Read Kok Borok JIRIMIA 35 Bible Online

JIRIMIA 35 - Kok Borok bible

JIRIMIA 35

¹Josiani bwsajla Jehoiakim, Judani habugra cháui tong phuru Subraiyung Jirimiano hai hwnwi sa kha:

²Nwng Rekabsasongni nogo thángwi bórok bai kók-lam sa laiwi Subraiyungni nokni kaisa khotolo bórokno tubu-ui phai di; hakhe bórokno angur bwtwi nung di hwnwi yaphar di.

³Hakhe ang Habasiniani busuk Jirimiani bwsajla Jasaniano bini takhuksongno bini bebak bwsarokno tei Rekabsongni núkhungni bebak bororokno tubu-ui phai kha.

⁴Ang bórokno Subraiyungni nogo Kaitorni borok Igdaliani bwsajla Hananni khotolo tlangwi tháng kha, abo wng kha Salumni bwsajla duglam mwrwknai Maseiani khotolni saka-o tongnai tangphangrokni khotol gana-o.

⁵Hakhe ang Rekabsongni bwskango angur bwtwi kupulung golarok bai khurirok beraui bórokno “O angur bwtwino nung di” hwnwi sa kha.

⁶Phiya bórok hai hwnwi sa kha, “Chwng angur bwtwi nung glak, tamni hwnma le chini chuchu Rekabni bwsajla Jonadab chwngno, ‘Norok tei norokni chwrairokno uáisa phano angur bwtwirok ta khan rw di;’ hwnwi dagi kha,

⁷tei norok nokbo ta tang di; maichwlwi bo ta sar di; angur bo ta kái di tei bari bo ta khlai di phiya norok thwi yasakno ríni nogo’-no tong di tamni hwn khe nwng tong phaimani ha-o sal kwdwk tongwi mannai.’

⁸Chini chuchu Rekabni bwsajla Jonadab dagimano bebak kókrokno chwng khnaui phai kha; chwng chini hik-saroknobo uáisa phano angur bwtwirok khan li ya,

⁹tei tongna bagwi nokrokbo tang li ya; chini angur bari, eba haphar tei bwchlwirok bo kwrwi;

¹⁰phiya chwng ríni nogo’-no tong lai-o tei chini chuchu Jonadab dagima tẃi’-no kók khna laiwi abo hai kheno tong lai phai-o.

¹¹Phiya Babilonni habugra Nebukadrejar achomsa hano kebengwi bachaui phai phuru chwng hai hwnwi sa lai kha, ‘Phai di chwng Kolodia bai Siriyani sengkrakno katiui Jerusalemo tháng lai anw.’ Hakhe aphuruni simi’-no chwng Jerusalemo tongwi lai kha.”

¹²Hakhe Subraiyung Jirimiano hai hwnwi sa kha;

¹³Sengkrakrokni Subraiyung, Israilni Kaitor hai hwnwi sa-o; Judani bororokno tei Jerusalemni bororokno thángwi saui di, norok ani phrwngmano tei ani kókrokno yachak ya da tamo? hwnwi Subraiyung sa-o.

¹⁴Rekabni bwsajla Jonadab bini bwsarokno, angur bwtwi ta khan di hwnwi dagi kha, hakhe bórok a tholmano khna lai kha. Bórokni chuchusongni dagimano khnaui tabuk bo angur bwtwi nung lai ya. Phiya ba ang norokno cho yaui sa máng tong phano norok ani kókno khna li ya.

¹⁵Ang ani bebak seleng diyarirokno norokni thani rohor máng tong kha. Bórok hai hwnwi sa kha, “Norok sak sakni lam hamyarokno khibi di tei norok kubun mwtairokno monna bagwi bórokno ta rwkthar di. Hakhe se norokno tei norokni chuchusongno rwmani a ha-o norok tongwi mannai.” Phiya norok ani kókno khunju-o kan li ya tei bórom bo khlai li ya.

¹⁶Rekabni bwsarok tei Jonadabni bwsarok bórokni chuchusong bai dagijakmarokno khnaui phai lai-o, phiya o bororok hwn khe ani kókno khna lai li ya gwja.

¹⁷Aboni bagwi Subraiyung, sengkrakrokni Kaitor, Israilni Kaitor hai hwnwi sa-o; nai di ang Juda bai Jerusalemo tong bainairokni saka-o ang khúk bai sakhlaimani bebak hamyarokno bórokni saka-o tubunai. Tamni hwn ba ang bórokno sa kha, hai phano bórok khna li ya tei ang bórokno ring kha, hai phano bórok khorang yachak li ya gwja.

¹⁸Tamo khe, Rekabni núkhungni bororokno Jirimia hai hwnwi sa kha; “Sengkrakrokni Subraiyung, Israilni Kaitor hai hwnwi sa-o: Norok norokni chuchu Jonadabni dagimano khna kha tei bo bebak dagima tẃi’-no tong lai kha tei bo dagimani bebakno khlai bai kha,

¹⁹aboni bagwi Sengkrakrokni Subraiyung Israilni Kaitor hai hwnwi sa-o; Rekabni bwsajla Jonadab ani bwskango bachana bagwi borokni biyal wng glak.”