Read Kok Borok JIRIMIA 13 Bible Online

JIRIMIA 13 - Kok Borok bible

JIRIMIA 13

¹Subraiyung ano hai hwnwi sa kha, “Tháng di nini chango kanjaknai lilon rí pai di tei abono nini chango kan di phiya ba bono twi-o chomwi ta misi di.”

²Hakhe ang Subraiyung dagimani kókno tẃi lilonni rí pai kha tei ani chango kan kha.

³Hakhe tei uáisa Subraiyungni ano omo hai hwnwi sa kha,

⁴“Nwng paiwi tubu-ui kanmani a lilonni ríno tlangwi Uphratis twima-o tháng di tei abono aroni holong besero khe huiwi rwui di.”

⁵Hakhe ang Subraiyung ano dagi tẃi’-no abo Uphratiso thángwi abono huiwi rwi kha.

⁶Sal kwbángmani ulo khe Subraiyung ano hai hwnwi sa kha, “Bacha di, Uphratiso tháng di, hakhe ang nono hui di hwnwi dagiui samani a bwchango kanma ríno aroni tubu-ui phai di.”

⁷Ang aphuru khe Uphratiso tháng kha tei a lilonni rí huiwi tonmani abo khurwi kari kha. Tamo khe a rí aphuru khe phonwi tháng kha; abo mungsa chúk li ya.

⁸Aphuru khe ang Subraiyungni o kók ani thani sók phai kha:

⁹“Subraiyung hai hwnwi sa-o: Katswi omo hai kheno ang Judani tei Jerusalemni kung chukmano sokomornai.

¹⁰O borok hamyarok, bórok ani kókrokno khnana nai ya, bórok buj tháisa gwja tei bórokni muchung tẃi tongwi kubun mwtairokno bóri lai kha tei suri laina tháng lai kha, bórokbo o lilon rí hai’-no wngnai tei abo mungsa samungo phano chúk ya” wngnai.

¹¹Bwchangni rí bwchango kwcha rwui tonma hai ang joto Israil tei Juda bororokno ani borok wng rwna bagwi ani mung bórom khlaijak thung hwnwi, lobjak thung tei chẃngsacha khlaijak thung hwnwi ani thani khaui namani, hwnwi Subraiyung sa-o. Tamo khe bórok ani kók khna li ya.

¹²Nwng o kókno bórokno sa di: Subraiyung Israilni Kaitor hai hwnwi sa-o: Bebak langio’-no angur bwtwi kupulung ma khlainai. “Hakhe bórok nono ahai hwnwi sanai, ‘Joto langi-o angur bwtwi kupulung wngna nangnai hwnwi chwng si ya da hwnwi chong?’ ”

¹³Aphuru khe nwng bórokno hai hwnwi sa di, “Subraiyung hai hwnwi sa-o: O ha-o tongnairokno, abo khe habugrarok Daudni achukthayungo achuknai habugrarokno tei ochairokno diyarirokno tei joto Jerusalemo tongnairokno kephekrok bai kupulung khlainai.

¹⁴Ang bórokno khoroksa tei khoroksa bai nang lai rwnai, bupha bai bwsano nang lai rwnai, hwnwi Subraiyung sa-o. Ang bórokno sokomor phuru yakarwibo klang glak tei khabo khairok glak.”

¹⁵Khna di tei khunju kai di, kung ta chuk di tamni hwn ba Subraiyung omono sa-o.

¹⁶Bo mwnak rwna swkang hathái-o nukprom prom wngwi nwng yakung thutaina swkang nini Subraiyung Kaitorno chẃngsacha khlai di; nwng pohorno khatung phuru bo mwnakma khlainai abono katswi mwnakjak khlainai.

¹⁷Tumung nwng kók khna ya hwn khe nwng kung chukma bagwi ang huijagwi bwkhani muktwi khiklai anw; belai khe kabwi mokolni muktwi yorkhlai rwui kapnai, tamni hwn ba Subraiyungni bororok khajagwi tlangjak anw.

¹⁸Habugra tei Isirini bumano hai hwnwi sa di, “Hakhe achukthai-o achuk si di, tamni hwn ba nini khorokni motok naithok ha-o klaina kasu kha.”

¹⁹Negebni kamiyungrok muthupjak, khoroksa phano aboni duglam phiyóknai kwrwi kha; joto Judarok buini ha-o khaui tlangjak bai kha, jotono khaui tlangjak bai kha.

²⁰Nwng khorok tisaui salsibaini phainairokno naisik di. Nono rwmani a mera bodol biyang tháng kha, buko nini naithothok mera bodol?

²¹Nwng kiching khaui tongmani a phatar harokno se nini bokhorok wng rw khe nwng tamo sanai? Nwng bwrwirok sak kengna phuru bohok sajakma swk khe; ma sajak glak diba?

²²Tumungno nwng nini bwkha bisingo; “Ani ba tamo omo tẃirok wng lang?” hwnwi hwn khe, omo khe nwng belai khe cha ya khlaima bagwi se, nini rírok chikhagwi rwjago tei romphre-sophre khlaijago.

²³Ithiopiasarok bórokni bukur slái da man eba twikapura mereng-marang wngmani swkagwi de man? Abo hai’-no nwng’-bo samung kaham khlaiwi man ya, tamni hwn ba nwng samung hamya tangwi loi wng súk kha.

²⁴Hasinglwngo nokbar phaiwi gundak kobon rw tẃi khe ang norokno pisa-piring khlainai.

²⁵Omo se nini manthai, ang nini banta su-ui rwmani hwnwi Subraiyung sa-o, tamni hwn ba nwng ano pokjak kha tei tatalno se poito chá si-o.

²⁶Ang sakphang se nini kanma ríno mwkhang jora khukchaui rwnai tei nini lachimasingchano phunuknai.

²⁷Ang nini selengmasingcha samungno nuk kha, nini uaijamano tei sak motókjakmano, lachima kwrwi khe hatháirogo kamirogo sak phalmano nuk kha. O Jerusalem nwng bwswk se hamya sitrano! Nwng tei bwswk kwthar ya khlaiwi tong sinai?