Read Kok Borok JIRIMIA 37 Bible Online

JIRIMIA 37 - Kok Borok bible

JIRIMIA 37

¹Babilonni habugra Nebukadrejar Josiani bwsajla Jedekiano Judani habugra snam kha, bo Jehoiakimni bwsajla Koniani sak slái-o achukthai-o achugwi ha naikol kha.

²Phiya ba bini selengrok tei bini hani bororok Jirimia diyarini khúk tẃi Subraiyung sa rwma kókrokno khunju-o kan li ya gwja.

³Habugra Jedekia Selemiani bwsajla Jehukal bai Maseiani bwsajla Japhaniani ochaino Jirimia diyarini thani hai hwnwi saui rohor kha, “Chini Subraiyung Kaitorni thani chini bagwi kisa suri ja di.”

⁴Tabukbo Jirimia bororokni thani tháng phai khlaiwi tongo tamni hwn khe bo aphurubo alongo chopjak ya kho.

⁵A jora’-ono Pharaoni sengkrakrok Ijipni ongkhorwi phai lai kha; tei Jerusalemno gerebwi tongnai Kolodiasong a kóktma khna kheno Jerusalemno yakarwi tháng lai kha.

⁶Hakhe Subraiyung Jirimia diyarino hai hwnwi sa kha.

⁷Subraiyung Israilni Kaitor hai hwnwi sa kha: ano sẃng di hwnwi rohornai Judani habugrano nwng hai hwnwi sa di, “Nai di nono chubana hwnwi phainai Pharaoni sengkrakrok bini sakni ha Ijibo kiphil thángna naiwi tongo.”

⁸Hakhe Kolodiasong haino hai phaiwi o kamiyung bai choba nang lainai; bórok omono yago naui hór bai sógwi rwnai.

⁹Subraiyung hai hwnwi sa-o, “Kolodiasong kubui’-no chwngno yakarwi thángnai.” hwnwi saui norok sak-sakno ta bandi di, tamni hwn khe bórok norokno yakarwi tháng glak.

¹⁰Phiya norok bai choba nang lainai Kolodiasongni bebak sengkrakrokno norok mechen phano bórokni bisingni dukhu manẃi rínogo klaijak bororokno bachaui o kamiyungno sógwi rw anw.

¹¹Tabuk Kolodiani sengkrakrok, Pharaoni sengkrakno bwskango phaima nugwi Jerusalem yakarwi tháng kha.

¹²Aphuru Jirimia Jerusalemni lam rwui Benjamin ha-o aroni bororokni thani bini manthaino naharna thángo.

¹³Jirimia diyari Benjaminni duglamo thángwi sógwi khe, duglam mwrwknai Hananiani busuk, Selemiani bwsajla Irija Jirimiano hai hwnwi saui rom kha, “Nwng ba Kolodiasongni bwkhak se tháng kha bla.”

¹⁴Hakhe Jirimia hai hwnwi sa kha, “Abo kók tatal se; ang Kolodiasongni bwkhak tháng ya.” Hai phano Irija Jirimiani kókno khna li ya tei tangphang adongrokni bwskango bono romwi tlang kha.

¹⁵Hakhe tangphang adongrok jolijagwi Jirimiano bú lai kha tei Jonathan tang okrani nogo bono chobwi ton kha, tamni hwn khe abo along nokni bagwi se snamjago.

¹⁶Omo hai kheno Jirimia along hakhoro chobwi tonjak kha, hakhe bo aro sal kwdwkma ma tong kha.

¹⁷Habugra Jedekia borok rohorwi bono na rw hor kha. Tei habugra bini nogo tepsa khlaiwi hai hwnwi bono sẃng kha, “Subraiyungni mungsa swk kókrok aro to de tong?” Jirimia hai hwnwi sa kha, “Au tongo” Bo teibo sa kha, “Nwng Babilonni habugrani yago yapharwi rwjaknai.”

¹⁸Jirimia habugra Jedekiano hai hwnwibo sẃng kha, “Ang nini thani nini selengrokni thani tei o bororokni thani bubo hai cha ya samung khlaima bai nwng ano alongo chobwi ton?

¹⁹‘Babilonni habugra norokni thani tei norokni ha-o phai glak’ hwnwi norokno kók diyari sanai norokni a diyarirok tabuk biyang?

²⁰Tabuk o ani habugra kotor, ani koimano khna ja di, ano tangphang Jonathanni nogo kiphilwi ta rohor ja di thwina khe ang orono thwinai.”

²¹Hakhe habugra Jedekia mwrwknairokni nokhla-o Jirimiano tonna bagwi dagiui rw kha tei kamiyungni auan pái ya sak sal brúmno auan lepsa khlaiwi auang snamnairokni lamani bono auan rwna bagwi dagi kha. Omo hai khe mwrwknairokni nokhla-o Jirimiano ton kha.