Read Kok Borok JIRIMIA 15 Bible Online

JIRIMIA 15 - Kok Borok bible

JIRIMIA 15

¹Hakhe Subraiyung ano sa kha: Musi bai Samuel ani bwskango bachaui koi phano ani bwkha bórokni bagwi kháchingsa wng glak. Bórokno ani bwskangni tikhlaiwi rohor di, tháng bai thung!

²Tumung bórok “Chwng buro thángnai?” hwnwi sẃng khe, nwng bórokno hai hwnwi sa di: Subraiyung hai hwnwi sa-o: Bok nangna tongnai khe ba bok nang thani, seng bai butharjakna tongnairok kheba seng bai butharjak thani; asari nangthani klaina tongnairok khe ba asari nangthani, khaui ma tlangjaknairok khe ba khaui tlangjak thani.

³Ang bórokno sokomorna bagwi mung brwi butharnairokno rohornai hwnwi Subraiyung sa-o: Butharna bagwi seng, sopreui tlangna bagwi sẃirokno tei nokha-o birnai tok tei bolongni yabrwirok khe tong rwkmarokno cháui pái baina bagwi rohornai.

⁴Ang bórokno haktorni joto dophani thani kirimasingcha khlainai tamni hwn khe, Judani habugra Hejekiani bwsajla Manase Jerusalemo hamya samung khlai kha.

⁵O Jerusalem, nono sabo khairoknai? Eba sabo nini bagwi swlwgwi kapnai? nini kaham-hamya sẃngnani sabo se phainai?

⁶Nwng ano yakar kha tei nwng uslu-ui tháng kha hwnwi Subraiyung sa-o; aboni bagwi ang ani yak bai swpragwi nono sokomoro, ang bwkha logwi akai kha.

⁷O hani joto kamiyung duglamrogo ang nini borokno mai ersajaknai khorompai bai ersaui chwkai kha; ang bórokno bwkha swbai kha, ang ani bororokno sokomor kha; bórok bórokni lamarokni kiphil li ya gwja.

⁸Twijlangni hasingsarokni slái bórokni randijwk báng kha; ang dibor khiring khiring siklarokni bumasongno kebengwi sokomornaino tubu kha; ang achomsa bórokni thani dukhu tei kirimung tubu kha.

⁹Khorok snini buma bwkha báijagwi leng kha; bini rangma cho kha; jora tong phuruno bini langmani sal habwi tháng kha; bo lachimasingcha wngjak kha tei mwkhang man li ya. Phiya bórokni tong rwknairokno khe tantharjakna bagwi kena arirokni yapha-o ang yapharwi rwnai, hwnwi Subraiyung sa-o.

¹⁰O ama ani bwswk se talikha hamya, nwng tamo wngwi ano bá lang, o ha gwnangwini bororokni bisingo dukhu ma nangnai tei ma uálainai borok se wng si-o! Ang khoroksano phano lakaibo rw ya tei lakaibo na ya, hai phano se jotono ano swrai lai-o.

¹¹Subraiyung hai hwnwi sa-o: Mungsa nini hamkraini bagwi ang nono phi se phiyóknai. Ang omo tẃi khlainai, dob tei digi-sigi phuru nini kena arirok nini thani phaiwi ma koi phai anw.

¹²Khoroksa swk phano salsibai bwkhakni sor tei pitolno swbaiwi mannai da tong ba?

¹³“Nini bebak ha gwnangwi sumsokni bagwi ang nini sompotirokno tei khatijak rangchak-ríchakrokno segwi manmani manwirok hai khe ahaino nini kena arirokno rw anw.”

¹⁴Ang nono, nwng sini ya omo hai nini kena arirokni hani seleng khlainai, tamni hwn ba ani thamchini hór chẃngsaui norokni saka kham phlaiwi tong anw.

¹⁵O Subraiyung, nwng le saui mano; ani kókno muitu narwk ja di tei ano nai ja di, ano sátoknairokno nwng yagul su ja di, nwng bórokno khá logwi tongo hwnwi bórokni yago ano ta komor rw ja di. Uansugwi nai ja di ang nini bagwi bwswk se lachimasingcha khlaijakmano soi kha.

¹⁶Nini kóktháirokno man khe ang a kókrokno chá kha, nini a kókrok ano tongthokma rw kha, khápang srang rw kha; tamni hwn ba o Subraiyung, phankrak Kaitor, ang nini mungwi se ringo.

¹⁷Ang chuak nungwi jurang uaijaui tongthoknairok bai baksa achuk ya tei bagrumwi ya; nini yak ani thani tongo hwnwi ang saichungno achugwi tong kha, tamni hwn ba nwng ano joli mung bai supung kha.

¹⁸Tamni bagwi ani sakni tektorok tei kwsarok ham rwui man ya wng kha, tamni abono ham rwui man ya wng lang? Tamo nwng ba bandinai twikhereng hai de wng sinai, ranwi thángnai twimuk hai?

¹⁹Aboni bagwi Subraiyung ahai hwnwi sa-o: tumungno nwng kiphilwi phai khe, ang nono yachak phinai hakhe nwng ani bwskango bachaui man phinai. Tumung nwng kók hamyarok sa yaui nang kukmani kókrok sa khe nwng ani khukphang wngnai. O bororok se nini thani phai anw nwng bórokni thani thángna nang glak.

²⁰Ang nono o borokni thani kaisa kwrak pitolni deual hai khe snam anw; bórok nwng bai choba khlai anw, hai phano bórok nono mechenwi man glak, tamni hwn ba nono mwthangna tei phiyóknani bagwi ang nwng bai baksa tongo, hwnwi Subraiyung sa-o.

²¹Ang nono borok hamyarokni yakni phiyóknai tei khairokma kwrwi bororokni yaphani nono phiyóknai.