Read Kok Borok JIRIMIA 14 Bible Online

JIRIMIA 14 - Kok Borok bible

JIRIMIA 14

¹Uatwi-pantwi phai ya wngnano tẃi Subraiyung Jirimiani thani sakhlaimani kók:

²Judarok bwkha khamjak tei bórokni dugayungo lengpra laijak; bórok mogwi ha-o goirok lai-o tei Jerusalemno chiri-mokorok wng laima khna-o.

³Bini bórom gwnangrok bórokni selengrokno twi tubu rwna rohoro; bórok twi tonmani gana phaiwi aro bórok man phai ya, bórok bórokni twi tilokrok bukcha khe ma kiphilo. Bórok lachijagwi tei bwkha báijagwi bórokni khorogo rí khaklubo,

⁴tamni hwn ba ha pekhokjak, aro uatwi thopsa phano phai li ya wngma bagwi hukba-haba khlainairok uanajak bai kha; bórok bórokni bokhorogo yak rw lai-o.

⁵Mwswi buma bwsa achai dropno yakarwi khibiui rw-o tamni hwn ba aro chájaknai samrok se kwrwi kha,

⁶bolongni koraichirkarok pheuang hai khe hathái swrwng-swrwngo tongwi rangsa-rangsaui hama na-o; bórokni mokol nuktha li ya tamni hwn ba aro cháthai jabra kwrwi kha.

⁷O Subraiyung chini cha yarok chwngno cha ya khe phunugui tong phano nini mung kahamni jarwi chwngno mungsa swk khlai ja si di; chwng uái-re uái lama phér kha, nono kebengwi sumsok khlaijak kha.

⁸O Israilrokni khatungma, birman phuru phiyóknaisa, nwng ba tamni ha-o sini ya nuk ya borok hai khe tongnai, horo saichung susuk himnai borok hai wngnai?

⁹Nwng tamo khoroksa ámang-chímang wngjak hai, phan gwnang sengkrak katimung rwui man ya hai wngnai? Hai phano, o Subraiyung nwng chini bisingo tongo tei chwng jotono nini mungno ringnairok máng; chwngno ta yakar ja di!

¹⁰Subraiyung o bororokno tẃiwi hai hwnwi sa-o: “Bórok aro-uro berainairokno hamjak kha, bórok bórokni yaprino bathak rw li ya; aboni bagwino Subraiyung bórokno yachak ya, tabuk bo bórokni sumsokrokno muitu khlainai tei bórokni sumsokni bagwi bórokno bo majra berwi sátoknai.”

¹¹Subraiyung ano sa kha: O bororokni hamkrai sanwi ta suri di.

¹²Bórok chá ya-nung ya khe tong phano ang bórokni kapmano khna glak tei ani thani sógwi yapharmung yaphar phano tei mai-khulrok yaphar phano ang abórokno yachak glak; tamo khe seng bai, asari phnangwi bok nang rwui ang bórokno pái rwui khibinai.

¹³Aphuru khe ang hai hwnwi sa kha: “O Subraiyung Kaitor yoi! Kók diyari sanairok bórokno ahai hwnwi sa lai-o, ‘Norok seng tisa laimabo nuk glak tei asari nangma-obo manjak glak, tamo khe ang norokno oro sói tong kwchangno rwnai.’ ”

¹⁴Subraiyung ano ahai hwnwi sa kha: Kók diyari sanairok ani mungwi tatal khe thinangni kókrok sa-o; ang bórokno robo rohor ya tei sa di hwnwibo dagi ya. Bórok norokno tatal khe imang-mukthangni kók se sa-o, nang ya-sók ya phunukjakmani kókrok se sa-o, bórok uansuk tẃi kókrok tagwi saui bandimung kókrok sa-o.

¹⁵Aboni bagwi ang bai rohorjak yaui ani mungwi ahai hwnwi kók diyari sakhlainairok, “O ha-o chobabo nang glak tei asaribo nang glak,” hwnwi sanai diyarirokno tẃiwi Subraiyung hai hwnwi sa-o. Choba tei asari phnangwi a diyarirokno butharwi páinai.

¹⁶Bórok kók diyari sakhlaimani bororok asari nangwi tei choba phnangwi Jerusalemni lamarogo khiklaiwi tonjak bainai. Khoroksa phano bórokno, bórokni bwsarokno tei bwsajwksongno phobnai tong glak. Tamni hwn ba ang bórokno bórokni cha yani bagwi abono bórokni saka-o klai rwnai.

¹⁷Nwng o kókno bórokno sa di: Ani mokolni muktwi hor-sal chorom phlaiwi tong thung, ta thak phlai thung, tamni hwn ba ani dophani bwrwi siklarok belai khe dukhu man rwui bujak kha tei kwsa kotorma khe rwjak kha.

¹⁸Ang hapharo tháng phuru khe seng bai tantharjaknairokno nugo! Kamiyungo hap phuru khe asari nangwi ma chá yaui ramprajakrokno nugo! Ha gwnangwi diyarirok tei ochairok bórokni khlaithai samung khlaiwi tong lai-o, tamo khe bórok tamo khlaiwi tong abo bórok si se si ya.

¹⁹Nwng Judano yakarwi da rw súk lang? Nwng Siyonno bwkha bai khe da naisler si? Nwng tamni bagwi ba chwngno ham phlai ya tẃi kheba swprak lang? Chwng tong kwchangno khatungwi tongmani, hai phano chini hamkrai se wng li ya; hamnani khatungmani abo se sundrumung se man si-o.

²⁰O Subraiyung chwng cha ya khlaimano tei chini chuchusongni hamyano chwng gosi-o, chwng nono kebengwi sumsok khlai kha.

²¹Nini baithangni mwkhangni bagwi nwng chwngno uphilwi naisik ya ta wng si di; nini chẃngsacha achukthayungno bórom kwrwi ta khlai ja si di; chwngno muitu khlai ja di tei nwng chwng bai kók kha laimano ta pok ja di.

²²Bororokni takjak mwtairok le uatwi da ua rwui manno ba? Eba khe nokha bo bini bai uatwi dopsa swk uaui da man ba? O Subraiyung chini Kaitor abo ba nwng ya diba? Chini khatungmarok le nini thani simi se, tamni hwn ba omorok bebakno nwng se khlai-o.