Read Kok Borok JIRIMIA 36 Bible Online

JIRIMIA 36 - Kok Borok bible

JIRIMIA 36

¹Josiani bwsajla Jehoiakim Judani habugra chámani nokha bisik brwi-o Jirimiani thani Subraiyung hai hwnwi sa kha;

²nwng dolwi tonmani bijap kangsa na di tei Josia habugra wng phuruni simi tini jora-o Israilrokno tei Judarokno tei bebak dopharokno kebengwi ang nono samani a salni simi aswk samarokno nwng aro swi di.

³Ang Judani bororokni saka-o aswk hamyarok tubuna hwnwi uansugwi tongmano bórok khnaui bórokni lam hamyani kiphilwi phano phaimano, hakhe ang bórokni cha ya tei sumsokno nakarnai.

⁴Hakhe Jirimia Neriani bwsajla Barukno ring kha tei Jirimiano Subraiyung samani bebak kókrokno Baruk bodol bijabo Jirimia Subraiyung bai sajakma hai kheno swi kha.

⁵Jirimia Barukno dagiui hai hwnwi sa kha, “Ang Subraiyungni noktharo habwi man ya, ang kasujak se.

⁶Hakhe nwng se thángwi ani khukni khnaui o bijabo swimani, Subraiyungni bebak kókrokno ok bukcha tongma salo, Subraiyungni noktharo tong bainai bororokno khna rwui pori di. Tei nwng Judani kamiyungni phai bainai bebak bororoknobo omono poriui khna rw di.

⁷Bórokni koiwi surima Subraiyungni thani sógwi phano mano tei bórok bórokni lama hamyani kiphilwi bo phaiwi mano, tamni hwn khe Subraiyung o bororokno belai khe joliui kók sakhlai kha.”

⁸Hakhe Jirimia diyari Neriani bwsajla Barukno pori di hwnwi dagimarokno bo bebakno khlai bai kha. Bo Subraiyungni nogo o bijabo swijak Subraiyungni kókrokno pori kha.

⁹Josiani bwsajla Jehoiakim Judani habugra chámani nokha bisik ba káui talchukuni talo Jerusalemni bebak bororok, Judani kamiyungrokni Jerusalemo phainai bebak bororok Subraiyungni thani ok bukcha tong laina hwnwi sakhlai kha.

¹⁰Aphuru Baruk Subraiyungni nogo Saphanni bwsajla Gemaria tang okrani khotolo Subraiyungni noktharni kwtal duglam hapmani sakani nokhla-o o bijapni Jirimiani bebak kókno bororokno poriui khna rw kha.

¹¹Saphanni busuk Gemariani bwsajla Mika o doljak bijapni Subraiyungni bebak kókrokno khna khe,

¹²bo noyungni tang okrani khotolo tokhlai tháng kha; aro bebak tangphangrok achuk laijak; aro Elisama tang okra, Semiani bwsajla Delaia. Akborni bwsajla Elnathan Saphanni bwsajla Gemaria, Hananiani bwsajla Jedekia tei bebak tangphang adongsongrok achuk laijak.

¹³Baruk bororokno a bijapno poriui khna rw kha, aphuru Mikaia a khnama kókrokno bebakno bórokno saui khna rw kha.

¹⁴Hakhe bebak adongrok Nethaniani bwsajla Jehudino, Barukni thani hai hwnwi saui rohor kha, “Nwng bororokno pori rwmani a bijapno yago tubu-ui phai di.” Hakhe Neriani bwsajla Baruk bini yago a bijap bodolno naui bórokni thani phai kha. Nethania khe Selemiani bwsa, Selemia khe Kusini bwsa.

¹⁵Tei bórok bono hai hwnwi sa kha, “Achuk di, chwngno omono poriui khna rw ja di.” Hakhe Baruk abono bórokno poriui khna rw kha.

¹⁶Bórok o kókrokno khna bai khe, kirijagwi khoroksa tei khoroksano naisik lai kha, hakhe Barukno hai hwnwi sa kha, “Chwng o kókrokno kubui’-no habugrano ma sauinai.”

¹⁷Hakhe bórok Barukno hai hwnwi sẃng kha, “Tabuk chwngno sa di, nwng bahai khe o kókrokno swi kha? Omo khe tamo bini khukni khnaui swima da?”

¹⁸Baruk bórokno hai hwnwi sa kha, “Bo khúk bai o bebak kókrokno ano sa kha tei ang abórokno swikong bwtwi bai o bijabo swi narwk kha.”

¹⁹Aphuru khe tangphang adongsongrok Barukno hai hwnwi sa kha, “Nwng, Jirimia bai huijagwi tongwi lai di tei khoroksano phano norok tongmano saui ta man rw di.”

²⁰Bórok tangphang Elisamani khotolo bijapno klangwi habugrani nokhla-o tháng lai kha tei bebak kókrokno habugrano saui khna rw kha.

²¹Hakhe habugra a bijapno naharna bagwi Jehudino rohor kha tei tangphang Elisamani khotolni abono tubu-ui habugra tei bini samo bachaui tongnai bebak tangphang adongrokni bwskango abono poriui khna rw kha.

²²Abo wng kha talchukuni tal, habugra masing molo tongma nogo bini bwskango hór mwchẃngjak thapa chwla bwskango achukjak.

²³Jehudi rem tham rem brwi pori bai kheno habugra sengsa bai raui abono thapa chwlani hóro khitarwi rohor kha. Omo hai khe bebak bijap nono hóro sógwi pái kha.

²⁴Habugra bai bini selengrok o kókno khna phano kibo kirijak ya tei bórokni rí-chumrok bo sichik lai li ya.

²⁵Elnathan, Delaia tei Gemariasong habugrano a bijapno ta sók di hwnwi koiwi sa phano bo bórokni kókno khna li ya.

²⁶Hakhe habugrani bwsajla Jeramilno, Ajrielni bwsajla Seraiano tei Abdilni bwsajla Selemiasongno tangphang Baruk bai Jirimia diyarino romna bagwi dagi kha. Phiya ba Subraiyung bórokno huiwi ton kha.

²⁷Jirimiani khukni kók khnaui Baruk swiwi narwkma bijapno habugra sógwi pái khe Subraiyung Jirimiano hai hwnwi sa kha:

²⁸“Tei kangsa dolwi tonmani bijap na di tei Judani habugra Jehoiakim sókmani swkangni a bijabo swijak tongmani bebak kókrokno aro o swi phi di.

²⁹Tei Judani habugra Jehoiakimno tẃiwi nwng o kók sa di, ‘Subraiyung hai hwnwi sa-o, nwng omo hai saui o bijapno sók kha, “Tamni bagwi nwng Babilonni habugra phaiwi o hano sokomornai tei bororok bai mal-matarokno sokomornai tei hano bo sokomornai hwnwi ma sa kha?’ ”

³⁰Aboni bagwi Judani habugra Jehoiakimno Subraiyung hai hwnwi sa-o; Daudni achukthayungo achukna bagwi bini borok khoroksa phano tong glak tei bini mang kwthwi hwn khe phataro khibiui rohorjak anw tei salo hwn khe abo satung tei horo hwn khe kwchango klai tong anw.

³¹Ang bono bini bwsarokno tei bini selengrokno bórokni samung hamyani bagwi majra rwnai; ang bórokni saka-o Jerusalemo tong bainairokni saka-o tei Judani bororokni saka-o bebak hamyarok manjak rwnai hwnwi samani bórok khna ya wngmarokno bebakno bórokni saka-o tubunai.

³²Hakhe Jirimia tei kangsa dolwi tonmani bijap naui Neriani bwsla tangphang Barukno yapharwi rw kha. Baruk aro o Judani habugra Jehoiakim hóro sógwi khibima bijabo tongma bebak kókrokno Jirimiani khukni khnaui haino hai aro-o swi narwk phi kha. Abo hai kwbángma kosol kókrok bo aro o swijak kha.