Read Kok Borok JIRIMIA 31 Bible Online

JIRIMIA 31 - Kok Borok bible

JIRIMIA 31

¹Subraiyung hai hwnwi sa-o, “A jora-o ang bebak Israilrokni bosongni Kaitor wngnai tei bórok ani bororok wng bai anw.”

²Subraiyung hai hwnwi sa-o; choba-o yógwi tong rwknai Israilrok lenglana tháng phuru-o hasing hapharo khairokma man kha.

³Hakchalo tongwi Subraiyung bórok bai nukjak kha, ang norokno mol brúmni bagwi hamjak kha; aboni bagwi ang norokno sói kubui khe kók rwmani tẃi’-no tongo.

⁴O kwtharjwk bwrwi sikla Israil! Ang nono haino hai songcha phinai, hakhe nwng snamwi tisajak phir anw. Nwng haino hai nini khamrok tam phir anw. Tei tongthogwi mwsa phi anw.

⁵Samariani hatháirogo nwng haino hai angur bwlwngrok khlai phir anw; angur buphang kainairok bórok bini bwtháirok ma chá anw.

⁶Omo hai salrok sók phai anw aphuru Ephraim hathái saka mwrwknairok chirikhógwi hai hwnwi sa anw; “Bacha di him di tho, chwng Siyono chini Kaitor Subraiyung Kaitorni thani tháng lai anw.”

⁷Tamni hwn khe Subraiyung hai hwnwi sa-o: “Jakobni bagwi norok khorang khlai tongthogwi rwchap lai di, tei dophani bokhorokni bagwi khorang kotor khlai di; auai khlai di, lobwi hai hwnwi sa di, Subraiyung, Israilni tong rwknai bororokno mwthang kha.”

⁸Nai di, ang bórokno salsibai bwkhakni hani tubu-ui phai anw, hani páithak bwkhakni bórokno tubu-ui phai anw. Bórok phula, khora, sakderiya tei sak keng tẃi-keng tẃi bwrwirok bai pal wngnai; bodol kotorma oro kiphilwi phainai.

⁹Bórok kap twtwi phai lainai tei bwkha kwchang rwma bai ang bórokno kiphilwi tlang anw, ang bórokno twisa rukung tẃi khe him rwnai, kepleng lama tẃi him rw anw, a lama-o bórok thutai glak; Tamni hwnma le ang Israilni bupha, tei Ephraim ani tháiskangni sajla.

¹⁰O dopharok, Subraiyungni kókrokno khna jabai di, hakchalni twijlang rukungni harogo omo auai khlai rw di, hakhe hai hwnwi sa di: “Israilno piring-poroi khlainairokno bo’-no ma thum anw, tei mera mwrwknai bini mera gutno mwrwkma hai’-no bo bórokno ma mwrwknai.”

¹¹Tamni hwnma le Subraiyung Jakobni bagwi suna nangmano su-ui rw kha, tei bini thani yókna bagwi rwthai tongmano rwui phiyók kha.

¹²Bórok khorang kotor khlaiwi Siyonni kuchugo phaiwi rwchap lai anw, bórok Subraiyung rwma manwi bai mai-khul bai, angur bwtwi bai, thok bai, mal-matani bwsarok bai mera bodolrok bai khe hamchanai, bórokni phola twi lujak tháiblwng hai wngnai; bórokni bwkha tei mokna nang phlai glak.

¹³Hakhe bwrwirok tongthogwi mwsa lainai, chwla siklarok bai chakrarokbo thansa khe tongthogwi mwsa lainai. Ang bórokni khá khammani-o tongthok khlai anw, ang bórokno bwkha srang rw anw, tei khá hamya wngwi tongma-o tongthok rw anw.

¹⁴Ang ochairokno kwbángma manwirok rwui ok kupulung khlainai, tei ani bororok ani hamari bai khe bwkha kochomnai, hwnwi Subraiyung sa-o.

¹⁵Rama-o kapsimang tei khá nangwi kapmani khorang khna kha, Rahel bini bwsarokni bagwi kabwi tongo, bwsarok thwi tháng baima bagwi bo khá methep rwjakna nai li ya.

¹⁶Subraiyung hai hwnwi sa-o; “Nini kapmani khorang mwthak si di nini mokolni muktwi thak di; tamni hwn khe nini samungni bagwi nwng sokat rwjak anw hwnwi Subraiyung sa-o, tei bórok bórokni kena arini hani kiphilwi phai anw.”

¹⁷Nini thinangni bagwi khatungma tongo hwnwi Subraiyung sa-o; tei nini bwsarok bórokni baithangni ha-o kiphilwi phai anw.

¹⁸Ang Ephraim hai hwnwi kengaimano khna kha; “Nwng ano kók khna ya musuk bwsano phrwngma hai khe phrwng kha; ang mwthangjakna tẃi khe, ano kiphilwi tubu di, tamni hwn khe nwng se ani Subraiyung Kaitor.

¹⁹Phiya lama koróma ulo, ang bwkha kiphilwi phai kha; ang phrwngjakmani yagulo ani yaphungo bú kha; ang lachimasingcha wng kha tei cha ya manjak kha, tamni hwn khe sikla jorani mung hamyarok ang ma ruju kha.”

²⁰Ephraim ani khájani sajla diba? Bo ani khásukni bwsa diba? Ang bono hamya hwnwi sa phano, tabuk bo ang bono muitu khlai-o. Aboni bagwi ani bwkha bai bono khátango; ang kubui’-no bono khairogo hwnwi Subraiyung sa-o.

²¹“Nini bagwi lama phunuknai marirok khlai di, tei lam phunuknai thonglarok kái di; nwng thángmani a lahar kotorno kaham khe bwkha-o chongwi na di, o bwrwi kwthar Israil kiphil di, nini kamiyungrogo kiphilwi phai di.

²²O uslunai bwrwima, nwng tei bwswk ayang-uyang wng sinai? Tamni hwn khe Subraiyung o ha-o, kaisa manwi kwtal snam kha, bwrwima khoroksa chwla khoroksano kitingwi tongo.”

²³Sengkrakrokni Subraiyung, Israilni Kaitor hai hwnwi sa-o; “Ang bórokno khaui tlangjakmani kiphilwi tubu-ui phai phuru khe bórok bini kamiyungrogo o kókno ma sa anw,” “Subraiyung nono hamari rwnai, o sói kubui khe tongnairokni tongthai, o hathái kwthar, Subraiyung norokno hamari rw thung.”

²⁴Juda bai bini bebak kamiyungrok, tei haba khlainairok bai mal-mata mwrwknairok aro o thansa khe tong lai anw.

²⁵Bwkha-o lengjak borokno ang khá kochom rwnai tei kebel bororokno khe bwkha srang rw anw.

²⁶Aphuru ang sichaui ayang-uyang naisik kha tei ang muktrwi kaham manẃi srangwi bacha kha.

²⁷Nai di, ang Israil bai Judani núkhungrogo borok bai mal-matarokni bwchlwi sarnani salrok sók phai tong kha, hwnwi Subraiyung sa-o.

²⁸Jora-o ang bórokno phuicha-o tei swbai-o, khitarwi rohoro sokomoro tei hamyarok khlai tẃi’-no ang bórokno songchanani tei kainani bagwi naikolnai hwnwi, Subraiyung sa-o.

²⁹Aphuru bororok tei hai hwnwi sa lai glak; “Buma bupha song khe ba angur kwkhwi chá lai kha, hakhe bwsarok khe ba bua khwijak kha.”

³⁰Phiya ba bebakno sak sakni sumsokni bagwino ma thwinai; aboni bagwi angur kwkhwi chánai borokni’-no buabo khwinai.

³¹“Nai di Israilni bosong tei Judani bosong bai ang kwtal khe swmai tangna salrok sói’-no phaiwi tongo hwnwi Subraiyung sa-o.

³²Ijip hani bórokni chuchu songrokno yak romwi ha Ijipni tikhlaiwi tubu-ui phai phuru ang bórokni chuchu song bai swmai tang kha, o swmai kwtal a swmai hai wng glak, ang bórokni bugra phano bórok ani swmaino swbai kha, hwnwi Subraiyung sa-o.

³³Phiya a salrokni ulo ang Israil bosong bai o swmai kwtal tang anw hwnwi Subraiyung sa-o; ang bórokni bisingo ani raidarokno ton anw tei bórokni bwkha-o abono swiwi ton anw; hakhe ang bórokni Kaitor wngnai tei bórok ani borok wngnai.

³⁴Phiya khoroksa tei khoroksa nok arini borokno phrwng glak tei khoroksa tei khoroksa takhukno ‘Subraiyungno sini di’ hwnwi phrwng glak tamni hwn khe bórok bebak’-no borok kotor borok kusu ano sini anw, hwnwi Subraiyung sa-o, aboni bagwi ang bórokni sumsokno nakar anw tei bórokni sumsokno tei muitu khlai glak.”

³⁵Subraiyung hai hwnwi sa-o, salo pohor rwna bagwi salno tei horo pohor rwna bagwi tal bai athukirirokno daginai, twijlangni twino twi aphal pupak rwui bono kutuk rwnai sabo? Sengkrakrokni Subraiyung wng kha bini mung;

³⁶tumungno o dagimungno ani bwskangni thángwi pái khe, hakhe Israil bosongbo mol brúmni bagwi dopha wngwi ani bwskango tongwi man phlai glak.

³⁷Subraiyung hai hwnwi sa-o; tumungno sakani nokhano su-ui man khe, tei hani yaphangno naitugwi kariui man khe, hakhe bórok bebak o samung khlaima bagwi ang Israilni bebak bosongrokno Khibiui rwnai hwnwi Subraiyung sa-o.

³⁸“Nai di, Subraiyung hai hwnwi sa-o, omo hai salrok sói’-no phai tongo, aphuru Hananelni simi busuni duglam jora-o kamiyungno Subraiyungni bagwi snam phirjak anw.

³⁹Sujaknai buduk aroni simi kepleng khe Gareb hachuk jora sógwinai, hakhe aroni khe Goa phaising khonwi thángnai.

⁴⁰Mang kwthwi bai thaplarok khibima bebak harung tei Kidron twisa jorani haphar jora, salkabaini korai duglam busu jora, Subraiyungni bagwi kwthar wngnai. Abo kusung kusungni bagwi phuichajak glak tei khibijak glak.”