Read Kok Borok JIRIMIA 19 Bible Online

JIRIMIA 19 - Kok Borok bible

JIRIMIA 19

¹Subraiyung hai hwnwi sa kha: Nwng twk taknaini aro thángwi twk tháisa paiwi tubu-ui phai di. Abono kisa swk chakrarokni thani tei khoroksa khoroknwi ochai okrarokni thani tlangwi tháng di,

²hakhe twk kwbai duglam tẃi Hinomni sajlani harungo tháng di tei ang nono sama kókrokno aro saui di.

³Subraiyungni kókno hai hwnwi Judani habugrarok tei Jerusalemo tong bainairokno nwng sa di. Israilni Kaitor, kwplaisa Subraiyung ahai hwnwi sa-o; ang omo swk khe o ha-o tubu anw abono khnanairok jotono khunju kochla ma chajak anw.

⁴Tamni hwn ba bororok ano yakar kha tei bórok bórokni chuchu song tei Judani habugrarok uáisa phano saui man ya omo tẃi mwtairokno barogwi tei majra kwrwirokni thẃi bai abono supungwi omono dera rwui kwthar ya khlai kha,

⁵Balni thani bórokni bwsarokno hóro sógwi barokna bagwi Bal mwtaini háyá kuchuk snam lai kha, abo hai ang dabo dagi ya tei khlai di bo hwn ya tei abo tẃirok ani bwkha-o bo ka ya;

⁶aboni bagwino omono Tophet eba Hinomni bwsajlani harung hwnwi tei ringjak glak tamo khe ratharma harung se hwnwi hwnjakna sal phaiwi tongo hwnwi Subraiyung sa-o.

⁷Ang oro Juda tei Jerusalemni chapmarokno chúk ya khlainai tei kena arirokni yago seng bai tei bórokno butharna nainai lukurok bai khe bórokno buthar rwnai. Ang bórokni mang kwthwirokno nokhani tokrokno tei bolongni yabrwirokni chámungni bagwi rwui rw anw.

⁸Ang o kamiyungno kirimasingcha khlainai tei mwnwi mung khlai anw; aboni gana tẃi thángnai joto bororokno bini kirimasingcha khe báimano nugwi sundru anw.

⁹Bórokni arirok eba khe bórokno butharna nainairok bai bórok chopjagwi sátokjak anw, aphuru ang bórokno bórokni sajwk sajlani bahanno bórokno chá rw anw tei jotono bórokni noksa-nok arini borokni bahanno chá lai anw.

¹⁰Aphuru khe nwng nini logi thángnairokni mokol bwskango a twkno swbai di,

¹¹tei bórokno hai hwnwi sa di: Kwplaisa Subraiyung hai hwnwi sa-o: Abo tẃi khe ang o twk taknai bini manwino swbai tẃi khe ang o bororokno tei bórokni kamiyungrokno swbainai, hakhe abo tei snam phirwi man glak. Phob thai ha kwrwi wng ya sak jora bórok Topheto phob lainai.

¹²Angbo o hano tei aro tongnairokno omo tẃi’-no khlainai, o kamiyungno Tophet hai khlainai hwnwi Subraiyung sa-o.

¹³Jerusalemni bebak nokrok tei Judani habugrani bebak nokrok tei sal, tal-athukirirokno satrai motom sókma nokrok tei kubun mwtairokno chuak barokma núkhungrok Tophet hai sitra rwjaknai.

¹⁴Hakhe Jirimia Tophetni kiphilwi phai kha, Subraiyung bono aro thángwi kók sanani bagwi rohormani. Bo Subraiyungni noktharni nokhla-o bachaui bebak bororokno sa kha.

¹⁵Israilni Kaitor Kwplaisa Subraiyung hai hwnwi sa-o: Nai di ang o kamiyungrogo tei bini ganani kamirogo sokomormungrok tubuna hwnwi sakhlaimani, abórokno bórokni saka-o khlaijaknai tamni hwnma le bórok gwdna kwrak gwja tei ani kók khna li ya.