Read Kok Borok JIRIMIA 4 Bible Online

JIRIMIA 4 - Kok Borok bible

JIRIMIA 4

¹Subraiyung hai hwnwi sa-o; “O Israilrok tumungno nwng kiphil khe, nwng tumungno ani thani kiphil khe, ani bwskangni nini selengmasingcharokno khibi khe tei ayang-uyang wng ya khe,

²tei nwng hai hwnwi swmai tang khe, ‘Kaitor kubui’-no kwthang tongo kubui-o, buj sói-o tei kaham khe tong khe nwng dopharokni bagwi hamari wngnai hakhe bebak bororok phaiwi ani mungno lob lai anw.’ ”

³Abo bai’-no Subraiyung Juda tei Jerusalemno hai hwnwi sa-o, “Nini bwkhani ha kwrakno chuai di! tei busu bwlwngo nini bwchlwi kahamno ta kái di.”

⁴Subraiyungni thani norokni sak sakni bwkhano sap-sutra khlai di, wng ya khe norokni bebak sumsokrokni bagwi ani jolima butharwi man ya hór hai khe khampronai.

⁵Juda tei Jerusalem ha-o chirigwi sa di! Ha gwnangwi totro tamwi, hus khe rw di! “Thangna bagwi khár di, kamiyung kwrago khár di!”

⁶Jerusalem bwkhak kók kwchár di: Tabukno khár di! Ta ler si di! Tamni hwn ba ang salgrabaini bwkhakni kirimasingcha khe sokomornaino nini saka-o tubu-ui tongo.

⁷Dopharokno sokomornai singho masa bini hakhorni ongkhor kha. Bo nini ha phaising lam rwui thángwi tongo! Nini kamiyungrok báiwi klaijak wngnai, borok kwrwi bukcha wngnai.

⁸Aboni bagwi rí soroirok kan di tei chubo chum di, khá khamwi hai hwnwi kap di: “Subraiyungni kirimasingcha jolima chini saka’-ono tong kho.”

⁹“A salo” hwnwi Subraiyung sa-o, “Habugrarok tei tangphangrok kiriui kwlwi lainai. Ochairok tei diyarirok kirima chá bainai.”

¹⁰Hakhe ang hai hwnwi sa kha, “O kwplaisa Subraiyung nwng samani kók bai khe bórok bandijak bai kha, Jerusalemno tong kwchangni bagwi swmai tang kha. Hai phano bórokno swpragwi butharna bagwi tabuk seng se harjak.”

¹¹A jora-o bororokno tei Jerusalemno o kók sajaknai: Hachukrokni nokbar kwran hasinglwngo tongma ani bororokni bwkhak sibwi phai-o, abo mai bukubuk kobon rwui srai-srai khlaina bagwi buya,

¹²aboni bagwi ani aroni nokbar kotor phaiwi tongo. Tabuk ang bórokni bagwi bujni kók sakhlai rw-o.

¹³Nai di! Bo chumui hai khe phaiwi tongo, bini korai malkhung bangkundri hai khe phai-o: Bini korairok toling birmani slái kodo. Chwng swraimung nang kha! Chwng le komor kha!

¹⁴O Jerusalem, mwthangjakna bagwi nini bwkhani hamya sitrano sú si di. Tei bwswk hamya chapmarokno nini bisingo ton sinai?

¹⁵Danni simi khorang bai sakhlai-o tei Ephraim hachukni simi digi-sigini kók sakhlaijago.

¹⁶Dopharokno sa di; Jerusalemno sakhlai di, hakchal bwkhakni gerepnairok phai-o, bórok Judani kamiyungrok bai chobani bagwi chirigo.

¹⁷Bororok hukbarno mwrwkma hai khe, bono kiting lai kha, tamni hwn khe bo ano kebeng kha, hwnwi Subraiyung sa-o.

¹⁸“Norokni sak sakni tongmung tei samungni bagwi se norokni saka-o sók phai-o. Omo norokni majra. Omo bwswk se kwkha! Omo bwswk khe bwkha-o supla!”

¹⁹Ani bwkha hamya, ani bwkha hamya! Ani bwkha belaino kubúksaui sa-o! O, ani bwkha bwswk se kapsajak, ang siring-siring tongwi man li ya: Tamni hwn ba ang totro khorang khna-o. Ang chobani khorang khna-o.

²⁰Komorma saka komoro bebak ha báiwi klaijak. Ani ríni nokrok swbai pái baijak, swrapsani bisingo tongthai kwrwi kha.

²¹Tei bwswk ang choba nangmano naiwi tong sinai, tei totroni khorang bwswk khna sinai?

²²“Ani bororok butua gwja máng; bórok ano sini ya gwja: bórok chwrai khá siyarok; bórok simani kwrwi. Bórok hamya khlaina kwrwng, phiya kaham khlaina khe si ya.”

²³Ang hano naiwi nuk kha tei nai di, omo bebakno kurukjak mungsa kwrwi bukcha: Tei nokhabo haino, tei bórokni aro bo pohor kwrwi.

²⁴Ang hatháirokno naisigwi nai kha, nai di abórok kwlwi laijak, tei hatháirok aro-uro wng laijak.

²⁵Ang naisigwi nai ba, nai di aro tei khoroksa phano kwrwi kha, tei nokha sakani toksa-toktẃirok khárwi tháng bai kha.

²⁶Ang naikhlai nuk kha, nai di bwthái kupulung haphar tabuk hasinglwng wng kha, tei kamiyungrok Subraiyungni bwskango bini kirimasingcha jolima bwskango báiwi klaijak máng.

²⁷Aboni bagwi Subraiyung sa-o, aswk ha kotorma khibijak wngnai: Hai phano ang oro pái rw glak.

²⁸Aboni bagwi o hayung swlwgwi kapnai tei nokha bo somchanai tamni hwn ba ang o kók sa-o, ani uansukmung tongo, ani bwkha klai wng li ya tei khábo kiphil li ya.

²⁹Korai kasanairokni chiri-mokorok tei badukhung koknairok bebak kamiyungo hapnai, kamiyungo tongnairok khár bainai, bórok bolong kuthugo khár lai-o; bórok holong saka-o kasa lai-o; kamiyungrok khibijak bai kha, tei aro borok tongnai kwrwi kha.

³⁰Hakhe nwng o bukcha, nwng tamo siui jilik jalak rí-chumrok kan si, nwng rangchak-ríchak bai khe sakno naithok rwui, nini mokolo tisumu silwi naithokna nai? Nwng sak sakno naithok khlaima mungsabo chúk li ya. Nini hamjakma bororok nono yakarwi tháng bai kha, tabuk nono butharna se nai-o.

³¹Ang sak kengna phuru bwrwi khoroksa kap ma hai khna-o, swkang bwsa okra achaina phuru bini ok saui kengaima hai khna-o. Siyonni bwrwima rangma kolok khe kapma hai tei bini yak phologwi kap tẃi khe khna-o, “Ang kwrwi súk kha! Ang butharnairokni bwskango lengwi thángo.”