Phai di chwng o buphangno bwthái bai baksa sokomor grana, omono kwthangrokni hani tanwi sachu grana hakhe bini mung tei khujak glak!” Hwnwi sa laimano ang saui ma se man ya.

²⁰O phan kwraksa Subraiyung, nwng le bujsói khlai-o tei bwkhano tei uansukmano chánai-o, aboni bagwi nwng bórokno yagul sumano ano phunuk di, tamni hwn ba ang nini thani’-no tentaiwi sa kha.

²¹Aboni bagwino nono butharna nainai Anathotni bororokno tẃiwi ahai hwnwi sa-o, “Nwng Subraiyungni mungwi mungsa kók diyari ta sakhlai di, wng ya khe nwng chini yago thwinai.”

²²Hakhe Phankrak Subraiyung omo hai hwnwi sa-o: Ang bórokno majra rwnai; chwla siklarok khe seng bai tanwi butharjak bainai; bórokni bwsa chwla tei bwrwirok asari nangwi thwi bainai.

²³Bórokni bisingo karwi klangjak hwnwi tong glak. Tamni hwn ba ang Anathotni bororokno majra ber phuru aro komormung tubunai.