Read Kok Borok JIRIMIA 5 Bible Online

JIRIMIA 5 - Kok Borok bible

JIRIMIA 5

¹Jerusalemni lama kwchar tẃi ayang-uyang khachik di, ayang uyang nahar di tei mokol kai di! Lamani lamprarogo naituk di, nwng borok khoroksano phano sói khe tangnai tei kubui’-no naituknai borokno man khe, ang o kamiyungno nakarnai.

²Bórok “Subraiyung sói kubui’-no,” hwnwi sa phano, hai phano bórok tatal khe se swmai tango.

³O Subraiyung, nini mokol ba kubuino naituk ya diba? Nwng bórokno bú kha, hai phano bórok sa se sajak ya: Nwng bórokno swbai kha, hai phano srwngna nai li ya. Bórokni mwkhang holongni slái’-bo kwrak khlai kha, tei khá kiphilnani lon li ya.

⁴Ang hai hwnwi uansuk kha, “Omorok belai bigrarok, bórok butua gwja, bórok Subraiyungni lamano si ya, bórokni Kaitor nangjakmanobo si ya.

⁵Aboni bagwi ang tẃiphangrokni thani thángnai, bórokni thani thángwi sauinai; hakhe bórok Subraiyungni a lamano saui mannai, bórokni Kaitorni kerongno sinai.” Phiya ba bórok bórokni horbakno swbainai, bórok khajagwi tongmano sauiui khibinai.

⁶Aboni bagwi bolongni singho bórokno butharnai, hasing hapharni geguma phaiwi bórokno pái rwnai, mwsá sampari kamiyungni samo aro phainairokno choprokna bagwi naichomwi tongsoknai. Aroni ongkhorwi thángnairok khe uátharjak bainai tamni hwn ba bórokni sumsok belaino kwbáng, lama korónairokbo kwbángma.

⁷“Tamni bagwi ang nono nakarnai? Norokni bwsa-bẃtẃirok ano yakarwi tháng kha, tei Kaitor yarokni thani swmai tangwi lai kha. Bórokni bebak nangmarokno ang rw kha, hai phano bórok uaija lai kha, tei sak phalnairok bai máng tong lai kha.

⁸Bórok kaham khe chá rwjak kuphung korai hai khoroksa tei khoroksani bihikno manna muchungjago.

⁹Omorokni bagwi ang bórokno majra rw glak diba?” hwnwi Subraiyung sakhlai-o. omo hairokni bagwi o dopharokno ang yagul su glak diba?

¹⁰“Bórokni angur bwlwng tẃi tháng di tei phereui rwi di, phiya ba pái súgwi ta sokomor di. Bini bedekrokno tankhraiwi rwi di, tamni hwn khe o bororok Subraiyungni ya.

¹¹Israilni núkhung tei Judani núkhung bórok ani kók khna súk li ya,” hwnwi Subraiyung sakhlai-o.

¹²Bórok Subraiyungni kókno tatal khe sa kha, “Bo mungsa phano khlai glak! Chini saka-o mungsa hamya sók phai glak, chwng chobabo manjak ya tei asari bo manjak ya.

¹³Diyarirok mungsa buya nokbar hai se, bórokni thani Kaitorni kók kwrwi. Bórok sama haino, bórokni saka-o wng si thung.”

¹⁴Aboni bagwino Subraiyung Kaitor hai hwnwi sa-o, “Tamni hwn ba bororok o kókrokno sa lai-o, tabuk ang ani kókrokno nini khugo hór hai khe rw kha,” tei o bororokno buphang hai khe sógwi pái rwui rwnai.

¹⁵O Israilni núkhung ang norokni thani hakchal hani dopha kaisano tubunai hwnwi Subraiyung sa-o. Omorok sak soinai dopha, kaisa kwcham dopha, o dophani kók norok mungsabo saui man ya eba bórok samani kókrokno tamo sa romwi man ya.

¹⁶Bórokni chakhla bokhok mangkhor phiyókjak hai: Bórok bebakno phan gwnang seng kwrak máng.

¹⁷Bórok norokni maiphang-khulphangrok tei norokni chámungrok cháui páinai; norokni bwsa-bẃtẃirokno cháui páinai; norokni merarokno chánai tei nini mal-matarokno cháui páinai nini angurrok tei nini khwichang buphangrok chá bainai; norok bwkha káthonwi tongmani hamjakma kamiyungrokno seng bai khe sokomorwi páinai.

¹⁸Phiya a salrogobo, ang norokno pái súk rw glak, hwnwi Subraiyung sa-o.

¹⁹Tei norokni bororok, “Tamo wngwi chini Subraiyung chini Kaitor omorokno chini thani khlai kha?” hwnwi sa phuru-o norok bórokno hai hwnwi saui di, “Norok norokni ha-o ano khibiui kubun mwtairokno mon lai kha, aboni bagwi norok borok sini yarokno a ha-o ma monnai.”

²⁰Jakobni núkhungo omono sakhlai di, Juda-obo omono sa di:

²¹Khna di, o butua tei khá si ya bororok, mokol tongwi bo norok nuk ya, khunju tongwi bo norok khna ya gwja.

²²Subraiyung hai hwnwi sa-o: Norok ano kiri ya da? Norok ani bwskango yáskú kwlwi ya da? Ang hasingsano twijlangni ari boui ton kha, abono láiwi thángwi man ya; twini aphal torsaui phai phano, gurumui kutuk phano, abórok bárwi thángwi man ya.

²³Phiya o bororok khe buj tháisa tei bórokni bwkha khe kebengjak: Bórok uphilwi tháng kha tei kwchalma-o thángwi pái kha.

²⁴Bórokni bwkha-o, “Phai di chwng Subraiyung chini Kaitorno kiri lai anw, uatwini jora-o uatwi rw-o, masing jorani uatwi tei sachlang jorani uatwirok rwui tongo, mai khul ranani habani salrok rw kha” hwnwi sa ya.

²⁵Norokni cha yarokno omorokno phér rw kha tei norokni sumsokrokno norokni kahamrokno kwcha rwui kha.

²⁶Ani bororokni bisingo borok hamyarok nukjago: bórok buini bagwi khẃirok thono; khẃi thonwi tok romnai hai khe bororokno romo.

²⁷Tok kupulung tákhuk hai, bórokni nokrok hamya bai máng kupulung; abo bai’-no bórok kwbáng tei gwnang wng kha.

²⁸Bórok kuphungbo wng kha tei kerambo wng kha. Bórokni samung hamya bwswk jora sógwi kha bórok saui man li ya. Bórok buma-bupha kwrwi chwrairokno sói khe buj thum ya, bórok bigrarokni bagwi sói khe kók sa li ya.

²⁹Omo hairokni bagwi ang bórokno majra rw glak diba? Tei ang omo hairokni bagwi o dopharokno yagul su glak diba? hwnwi Subraiyung sa-o.

³⁰O ha-o sitra tei kirimasingcha samungrok wng kha.

³¹Diyarirok tatal khe kók diyari sa-o tei ochairok diyarirok dagima haino tẃithero, phiya ani bororokbo omo haino’-no hamjago. Phiya ba páithago norok tamo khlainai?