Read Kok Borok JIRIMIA 28 Bible Online

JIRIMIA 28 - Kok Borok bible

JIRIMIA 28

¹Jedekia Judani habugra chámani bisi-o, nokha bisik brwini, talbani talo, Gibeono tongnai Ajurni bwsajla Hanania diyari Subraiyungni nogo ochairok bai bebak borokni bwskango ano o kók sa kha.

²Sengkrakrokni Subraiyung, Israilni Kaitor hai hwnwi sa-o, “Ang Babilonni habugrani horbakno swbai kha.

³Babilonni habugra Nebukadnejar Subraiyungni nokni Babilono tlangmani, oroni bebak kwthar manwirokno nokha bisik nwini bisingo’-no kiphilwi tubu anw.

⁴Ang Judani habugra Jehoiakimni bwsajla Jekonianobo tei Judani simi Babilono khaui tlangjaknai bebak bororokno, kiphilwi tubunai hwnwi Subraiyung sa-o; tamni hwn khe, ang Babilonni habugrani horbakno swbaiwi khibinai.”

⁵Hakhe Jirimia diyari ochairokni tei Subraiyungni nogo bachaui tongnai bebak bororokni bwskango Hanania diyarino kók sa kha;

⁶hakhe Jirimia diyari hai hwnwi sa kha, “Amen! Subraiyung abo haino khlai thung; Subraiyungni nokni kwthar manwirok tei bebak khaui tlangjak bororokno Babilonni oro kiphilwi tubuna hwnwi nwng kók diyari samano Subraiyung nang rw si thung.

⁷Hai phano ang nono samani tei bebak bororokno samani kókno tabuk khunju kai di.

⁸Nono tei ano bisi kwbángma swkang’-no, kwbángma dopharok tei harok, choba, asari tei bok manjak anw hwnwi kók diyari sa lang kha.

⁹Tong kwchangni kók diyari pírmani abo nang phai phuru khe kubui’-no, Subraiyungno o diyarino rohoro hwnwi saui man anw.”

¹⁰Aphuru Hanania diyari Jirimia diyarini gwdnani horbakno na kha hakhe aro’-no swbai khibi kha.

¹¹Tei bebak bororokni bwskango Hanania hai hwnwi sa kha, “Subraiyung hai hwnwi sa-o: Nokha bisik nwini bisingo’-no Babilonni habugra Nebukadnejarni horbak dopharokni bangorani horbakno swbaiwi khibinai.” Tamo khe Jirimia diyari ulo aroni kutulwi tháng kha.

¹²Aboni kisa ulo khe Hanania diyari Jirimia diyarini gwdnani horbak swbai rw kha, hakhe Jirimiani thani Subraiyungni o kók sók phai kha.

¹³Nwng Hananiano thángwi hai hwnwi saui di, “Nwng buphangni horbakno se swbai-o, tamo khe tabuk ang buphangni jidolo sorni horbak se boksinnai.”

¹⁴Tamni hwn khe sengkrakrokni Subraiyung Israilni Kaitor hai hwnwi sa-o, ang o bebak dopharokno Babilonni habugra Nebukadnejarni seleng khati rwna bagwi bórokni gwdna saka-o sorni horbak boksa kha, bórok kubui’-no bini seleng ma khatinai tei bolongni mal-mataroknobo ang bini kók ma khnanai khlai anw.

¹⁵Hakhe Jirimia diyari Hanania diyarino hai hwnwi sa kha, “O Hanania khna di, Subraiyung nono rohor ya, phiya nwng o bororokno kók tatalno poito chá rw kha.”

¹⁶Aboni bagwi Subraiyung hai hwnwi sa-o: “Nai di ang nono o ha sakani norwi khibi anw. O bisini bisingo’-no nwng thwinai, tamni hwnma le nwng Subraiyungno belai khe kebeng kha.”

¹⁷A bisi-o’no nokha talsnini talo Hanania diyari thwi kha.