Read Kok Borok JIRIMIA 43 Bible Online

JIRIMIA 43 - Kok Borok bible

JIRIMIA 43

¹Jirimia bebak bororokni thani Subraiyung bórokni Kaitorni bebak kóktháirok sanani bagwi bono bórokni thani rohor kha bo a bebak kóktháirok saui pái kha hwn khe,

²Hoseani bwsajla Ajaria bai Kareani bwsajla Johanan tei bebak bororok kolok kotorrok Jirimiano hai hwnwi sa kha, “Nwng kók tatal se saui tongo. Ijip ha-o tongnani bagwi ta tháng di hwnwi sana bagwi Subraiyung chini Kaitor nono rohor ya;

³tamo khe Neriani bwsajla Baruk chwngno kebengna bagwi se nono thepa-o, Kolodiasongni yago yapharwi chwngno buthar rwnani bagwi eba Babilono khaui tlangjak thung hwnwi se khlai-o.”

⁴Hakhe Kareani bwsajla Johanan tei bebak sengkrak ojamarok tei bebak bororok, ha Juda-o tongnanino tẃiwi Subraiyung samani kókno khna li ya.

⁵Tamo khe Kareani bwsajla Johanan tei bebak sengkrak ojamarok bórok bebak dopharokni ha-o rwkhlai rohorjaknairok, Juda ha-o tongna bagwi kiphilwi phainai bebak romwi tlangjak bai kha,

⁶chwlarok, bwrwirok, chwrairok tei habugrani bwsajwksong tei mwrwknairokni bokhorok Nebujaradan, Saphanni busuk, Ahikamni bwsajla Gedaliani thani klangwi thángmani bororokno tlangwi tháng kha; phiya Jirimia bai Neriani bwsajla Barukno bo tlang kha.

⁷Hakhe bórok Ijip ha-o hap phai kha, tamni hwn khe bórok Subraiyungni kók khna li ya. Bórok Tapanheso sók phlai lai kha.

⁸Aboni ulo Tapanheso Jirimiani thani Subraiyung hai hwnwi sa kha.

⁹Nini yago holong kotor kotor tlangwi Tapanheso Pharaoni noyungni hap-lamo, lamani it tongmani bisingo phobwi di. Judarok nwng abo hai khlaimano nuk thung,

¹⁰tei bórokno hai hwnwi sa di, “Sengkrakrokni Subraiyung, Israilrokni Kaitor hai hwnwi sa-o: Ang ani seleng Babilonni habugra Nebukadrejarno tubu-ui phai anw tei a bebak holong phobwi tonmani saka-o bo bini achukthayung snam anw, phiya bo aboni saka-o bo habugrani rí swngma ríno swng anw.

¹¹Bo phaiwi Ijip hano swbai bainai, baksano bemuk hamya bai butharnai baksano rom rwui rohornai, baksano khe choba-o butharnai.

¹²Bo Ijipni mwtai nokrogo hór phnangnai; tei bo bórokno sóknai tei bórokni mwtairokno tlangwi thángnai; mera mwrwknaini sakni ríno súma hai khe bo ha Ijipno súnai; tei bo aroni kwchang kwchang khe kutul anw.

¹³Bo ha Ijipni sal mwtaini nokrokno swbaiwi khibinai tei thongla kwtharrokno sukhrupnai tei ha Ijibo tongmani bebak mwtai nokrokno hór bai sóknai.”