Read Kok Borok JIRIMIA 2 Bible Online

JIRIMIA 2 - Kok Borok bible

JIRIMIA 2

¹Subraiyung ano hai hwnwi sa kha,

²“Tháng di tei sakhlai di, Jerusalemni bororokno khna rwui di;” Subraiyung hai hwnwi sa-o, “Nwng sikla phuru bwswk khir-khir khe hik kwtalno hamjak tẃi khe hamjak kha tei hasing panthoro nwng ano bahai khe rwkthar kha tei a mokol bai nuk ya kho hano, khatungwi tháng kha.”

³Subraiyungni thani Israil kwthar tongmani, tei bini habani tháiskangni bwtháino chánairok bebakno cha ya wng bai kha tei bórokni saka-o hamya sók phai kha hwnwi Subraiyung sa-o.

⁴Subraiyungni kókno khna di, o Jakobni núkhung tei bebak Israilni núkhungrok.

⁵Subraiyung hai hwnwi sa-o, nini chuchusong ani thani tamono cha ya nugwi ang bai chalwi tháng lang tei chúk yano rwktharwi ba, chúk ya ma kha lang?

⁶Bórok sa lai ya, ha Ijipni tikhlaiwi tubunai Subraiyung biyang tháng kha, bórokno hasing panthoro tei hakhorrogo, ha kwrano, belai mwnakni bising tẃi khe, bororok him ya kho, tong ya kho, lama tẃi tẃinaino naituk li ya.

⁷Ang nono bwthái bumuk bai kupulung ha-o tubu kha, aboni bwtháirok tei aroni kaham manwirok bai ok kochomwi, khá kochomwi tongna bagwi tubu kha. Tamo khe nwng aro sók phai kheno ani hano dera rw kha tei ani bosongno selengmasingcha khlai kha.

⁸Ochairok bo sẃng li ya, “Subraiyung buro?” Kerong tẃinairokbo ano sini li ya, tẃiphangrok ano kebeng lai kha. diyarirok Bal mwtai bai khe kók diyari sa kha, mungsa chúk ya takjak mwtairokno, rwkthar lai kha.

⁹“Aboni bagwi ang nono majra ber phinai” hwnwi Subraiyung sa-o tei a majrano nini bwsarokni bwsaroknobo rwnai,

¹⁰Twi kwcharni ha Saiprasno láiwi naiwi di, eba Kedaro borok rohorwi arorogo omo hairok to da tong jai khe naikol rw di.

¹¹Dopharok bórokni mwtairokno sw da slái bai? Bórokni a mwtairok mwtai wng ya phano bórok slái ya, tamo khe ani bororok khe mungsa chúk ya bai bórokni chẃngsachano slái kha.

¹²O nokharok norok kiri di, sundru di, tei belai khe kwmam di, ámang-chímang wng di hwnwi Subraiyung sa-o,

¹³tamni hwn khe ani bororok mungnwi akol sitra tong kha: bórok ano yakar kha, twimuk kwthangni twino khibiui sak sak twikhor khur lai kha, a twikhoro twi kwcha ya.

¹⁴Israil ba tamo seleng da? Bo ba khoroksa selengni bwsa seleng da? Hakhe tamni bagwi bo sekjaknai wng kha ba?

¹⁵Singhorok bono naharwi sokromo. Bórok chirigwi pungo. Bórok bini hano bukcha khlai kha. Bini kamiyungrok bái bai kha, aro-o bororok tongnai kwrwi kha.

¹⁶Moph tei Tapanhesni bwsarokbo nini bokhorokni motokno swbai rw kha.

¹⁷Subraiyung Kaitor norokno lama tẃi tẃiwi tong phuru, bono khibiui sak sakno norok omono tubuma klai ya diba?

¹⁸Tabuk norok Nil twimani twi nungna bagwi ha Ijibo thángwi tamo man kha ba? Eba Uphratisni twi nungna bagwi Asiriya-o thángwi norok tamo man kha?

¹⁹Norokni samung hamya norokno sátoknai, tei norok ani oroni kiphilmano norokno kulnai, hakhe Subraiyung nini Kaitorno khibimani abo bwswk se hamya sitrano abono si di; norok ano kiri li ya gwja hwnwi phankrak Kaitor sa-o.

²⁰Bisi kwbángma swkang’-no nwng horbakno swbai kha, tei nini dwkhwino sachu kha. Phiya nwng hai hwnwi sa kha, “Ang nono mon li ya!” Sak phalnai hai khe nwng hathái kuchukma tei bebak buphang kwkhrang yaphango sakno rwui khulum kha.

²¹Ang nono sói angur bwchlwi kaham’-no hwnwi káimani ba bahai khe hamya wng lang tei bolongni angur ba kha lang?

²²Nwng sakno chakhwi bai tei kwbángma sapan bai sú phano nini majrani mari tabukbo ang nugwi tongo, hwnwi Subraiyung Kaitor sa-o.

²³Nwng bahai khe sakno dera ya kho tei ang Bal mwtairokni aro tháng ya hwnwi saui man de? Nahar di harung bwkhak nini lamano, saui man di nwng tamo khlai kha, mangingang bwrwi bo bini bolongni lamano sini-o.

²⁴Bolongni koraichirka bwrwi bini sak muchungwi hasing haphar tẃi tungphlajagwi[2] lama-o khachigwi tháng phuru sabo bono kebengwi mannai tong? Bono naituknai butuarok, lengprana nang glak bini sak muchungma jora-o khe bono haino se mannai.

²⁵Nini yakungno ta leng rw si di tei nini totrano twi ta kang rw si di. Phiya nwng sa-o, omo mungsa chúk ya! Tamni hwn ba ang sini ya mwtairokno se hamjago tei ang bórokno se ma rwktharnai. Norokni Subraiyung Kaitorno yakarmani bwswk se hamya tei sitra. Norok ano kiri li ya hwnwi kwplaisa Subraiyung Kaitor sa-o.

²⁶Sikhok manjagwi ma lachima hai kheno, Israil núkhungbo omo hai khe’-no lachimung mannai, bórokni habugrarok bórokni tẃiphangrok, bórokni ochairok tei bórokni diyarirokbo lachimung mannai.

²⁷Buphangno sabo, “Nwng’-no ani apha” tei holongno “Nwng se ano bá-o” hwnnai? Tamni hwn khe bórok ani phaising mwkhang khlai li ya phikung se khlai si-o. Tamo khe bórokni saka-o digi-sigi sók phai phuru khe, “Phaiwi chwngno mwthang phai ja si di!” hwnwi sa-o.

²⁸Norok sak sak tak laimani a nini mwtairok biyang wng bai kha? Bórok phaiwi norokni o digi-sigi-o norokno mwthangwi man khe mwthang phai thung; Juda-o norokni kamiyungrok bángsak’-no mwtairokbo báng kha.

²⁹Norok tamni ano hamya sa lai? Norok bebakno ano kebeng lai kha; hwnwi Subraiyung sa-o.

³⁰Ang nini chwrairokno haino se swprakma klai si-o; bórok phrwngmano yachak li ya gwja. Norokni sakni sengno sak sakni diyarirokno akarjak singho hai khe buthar laiwi pái kha.

³¹Nwng tei o bosongrok Subraiyungni kókno khna di. Ang ba Israilni thani hasinglwng diba? Eba mwnakma ha diba? Hakhe tamni bagwi ani bororok ba, “Chwng phiyókjak, chwng nini thani tei phai glak,” hwnwi sa lai?

³²Bwrwi khoroksa bini rangchakni kanmungno poda pok ba, eba hamjwk kwtal bini rí-chumno poda pok ba? Phiya ba ani bororok sal kwbángma ano pok kha.

³³Nwng bwswk khir-khir khe nini hamjakma bwrwino naituk! Abo hai kheno tongmung sitra bwrwirokno bo nini lamano phrwng kha.

³⁴Nini rírogobo bigra kosongrokni thẃi nangjak; bórokno sikhok hap phaima bo nuk ya. Omo hairokni bisingo bo

³⁵nwng hai hwnwi sa-o, “Ani majra kwrwi, kubui’-no bo ano joli ya.” Nai di “Ani sumsok kwrwi” hwnwi samani ang nono tabuk buj thumnai.

³⁶Bahai khe nwng sak nang yaui nini uansukmano slái! Nwng Asiriya bai lachi rwjakma hai khe Ijip bai bo lachi rwjaknai.

³⁷Nwng aroni bokhorokrokno yakarwi ma kiphilnai, tamni hwn ba nwng khá berama borokno Subraiyung khibi kha tei nwng bórokni bising tẃi hamwi-chaui man glak.