Read Kok Borok JIRIMIA 50 Bible Online

JIRIMIA 50 - Kok Borok bible

JIRIMIA 50

¹Subraiyung Jirimia diyarini khúk tẃi khe Babilonni kókno, Kolodia hani kókno tẃiwi samani kók:

²“Dopharokno sakhlai di tei a kókno pír di, bana tisa di tei sakhlai di. Kók khogwi ta ton di, sa di; Babilon bui bai tlangjak kha; Bel lachimasingcha khlaijak kha, Merodak bwkha bái kha. ‘Bini takjak mangrok lachi rwjak kha; takjak mwtairok swbaijak bai kha.’

³“Tamni hwn khe salsibaini dopha kaisa bono kebengwi bachaui phai kha, bo bini hano bukcha khlai anw tei aro khoroksa phano tongnai tong glak; bororok tei mal-matarokbo khár bai anw.”

⁴Subraiyung sa-o, “A molo tei a jora-o Israilsarok tei Judaisarok thansa wng anw tei kap lai twtwi phai lai anw; bórok Subraiyung bórokni Kaitorno naituk lai anw.

⁵Bórok Siyono thángmani lamano sẃng anw tei ayang phaisingo mwkhang rw anw tei hai hwnwi sa anw, ‘Phai di chwng Subraiyung bai kwrwng laiwi mol brúm brúmni bagwi swmai tang lai anw abono tei pok lai glak.’

⁶“Ani bororok kwmajak mera hai wng bai kha; bórokni mwrwknairok bórokno lama koró rw kha, hachuk sakarogo lama phér rw kha; bórok hachuk kuchukni hachuk ste o tháng lai kha tei bórok sak sakni bodolno pogwi tháng kha.

⁷Bórokno mannairok bórokno monok bai kha tei bórokni a arirok hai hwnwi sa kha, ‘Chini mungsa cha ya kwrwi, tamo khe bórok se bórokni chuchusongni khatungma Subraiyungno kubui khe bwkha bera thai Subraiyungno kebengwi sumsok khlai-o.’

⁸“Babilonni khár di tei Kolodia hani ongkhor di tei bodolo punjua hai wng di.

⁹Tamni hwn ba nai di, ang salsibai hani dopha kotorno thamchi tungphla rwui Babilonno kebengna bagwi rohor anw, bórok bono kebengwi sak sak tiyar khlai anw. Bo aroni simi’-no tlangjak anw. Bórokni chakhlarok choba kwrwng phan gwnang hai wng anw, bo yak bukcha kiphilwi phai glak.

¹⁰Kolodia segwi najak anw; bono segwi nanairok bwkha peng súk anw, hwnwi Subraiyung sa-o.

¹¹“O ani bebak manwino seknairok, norok tongthogwi tei tongthok súgwi kung chuk lai-o, bwthái bwchlwi nakna phuru musuk chaslok phor-phor khe bársanai hai tei korai chwla hai khorang mecher khe chirik laijak.

¹²Norokno ogo chunai nwma belai kheno lachimasingcha wngnai, norokno ogo chunai nwma mwkhang man ya wngnai. Nai di, bo haphar kwran hasinglwng dopharokni bisingo páithak wngnai.

¹³Tamni hwn khe Subraiyungni thamchini bagwi bororok aro tongnai tong glak, abo bukcha wngnai. Babilonni gana tẃi laisunairok uanajak lai anw tei bini kwsarok nugwi mwnwi lai anw.

¹⁴“O badukhung koknairok norok bebak Babilonno kebengwi kitingwi chobani bagwi tiyar wng di; bono kok di, chakhla kongsa koró yaui bono kok di, tamni hwn ba bo Subraiyungni thani sumsok khlai kha.

¹⁵Bono kitingwi chobani khorang khna rw di, bo sakno bedok kha; bini katimung thong báiwi klai bai kha tei bini chokdeualrok báikhrup bai kha. Tamni hwn khe omo wng kha, Subraiyungni yagul sumani: norokbo bono aboni yagul su di, bo khlaima tẃi’-no bono bo khlai di.

¹⁶Sarnaisa tei chekhra tẃiwi jora-o ranairok bórok Babilon bai kak si di; tamni hwn khe sátoknairokni sengni yókna bagwi bebakno sak sakni borokni thani kiphilnai tei bebakno sak sakni ha-o kiphil bainai.”

¹⁷Israil khe singho bai riphrikjak piring-poroi mera. Swkango khe Asiriyani habugra bono monok kha tei tabuk páithago Babilonni habugra Nebukadrejar bini bekrengrok uákhrup bai kha.

¹⁸Aboni bagwi sengkrakrokni Subraiyung, Israilni Kaitor hai hwnwi sa-o; nai di, ang Asiriyani habugrano majra rwma hai kheno Babilonni habugrano tei bini hanobo majra rwnai.

¹⁹Ang Israilno bini hapharo kiphilwi rw phir anw tei bo Karmel bai Basano beraiwi chá anw tei Ephraim hachuk bai Giliado bini bwkha kochom rwjak anw.

²⁰Subraiyung hai hwnwi sa-o, a sal bai a jora-o Israilo cha ya-chúk yarokno naitukjak anw, phiya ba mungsa phano man glak; tei Judani sumsokbo naitukjak anw, phiya ba mungsa phano man glak; tei Judani sumsokbo naitukjak anw, phiya mungsa phano man glak, tamo khe ang karwi klangma bororokno ang nakar anw.

²¹Subraiyung hai hwnwi sa-o, “Nwng Merathaim ha-o tei Pekodo tongnairokno kebeng di. Bórokno tanwi sokomor súgwi pái di tei ang norokno dagima hai kheno khlai di.

²²Ha gwnangwi choba nang laimani khorang bai swbai sokomormani khorang!

²³Swngchar gwnangwini bebak mutarirok bahai khw swbaijak bai kha! Dopharokni thani Babilon bahai khe kirimasingcha wng kha!

²⁴O Babilon, ang nini bagwi khẃi thonwi tonmani aro nwng nang phai kha, phiya ba, o Babilon nwng saui man li ya; nono man kha tei nwng robo romjak kha, tamni hwn khe nwng Subraiyungno kebeng kha.

²⁵Subraiyung bini da-seng tikhlai kha, bini jolima sengrok tikhlaiwi tubu kha, tamni hwn khe Kolodiasongni ha-o sengkrakrokni Subraiyung Kaitorni khlaithai samung tongo.

²⁶Norok bebago’-no bono kebeng di; bini mayam nokrok swbai di; bono maino rúng tẃi rúng di tei sokomor súk di, bini mungsa phano ta narwk si di.

²⁷Bini bebak musuk chwlano rathar bai di, bórok ratharjakna bagwi ongkhorwi tháng bai thung, tamni hwn khe bórokni a majrani sal phaiwi sók phai kha.”

²⁸Khna di! Subraiyung chini Kaitor yagul sumani bini noktharni bagwi yagul sumani kókno Siyono sakhlaina bagwi bórok Babilon hani khárwi yók bai kha.

²⁹“Norok badukhung koknairokno tei badukhung thonnairokno Babilonno kebeng di, bono gerep di; khoroksano phano ta phiyók di. Bini samung khlaima tẃi’-no bono su-ui rw di, bo khlaima tẃi’-no bonobo khlai di, tamni hwn ba bo Israilni kwthar Subraiyung Kaitorno sak nang ya wngwi kebeng kha.

³⁰Aboni bagwi a salo bini chwla siklarok bini kamiyungni lamprarogo klaiwi thwi bai anw tei bini bebak sengkrakrokbo sokomorjak bai anw hwnwi Subraiyung sa-o.”

³¹“O kung chuknai, nai di, ang nono kebengo hwnwi sengkrakrokni Subraiyung Kaitor sa-o; tamni hwn khe nini a sal phaiwi sók phai kha, o jora’-ono nono ang yagul sunai.

³²Aphuru a kung chuknai borok bo thutaiwi klai anw, bono romwi sochanai khoroksa phano tong glak, ang bini bebak kamiyungrogo hór phnangwi rw anw tei abo bono kitingwi tongnai bebak khampro rw bai anw.”

³³Sengkrakrokni Subraiyung hai hwnwi sa-o; “Israilni bororok bai Judani bororok sinklwgwi tonjak bai kha; bórokno khaui tlangnairok, bórok bórokno kwrak kheno khaui ton kha, bórok phiyógwi rwhornani soi ya.

³⁴Bórokno phiyóknaisa wng kha phan gwnang; bini bumung wng kha sengkrakrokni Subraiyung. Hano lengla rwna bagwi tei Babilon hano lengpra rwna bagwi ang bórokni bagwi kók sachrunai.”

³⁵Subraiyung hai hwnwi sa-o, “Kolodiasongni saka-o, Babilono tongwi tongnairokni saka-o, Babilonni samung tang okrarokni saka-o, tei bini elem gwnangrokni saka-o seng harjagwi tongo!

³⁶Bórokno butua cha rwna bagwi Kaitorni kók hwnwi sanairokni saka-o, seng harjak! bórokno sokomorna bagwi bini choba nang lainairokni saka-o seng harjak!

³⁷Bini bebak korairokni saka-o tei korai malkhungrokni saka-o tei bini bisingo tong phainai buini hani bororokni saka-o seng harjak bórokno bwrwirok bai baksa khlaina bagwi! Bini bebak khatijak rang rírokni saka-o seng harjak abórok bebak sekjak bai anw!

³⁸Bini bebak twirok ran rwna bagwi bini saka-o nokbar kutung sipsaui abórokno ransa rw anw! Tamni hwn khe a ha bai takjak mwtai mangrokni ha aroni bororok bórokni a takjak mwtairok bai’-no kobor chaui tong bai kha.”

³⁹“Aboni bagwi Babilon bolongni mal-matarokni gegumarokni tongthai se wng anw tei tokmangingangrok bothop thum anw, abo tei bororokni tongthai wng glak tei kusung-kusungni ulo phano aro bororokni tongthai tei wng glak.

⁴⁰Sodom bai Gomora tei bini ganani kamiyungrok sokomorjak phuru wngma hai wngnai hwnwi Subraiyung sa-o, khoroksa borok phano aro-o tongnai tong glak.”

⁴¹“Nai di, salgrabai phaisingni kwbángma bororok phaiwi tongo; ha páithaknarni kaisa phankrak dopha, tei kwbángma ha bubagrasong khatung khája wngwi phaiwi tongo.

⁴²Bórok badukhung bai kolonga tẃi laijak máng; bórok bwkha kwrak tei khairokma kwrwi gwja; bórokni khorang twijlangni twi aphal hai; tei bórok korai kasaui phaiwi tongo; o Babilonni sajwksong, norokno kebengnai choba nang lainani bagwino bórok bebak chobani borok hai tiyar wng laijak.

⁴³Babilonni habugra bórokni kókrokno khna kha, tei bini yak chúk ya wng kha; kengaiwi tong kha, sak kengnani phuru bwrwirok bohok sajakma hai wng kha.”

⁴⁴“Nai di, Jordan bolongni singho ongkhorwi mera bodol mwrwkma bwkhak phaima hai, achomsa khe ang bono aroni khárwi rohor anw; tei bini saka-o ani chongjak khoroksano achuk rw anw. Tamo khe ang hai sabo tong? Sabo ano dainai tong? Ani bwskango bacha phai raknai, abo tẃi mera mwrwknai sabo tong?

⁴⁵Aboni bagwi Subraiyung Babilonno kebengwi tamo bwkha chong kha tei Kolodiasongni hano kebengwi tamo uansugwi tong kha abórokno khna di. Bórok sopreui tlangjak bai anw, mera bodolni bwsa kukbo sopreui tlangjak anw tei bórok samung khlaima tẃi’-no bórokno manjak rwjak anw.

⁴⁶Babilonno segwi namano khorang bai ha ma kwlwinai tei bini kapma khorang dopharok khna bainai.”