Read Kok Borok JIRIMIA 34 Bible Online

JIRIMIA 34 - Kok Borok bible

JIRIMIA 34

¹Babilonni habugra Nebukadrejar tei bebak bini sengkrakrok hayungni bebak harok tei bo bai naikoljak hani bebak bororok, Jerusalem tei bini gana-gini kamiyungrok bai choba nang lai tong phuru Subraiyung Jirimiano o kók sa kha;

²“Subraiyung Israilni Kaitor hai hwnwi sa-o: Tháng di, Judani habugra Jedekia bai kók-lam sa laiwi bono ‘Subraiyung hai hwnwi sa-o hwnwi sa di; nai di ang o kamiyungno Babilonni habugrani yago yapharwi rwnai tei bo abono hór bai sóknai.

³Nwng bini yakni khárwi yógwi man glak, phiya nwng romjaknai tei bini yago yapharwi rwjaknai; nwng nini mokol baithang’-no Babilonni habugrano nuk anw tei mwkhang nahar lalai khe bo bai kók ma sa lai anw; hakhe nwng Babilono tháng anw.’

⁴Hai phano o Judani habugra Jedekia, nwng Subraiyungni kókno khna di! Subraiyung nono tẃi hai hwnwi sa-o; ‘Nwng seng bai butharjak glak.

⁵Nwng kaham kheno thwi anw. Nini slái swkang habugra tong langnai nini chuchusongno bórom khlaiwi satrai motom sókma haino nini bagwi bo abo hai kheno satrai motom sókjaknai. Bórok nini bagwi “Chini bugra thwi ja kha” ’ hwnwi muisubuk cháui kap lainai hwnwi ang Subraiyung o kókno sa-o.”

⁶Hakhe Jirimia diyari Jerusalemo Judani habugra Jedekiano o bebak kókrokno sa kha.

⁷Babilonni habugrani sengkrakrok Jerusalem bai tei Judani bebak tong rwknai kamiyung Lakhis tei Ajeka bai choba khlai kha; tamni hwn khe o khungnwi kwrak kuk kamiyung simi se tong rwk si-o.

⁸Habugra Jedekia, Jerusalemni bebak bororok bai bórokno phiyókna bagwi kók kha lai kha, aboni ulo Jirimiani thani Subraiyungni kók sók phai kha.

⁹Bebakno sak sakni Hibru seleng tei selengjwkrokno ma phiyóknai; khoroksa phano bini sakni Juda takhukno seleng khlai tonwi man glak.

¹⁰Hakhe bórok bebakno khna bai kha, tangphangrok tei bororok o swmaino lonwi bórokni seleng tei selengjwkno phiyógwi ma rwnai, hakhe bórok tei seleng khlaijak phi glak kha; bórok kók khna kha tei bórokno phiyógwi rohor kha.

¹¹Tamo khe bórok ulo haino hai uslu phir kha, selengrok tei selengjwkrokno nahor phi kha tei bórokno tubu-ui seleng khati rw phi kha.

¹²Aboni bagwi Subraiyungni aroni Subraiyungni kók Jirimiani thani sók phai kha.

¹³Subraiyung Israilni Kaitor hai hwnwi sa-o: Ijip ha-o seleng khátiui tongmani yakni bórokno phiyógwi tubu phuru ang norokni chuchusong bai hai hwnwi swmai tang kha,

¹⁴“Khoroksa swk Hibru takhuk nini thani phaljagwi phai khe tei bo nokha bisidok nini thani seleng kháti phai khe hakhe nokha bisisni-o bono phiyógwi ma rohornai.” Phiya norokni chuchusong ani kókno bwkhabo rw li ya tei khunjubo kái li ya.

¹⁵Sal kisa swkang norok bwkha kiphilwi ani mokolo chajakma tẃi’-no khlai lai kha. Norok bebakno sak sakni takhukno phiyókna hwnwi sakhlai kha. Tei ano khulumma nogo ani bwskango norok swmai tang lai kha.

¹⁶Phi ya norok tabuk uansukma slái lai kha tei ani mungno hamya khlai kha, norok bebakno sak sakni muchung thani’-no tháng thung hwnwi phiyógwi rohormani seleng selengjwkrokno kiphilwi tubu-ui haino hai norokni seleng khati rw phi kha.

¹⁷Aboni bagwi Subraiyung hai hwnwi sa-o: Norok ani kók khna li ya gwja; norok norokni takhuk tei nok arirokno yókjak hwnwi sakhlaimano kók narwk li ya. Hakhe ang tabuk norokno choba-o, bemuk hamya-o tei asari-o phiyógwi rw kha, hwnwi Subraiyung sa-o. Ang norokno hayungni bebak bororokni thani kirimasingcha khlai anw.

¹⁸Ani thani swmaini kókno narwk ya tei swbainairokno bórok musuk bwsano ratharwi khaknwi khlaiwi khakma hai khe angbo khlainai;

¹⁹Judani habugrani bwsarok, Jerusalemni habugrani bwsarok, tangphangrok, ochairok tei musuk bwsa khaknwi khlaijakni kwchar tẃi himwi láinai hani bebak bororok,

²⁰bórokno bórokni arirokni yago tei bórokno butharna nainairokni yago yapharwi rwjaknai. Bórokni mang kwthwirok khe nokhani tokrokni tei bolongni mal-matarokni chámung wngnai.

²¹Ang Judani habugra Jedekia bai bini bugrani bwsarokno bórokni arirokni tei bórokno butharna nainairokni yago yapharnai. Norokni aroni rosaui tlangjaknai, Babilonni habugrani sengkrakni yago yapharwi rwnai.

²²Nai di ang dagiui rwnai hwnwi Subraiyung sa-o tei ang bórokno o kamiyungo kiphilwi tubunai; hakhe bórok o kamiyung bai nang laiwi omono yago naui hór bai sógwi rwnai. Ang Judani bebak kamiyungno swbaiwi khibijak bororok tong ya khlainai.