Read Kok Borok JIRIMIA 16 Bible Online

JIRIMIA 16 - Kok Borok bible

JIRIMIA 16

¹Subraiyungni kók ani thani phaiwi sók phai kha:

²Nwng oroni bwrwi bai ta káijak di eba oro bwsa chwlabo ta man di bwrwibo ta man di.

³Oro achainai bwsa chwla tei bwsa bwrwirokno tẃiwi tei bórokno bánai bumasong tei bórokno a ha-o achai rwnai buphasongno tẃiwi Subraiyung ahai hwnwi sa-o:

⁴Bórok kirimasingcha bemuk manjagwi thwi anw. Aphuru bórokni bagwi swlwkma cháui khoroksabo kapnai tei phobnairokbo tong glak; bórok ha saka-o musuk khi hai khe klaiwi ma tong anw. Bórok seng bai tantharjagwi tei bok nangwi ma thwi bai anw, aphuru bórokni mang kwthwirok nokha-o birwi tongnai tokrokni tei bolongni yabrwirokni chámung wng anw.

⁵Tamni hwn ba Subraiyung hai hwnwi sa-o: Bórok thwi laiwi bwkha báijagwi kap laiwi tong thani ta tháng di eba aro kabwina bagwi ta tháng di; tamni hwn ba o bororokni aroni khakchangmano, ani pái phlai ya hamjakma tei khairokmano ang rosaui pái bai kha hwnwi Subraiyung sa-o.

⁶O hani bebak borok kotor tei kotoirok thwi bai anw; bórokno khoroksa phano phobnai tong glak tei bórokni bagwi kapnairokbo tong glak; bórokni bagwi khoroksa phano sakbo kwsa cha rwnai tei bokhorok siljaknaibo tong glak.

⁷A thwiwi thángnairokni bagwi kapnairokno khakchang rwnani bagwi khoroksa phano chámung hadinairok tong glak; bórokni buma-buphano bwkha-o khanmung khan rwui bwkha methepnai khoroksa phano tong glak.

⁸Nwng bórokni nogo chámung panda-o bórok bai pal ta achugwi di, tabo ta cháui di tei tabo ta nungwi di.

⁹“Tamni hwn ba Kwplaisa Subraiyung Israilni Kaitor hai hwnwi sa-o: Ang bórokni hohom-dodom tongthokmani khorang tei chamari bai hamjwkni khorangno mwthagwi rw anw. Oroni bororok omono nukna bagwi kwthang tong anw.”

¹⁰O bororokni thani nwng o bebak kókrokno sa khe bórok nono hai hwnwi sẃng anw, “Subraiyung ba chini bagwi tamni aswk kirimasingchani kók ba sa lang? Chwng tamo cha ya khlai kha? Chini Subraiyung Kaitorni thani chwng ba bubo tẃi sumsok khlai kha?”

¹¹Aphuru khe nwng bórokno sa di: Abo khe nini chuchusong ano yakarwi kubun mwtairokni thani thángwi bórokno monwi khulumui kha tei ano yakar kha tei ani kerongrokno rákhok li ya wngma bagwi;

¹²tei norok norokni chuchusongni slái’-bo teibo sitra khe tong kuk kha, norok ani kók khna yaui sak sakni bwkhani hamya muchung tẃi khe him lai kha.

¹³Aboni bagwi ang norokno o hani kariui kubun sini ya ha-o khiklai rwui anw. Nwng a hano sini ya tei norokni chuchusong bo abono sini ya, nwng aro hor hopung sal sapung kubun mwtairokno monwi tong anw, tamni hwn ba ang norokno tei khairok glak.

¹⁴Aboni bagwi Subraiyung hai hwnwi sa-o, omo hai salrok phaiwi tongo, aphuru khe “Subraiyung kwthang tongo, hakhe bo Israilrokno ha Ijipni kariui tubu-ui phai kha,” hwnwi sanairok tong glak.

¹⁵“Israilsarokno ha Ijipni tikhlaiwi tubunai Subraiyung kwthangni mungwi, hwn yaui salsibai ha-o tei kubun harogo Israilrokno rwkhlaiwi rohorwi aroni kariui tubu phinai Subraiyung Kwtharni mungwi sa-o;” hwnwi se sanai, tamni hwn ba ang bórokni chuchusongno rwmani a ha-ono bórokno kiphilwi tubu-ui phainai.

¹⁶Ang tabuk kwbángma a romnairokno rohor anw tei bórok bórokno romwi anw hwnwi Subraiyung sa-o; aboni yagulo khe kwbángma poluanrokno hatháirokni tei holongdap beserrokni bórokno romwi tubu-ui phai anw.

¹⁷Bórokni bebak thángma-himmarogo ang mokol rwui tongo; bórok ani bwskangni huijak ya tei bórokni sumsok bo ani mokolni huijak ya.

¹⁸Bórokni samung hamya tei sumsokni bagwi ang bórokno kusungnwi yagul sunai, tamni hwn ba bórok ani hano naislermasingcha takjak mwtairokni mangrok bai ani manthai hano sitra rw kha.

¹⁹O Subraiyung, ani phan tei ani katijaknai nok kwrak, ani digi-sigi jorani bathak thai, hayungni páithak bwkhakni kubun dophani bororok nini thani phaiwi hai hwnwi sa phai anw: Chini chuchusong manbumani le tatalrok simi se, abórok mungsa chúk ya manwirok se.

²⁰Bororok tamo sakni bagwi mwtairok snamwi mano hai da? Abórok le mw se mwtairok ya!

²¹“Aboni bagwino ang bórokno phrwngnai, ang tabuk bórokno ani suar tei phan phunugui phrwng anw, hakhe bórok ani mungno Subraiyung hwnwi saui man anw.”